NEHEMIA 3

₁Ga nanoga Eliasibe moperesiti yo mogolo le ba ga gabo baperesiti ba aga Kgoro ya Dinku, ba be ba e itshepisa, ba tsenya ditswalo tsa yona, ba agela pele go ya kwa lonakeng lwa phemelo lwa Hamea le lwa Phemelo lwa Hananele, ba di itshepisa.

₂Banna ba Jerigo ba aga ba bapile nabo; Sakhure morwa Imeri a aga a bapile nabo.

₃Boora Hasenaa ba aga Kgoro ya Ditlhapi, ba tlhoma dikota tsa yona, ba tsenya ditswalo tsa yona le dikgogetso tsa yona le mephakarego ya yona.

₄Meremothe, morwa Uria morwa Hakose, a baakanya lobota a bapile nabo; Mesulame, morwa Beregia morwa Mešesabele, a lo baakanya a bapile nae; Satoke, morwa Baana, a lo baakanya a bapile nae.

₅Ba kwa Thekoa ba lo baakanya ba bapile nae; mme batlotlegi ba bone ba se ka ba tsenya diatla mo tirong e ya mong wa bone.

₆Kgoro e Kgologolo ya baakanngwa ke Joyata, morwa Phasea, le Mesulame, morwa Besodia; ba tlhoma dikota tsa yona, ba tsenya ditswalo tsa yona le dikgogetsa tsa yona le mephakarego ya yona.

₇Melatya wa kwa Gibeone le Jatone wa kwa Meronothe le banna ba Gibeone le ba Mitsepha ba baakanya lobota ba bapile nabo fa lekgotleng la molaodi wa naga e e ntlheng ya bophirimatsatsi ya noka ya Ferathe.

₈Usiele, morwa Harahaya, mongwe wa bathudi ba gouta, a lo baakanya a bapile nabo; Hananya, mongwe wa batlhakanyaditlôlô, a lo baakanya a bapile nae; mme ba baakanya lobota lwa Jerusalema go fitlha kwa loboteng lo lo atlhameng.

₉Refaya, morwa Hure, molaodi wa bontlhanngwe jwa naga ya Jerusalema, a lo baakanya a bapile nabo.

₁₀Jetaya, morwa Harumafe, a lo baakanya a bapile nae fa go lebaganyeng le ntlo ya gagwe; Hatuse, morwa Hasabenya, a lo baakanya a bapile nae.

₁₁Karolo e nngwe ya baakanngwa ke Malekhia, morwa Harime, le Hašube, morwa Phahathe-Moabe, mmogo le Lonaka lwa Phemelo lwa Dibeso.

₁₂Sadume, morwa Halohese molaodi wa bontlhanngwe jwa naga ya Jerusalema, a lo baakanya a bapile nabo ene le bomorwadie.

₁₃Hanune le baagi ba Sanoa ba baakanya Kgoro ya Molapo, ba e aga, ba tsenya ditswalo tsa yona le dikgogetso tsa yona le mephakarego ya yona, ba agela pele mo loboteng mabogo a le 1 000 go fitlha kwa Kgorong ya Letshotelo.

₁₄Mme Kgoro ya Letshotelo ya baakanngwa ke Malekhia, morwa Regabe molaodi wa naga ya Bethe-Hakereme; a e aga, a tsenya ditswalo tsa yona le dikgogetso tsa yona le mephakarego ya yona.

₁₅Kgoro ya Motswedi ya baakanngwa ke Sadume, morwa Kolehose molaodi wa naga ya Mitsepha; a e aga, a e rulela, a tsenya ditswalo tsa yona le dikgogetso tsa yona le mephakarego ya yona; a ba a baakanya lobota lwa letsha la go isa metsi kwa tshimong ya kgosi le go fitlha kwa mapalamong a a fologang kwa motseng wa ga Dafita.

₁₆A tlhomaganngwa ke Nehemia, morwa Asebuke molaodi wa bontlhanngwe jwa naga ya Betshure; ene a lo baakanya go ya go lebagana le diphupu tsa ga Dafita le go fitlha kwa letsheng le le dirilweng le go fitlha kwa Ntlong ya Bagale.

