NUMERI 32

₁Barubene le Bagate ba ne ba na le diruiwa tse dintsi thata thata. Jaanong ya re ba bona lefatshe la Jasere le lefatshe la Gileate, ba fitlhela golo foo e le felo ga diruiwa. ₂Ke fa Bagate le Barubene ba tla, ba raya Moše le moperesiti Eleasare le bagolo ba phuthego ba re: ₃“Kwa Atarothe le Dibone le Jasere le Nimera le Hešebone le Eleale le Sebame le Nebo le Beone – ₄lone lefatshe le Morena a le thopileng fa pele ga phuthego ya Baiseraele – ke lefatshe la diruiwa, mme batlhanka ba gago ba na le diruiwa.” ₅Ba be ba re: “Fa re bonye bopelotlhomogi mo matlhong a gago, a lefatshe leo le newe batlhanka ba gago go nna boswa, mme o se ka wa re tshedisa noka ya Joretane.”

₆Mme Moše a fetola Bagate le Barubene a re: “A e ka re ba ga lona ba ya kwa ntweng, lona lwa itulela fa? ₇Ke ka ntlha ya eng fa lo tentsha dipelo tsa Baiseraele gore ba se ka ba tshelela kwa lefatsheng le Morena o le ba neileng? ₈Kana le borraeno ba dirile jalo, jale fa ke ba roma go tswa kwa Kateše-Barenea go ya go tlhola lefatshe. ₉Ya re ba sena go ya go fitlha kwa nokaneng ya Ešekole le go tlhola lefatshe, ba boa ba tentsha dipelo tsa Baiseraele, mo ba bileng ba gana go ya go tsena kwa lefatsheng le Morena o le ba neileng. ₁₀Ka sebaka sele Morena a tuka bogale, a ikana a re: ₁₁‘Ruri, banna ba ba bolotseng kwa Egepeto go simolola ka ba ba dinyaga di le 20 le bomogoloa-bone ga ba kitla ba bona naga e ke e ikanetseng Aborahame le Isaka le Jakobe, ka ba se ka ba ntshala morago ka botlalo, ₁₂fa e se Kalebe morwa Jefune, Mokenisi le Jošua morwa Nune; gonne ba setse Morena morago ka botlalo.’ ₁₃Morena a ba a tukela Baiseraele bogale, a ba kgarakgatsha kwa sekakeng dinyaga di le 40 ga tsamaya losika lotlhe lo lo dirileng bosula mo matlhong a Morena lwa ba lwa felelela.

₁₄“Jaanong lona lo tsogile lo le mo boemong jwa borraalona, lo le bana ba baleofi; jaanong lo rata go okeletsa Baiseraele bogale jo bo tukang jwa Morena gape. ₁₅Fa lo ikepa mo go ene, o ka ba sadisa sebaka gape mo sekakeng, mme lwa senyetsa morafe otlhe o.”

₁₆Ba mo atamela ba re: “Fano re rata go aga maraka a difutshane a diruiwa tsa rona le metse ya bana ba rona fela. ₁₇Mme rona ka rosi re tla tlhomela ka pele, re etelela Baiseraele pele go ya re be re ba fitlhise kwa mannong a bone. Fela bana ba rona ba tla sala mo metseng e e femetsweng ka ntlha ya baagi ba lefatshe. ₁₈Ga re kitla re boela kwa malapeng a rona, mongwe le mongwe wa Baiseraele a ise a amogele boswa jwa gagwe. ₁₉Gonne ga re rate go rua nabo kwa moseja ga Joretane le kwa pele; gonne boswa jwa rona bo re wetse ka kwano ga Joretane ntlheng ya botlhabatsatsi.”

₂₀Moše a ba raya a re: “Fa lo ka dira ka fa lefokong leo, lwa tlhomela fa pele ga Morena go ya ntweng, ₂₁mme mongwe le mongwe wa lona yo o tlhometseng a tshela Joretane fa pele ga Morena go ya a be a leleke baba ba gagwe fa pele ga gagwe, ₂₂le lefatshe le be le thopiwa fa pele ga Morena, lo bo lo boa morago ga moo, gona lo tla bo lo se na molato fa pele ga Morena le Baiseraele, mme lefatshe leno e tla nna boswa jwa lona fa pele ga Morena. ₂₃Mme fa lo sa dire jalo, gona lo leofela Morena, mme lo tla lemoga petso ya boleo jwa lona e e tla lo welang. ₂₄Ikageleng he metse ya bana ba lona le maraka a difutshane tsa lona, lo dire ka fa lo buileng ka teng.”

₂₅Bagate le Barubene ba araba Moše ba re: “Batlhanka ba gago ba tla dira jaaka go laetse mong wa rona. ₂₆Bana ba rona le basadi ba rona ba tla nna teng mo metseng ya Gileate le diruiwa tsotlhe tsa rona. ₂₇Mme batlhanka ba gago, botlhe ba ba tlhometseng go bolola fa pele ga Morena ba tla fetela kwa ntweng jaaka mong wa rona a buile.”

₂₈Ke fa Moše a laela moperesiti Eleasare le Jošua morwa Nune le ditlhogo tsa dikgotla tsa ditso tsa Baiseraele ka ga bone. ₂₉Moše a ba raya a re: “Fa Bagate le Barubene ba ka tshela Joretane le lona, ba tlhomeletse ntwa botlhe fa pele ga Morena, lefatshe la ba la thopiwa ke lona, gona lo ba nee lefatshe la Gileate go nna boswa. ₃₀Mme fa ba sa tshele le lona ba tlhometse, gona a ba nne mo gare ga lona kwa lefatsheng la Kanana.”

₃₁Bagate le Barubene ba araba ba re: “Tse Morena o di laetseng batlhanka ba gago re tla di dira. ₃₂Re tla tshelela kwa lefatsheng la Kanana fa pele ga Morena re tlhometse, mme boswa jwa rona jwa naga bo ntse bo le ka kwano ga Joretane.”

₃₃Bagate le Barubene le bontlhanngwe jwa lotso lwa ga Manase morwa Josefa Moše a ba naya jalo naga ya bogosi jwa ga Sihone kgosi ya Baamori le ya bogosi jwa ga Oge kgosi ya Basane, e bong lefatshe le metse ya lone le dinaga tsa yona le metse ya lefatshe tikologong.

₃₄Ke fa Bagate ba aga Dibone le Atarothe le Aroere ₃₅le Aterothe-Sofane le Jasere le Jogebeha ₃₆le Bethe-Nimera le Betharane, ya nna metse e e femetsweng le maraka a difutshane. ₃₇Barubene ba aga Hešebone le Eleale le Khiriathaime ₃₈le Nebo le Baale-Meone – maina a fetotswe – le Sibema; ba be ba taya metse e ba e agileng maina a bone.

₃₉Bomorwa Magire oora Manase ba ya kwa Gileate, ba thopa naga ya teng, ba leleka Baamori ba ba neng ba le gona. ₄₀Ke fa Moše a naya Bamagire oora Manase naga ya Gileate, mme ba nna mo go yona. ₄₁Jaire oora Manase a ya a thopa metsana ya bone ya ditente, a e bitsa metsana ya ditente ya ga Jaire. ₄₂Noba a ya a thopa motse wa Kenathe le metsana ya teng, a o taya leina la gagwe Noba.