NUMERI 20

₁Jaanong Baiseraele, e bong phuthego yotlhe, ba fitlha kwa sekakeng sa Tsine ka kgwedi ya ntlha ya ngwaga wa 40; morafe wa nna kwa Kateše, mme Miriame a swela gona, a ba a fitlhwa teng. ₂Ke fa phuthego e tlhoka metsi gape, mme ba phuthega go omana le Moše le Arone. ₃Batho ba lwa le Moše, ba bua ba re: “Ntlha re ka bo re sule, jale fa ba ga rona ba swa fa pele ga Morena. ₄Lo ne lo tsisetsang phuthego ya Morena mo sekakeng seno gore re swele fano le diruiwa tsa rona? ₅Ke go reng, fa lo re ntshitse kwa Egepeto go re fitlhisa felong fano fa go bosula? Ga se felo ga dijwalo le difeie le masimo a moweine le digaranata; le gona ga go na metsi a a ka nowang.” ₆Ke fa Moše le Arone ba tlogela phuthego, ba ya kwa mojakong wa Tente ya Boipontsho, ba wa ka difatlhego, mme kgalalelo ya Morena ya ba phatsimela.

₇Morena a ba a raya Moše a re: ₈“Tsaya thobane, o kgobokanye phuthego o na le Arone mogoloo, o bue le lefika fa pele ga matlho a bone, gona le tla ntsha metsi a lone. O ba ntshetse metsi jalo mo lefikeng, o nose phuthego le diruiwa tsa bone.” ₉Moše a tsaya thobane fa pele ga Morena jaaka a mo laetse.

₁₀Moše le Arone ba kgobokanya phuthego fa pele ga lefika, mme Moše a ba raya a re: “A ko lo utlwe, lona barukhutlhi, a re tla lo ntshetsa metsi mo lefikeng le?” ₁₁Moše a ba a tsholetsa letsogo, a itaya lefika gabedi ka thobane ya gagwe; ga tswa metsi a mantsi, mme phuthego ya nwa le diruiwa tsa bone.

₁₂Mme Morena a raya Moše le Arone a re: “E re ka lo se ka lwa ntumela go nkgalaletsa mo matlhong a Baiseraele, ke ka moo lo se kitlang lo fitlhisa phuthego e kwa lefatsheng le ke le ba neileng.”

₁₃Ke ona Metsi a Meriba, fa Baiseraele ba neng ba lwa le Morena teng, mme ene a itshupa mo go bone a le boitshepo.

₁₄E rile ba ntse ba le kwa Kateše, Moše a roma barongwi kwa kgosing ya Baetomo a re: “Baiseraele, bomorwaa-rraago, ba bua jaana ba re: O itse pogisego yotlhe e e re dirafaletseng. ₁₅Kana borraetsho ba kile ba fologela kwa Egepeto, ra nna teng sebaka se seleele, mme Baegepeto ba re direla bosula le borraarona. ₁₆Ke fa re goela Moreneng, mme a utlwa selelo sa rona, a roma moengele, a re ntsha kwa Egepeto! Jaanong bona, re mono Kateše, motseng o o fa molelwaneng wa gago. ₁₇Ka thapelo, nte re ralale lefatshe la gago; ga re ne re gata masimo gongwe masimo a moweine le e seng go nwa metsi a didiba, mme re tla tsamaya mo tseleng ya kgosi, re sa fapogele ntlheng ya le le jang le fa e le ya la molema go fitlhelela re be re tswe mo nageng ya gago.”

₁₈Mme Baetomo ba mo fetola ba re: “O se ka wa ralala lefatshe la rona, re ka tla ra bolola, ra go kgatlhantsha ka tšhaka.”

₁₉Baiseraele ba be ba ba raya ba re: “Re tla ralala fela ka tsela e kgolo, mme fa re ka nwa metsi a lona, le diruiwa tsa rona, re tla a lefa. Kana ga re batle sepe fa e se go ralala ka dinao fela.”

₂₀Mme ba fetola ba re: “Lo se ka lwa ralala.” Ke fa Baetomo ba bolola go ba kgatlhantsha ka batlhabani ba bantsi le ka mabogo a a tlhometseng. ₂₁Baetomo ba ne ba gana jalo go dumelela Baiseraele go ralala naga ya bone. Mme Baiseraele ba ba fapoga.

₂₂Morago ga tseo phuthego yotlhe ya Baiseraele ya huduga kwa Kateše, ya ya go fitlha kwa thabeng ya Hore. ₂₃Gona kwa thabeng ya Hore fa molelwaneng wa lefatshe la Baetomo Morena a raya Moše le Arone a re: ₂₄“Jaanong Arone o na le go gorosiwa kwa morafeng wa ga gabo; gonne ga a ne a tsena kwa lefatsheng le ke le neileng Baiseraele, ka lo se ka lwa utlwa taelo ya me kwa Metsing a Komano. ₂₅Tsaya Arone le Eleasare morwawe, o ba tlhatlosetse mo thabeng ya Hore. ₂₆O be o apole Arone diaparo tsa gagwe, o di apese Eleasare morwawe. Arone o tla gorosiwa kwa go ba ga gabo, a swela teng.” ₂₇Moše a dira jaaka Morena a mo laetse; ba tlhatlogela mo thabeng ya Hore mo matlhong a phuthego yotlhe. ₂₈Moše a ba a apola Arone diaparo tsa gagwe, a di apesa Eleasare morwawe. Mme Arone a swela teng mo setlhoeng sa thaba. Moše le Eleasare ba be ba fologa mo thabeng. ₂₉Ya re phuthego yotlhe e bona Arone a sule, ba lapa la ga Iseraele botlhe ba lelela Arone malatsi a le 30.