₁₇A tlhomaganngwa ke Balefi, e bong Rehume, morwa Bani, a lo baakanya; fa go bapileng nae ga baakanngwa ke Hasabja, molaodi wa botlhanngwe jwa naga ya Kehila, a emela batho ba naga ya gagwe.

₁₈A tlhomaganngwa ke ba ga bone, e bong Bawai, morwa Henatate molaodi wa bontlhanngwe jwa naga ya Kehila, a lo baakanya.

₁₉Fa thoko ga gagwe go ne ga baakanya Esere, morwa Jesua molaodi wa Mitsepha, karolo e nngwe go lebagana le ntlo ya dibolai fa sekhutlong sa lobota.

₂₀A tlhomaganngwa ke Baruge morwa Sabai; ene a baakanya karolo e nngwe ka tlhoafalo go tloga kwa Sekhutlong go fitlha kwa mojakong wa ntlo ya ga Eliasibe, moperesiti yo mogolo.

₂₁A tlhomaganngwa ke Meremothe morwa Uria morwa Hakose; ene a baakanya karolo e nngwe go tloga mojakong wa ntlo ya ga Eliasibe go fitlha bokhutlong jwa ntlo ya ga Eliasibe.

₂₂Go tlhomagana nae go ne ga baakanya baperesiti, banna ba lebala la Joretane.

₂₃Go tlhomagana nabo go ne ga baakanya Benyamene le Hašube go lebagana le ntlo ya bone; go tlhomagana nabo go ne go baakanya Asaria, morwa Maaseya morwa Ananya, fa thoko ga ntlo ya gagwe.

₂₄A tlhomaganngwa ke Binui, morwa Henatate; ene a baakanya karolo e nngwe go tloga kwa ntlong ya ga Asaria go fitlha kwa sekhutlong le kwa ntlheng.

₂₅Go bapa nae go ne ga baakanya Phalale, morwa Usai, go lebagana le sekhutlo le lonaka lwa phemelo lo lo rotogileng mo ntlong ya kgosi e e kwa godimo fa lapeng la balebedi; go bapa nae go ne go baakanya Phetaya, morwa Pharoše – ₂₆mme batlhanka ba Tempele ba ne ba agile mo thoteng ya Ofele – go ya go lebagana le Kgoro ya Metsi ntlheng ya botlhabatsatsi le lonaka lwa phemelo lo lo rotogileng.

₂₇A tlhomaganngwa ke banna ba Thekoa, ba baakanya karolo e nngwe go tloga fa go lebaganyeng le lonaka lwa phemelo lo logolo lo lo rotogileng go ya go fitlha kwa loboteng lwa thota ya Ofele.

₂₈Go pota Kgoro ya Dipitse ka fa godimo go ne ga baakanya baperesiti mongwe le mongwe go lebagana le ntlo ya gagwe.

₂₉Ba tlhomaganngwa ke Satoke morwa Imere; a baakanya go lebagana le ntlo ya gagwe; go bapa nae go ne ga baakanya Semaya, morwa Seganya modisa wa Kgoro ya Botlhabatsatsi.

₃₀Ene a tlhomaganngwa ke Hananya, morwa Selemia, le Hanune, morwa Salafe wa borataro; ba baakanya karolo e nngwe. Ba tlhomaganngwa ke Mesulame, morwa Beregia; ene a baakanya go lebagana le ntlwana ya gagwe.

₃₁A tlhomaganngwa ke Malekhia, mongwe wa bathudi ba gouta: ene a baakanya go fitlha kwa ntlong ya batlhanka ba Tempele le barekisi go lebagana le Kgoro ya Balebedi le go fitlha kwa ntlwaneng e e kwa godimo ya sekhutlo.

₃₂Mme fa gare ga ntlwana e e kwa godimo ya sekhutlo le Kgoro ya Dinku go ne ga baakanya bathudi ba gouta le barekisi.