NEHEMIA 13

₁E rile ka letsatsi leo fa go buisiwa lokwalo lwa go Moše mo ditsebeng tsa morafe, ga fitlhelwa go kwadilwe mo go lone go twe: “Baamone le Bamoabe ba se ka ba tsena mo phuthegong ya Modimo ka bosakhutleng, ₂ka ba se ka ba kgatlhantsha Baiseraele ka bogobe le ka metsi, le ka Balake a ba rapela Bileame gore a ba hutse.” Mme Modimo wa rona wa fetola khutso go nna tshegofatso. ₃Ya re ba sena go utlwa molao oo, ba tlhaola botlhe ba madi a a tlhakanyeng, ba tswa mo Baiseraeleng.

₄E rile pele ga foo Eliasibe moperesiti yo o dirilweng mookamedi wa matlwana a Ntlo ya Modimo, molekane wa ga Tobia ka nyalo, ₅a mo neela ntlwana e kgolo. Pele ga foo ba ne ba tle ba bee teng tsa ditshupelo le tsa maswalo le didiri le karolo ya some ya mabele le matute a moweine le lookwane tse di neng di laeletswe Balefi le baopedi le badisa ba dikgoro le tsa lekgetho la baperesiti. ₆Mme ya re go dirafala tsotlhe tseo, ka bo ke se yo kwa Jerusalema; gonne ka ngwaga wa 32 wa ga Arethašasetha kgosi ya Babele ke ne ke boetse kwa kgosing. Mme ya re sebaka se sena go feta, ka ikopa mo kgosing, ₇ka ba ka boela kwa Jerusalema. Mme ya re ke bona bosula jo Eliasibe o bo dirileng go kgatlha Tobia ka go mo neela ntlwana mo malapeng a Ntlo ya Modimo, ₈ga nkgopisa thata, mo ke bileng ka latlhela dilo tsotlhe tsa lapa la ga Tobia kwa ntle, ka di ntsha mo ntlwaneng. ₉Ka laela gore ba phepafatse matlwana, ka ba ka busetsa teng didiri tsa Ntlo ya Modimo le dilo tsa ditshupelo le tsa maswalo.

₁₀Ka ba ka lemoga fa dikabelo tsa Balefi di sa ntshiwa le gore mongwe le mongwe o tshabetse kwa tshimong ya gagwe, e bong Balefi le baopedi ba ba tshwanetseng go dira tsa tirelo-Modimo. ₁₁Ka omanya bagolo ka re: “Ke ka ntlha ya eng fa Ntlo ya Modimo e tlogetswe?” Ka ba ka ba phutha, ka ba tsenya mo ditirong tsa bone. ₁₂Ke fa Bajuta botlhe ba tlisa karolo ya some ya mabele le ya matute a moweine le ya lookwane kwa matlwaneng a polokelo. ₁₃Ka baya baokamedi ba matlwana a polokelo, e bong Selemia moperesiti le Satoke mokwaledi le Phetaya mongwe wa Balefi le mothusi wa bone Hanane, morwa Sakhure morwa Mathanya; gonne ba ne ba kaiwa ba ba ikanyegang. Tshwanelo ya bone e ne e le go abela ba ga bone.

₁₄“Modimo wa me, o nkgopole ka ntlha ya tseo. O se ka wa phimola ditiro tsa lorato tse ke di diretseng Ntlo ya Modimo wa me le tirelo ya yona.”

₁₅Mo metlheng eo ka bona mo nageng ya Juta ba ba gatang maungo a moweine mo digatelong ka Sabata le ba ba tlisang dingata tsa korong, ba di belesitse mo dieseleng; le gona ba tlisa weine le maungo a moweine le difeie le merwalo ya mefutafuta kwa Jerusalema ka letsatsi la Sabata. Ka ba tlhagisa ka lone letsatsi leo ba neng ba rekisa dijo ka lone. ₁₆Le ba Tiro ba ne ba agile teng ba ba tlisang ditlhapi le dithoto tsa mefutafuta, ba di rekisa ka Sabata mo Bajuteng le kwa Jerusalema. ₁₇Ka omanya batlotlegi ba Juta, ka ba raya ka re: “Ke tse dimpe jang tse lo di dirang ka go itshepolola letsatsi la Sabata! ₁₈A ga se tsona tse di neng di dirwa ke borraeno, mme Modimo wa rona wa ba wa ba tlisetsa le rona le motse o tatlhego yotlhe e? A go lo bone gore lo oketsa bogale jwa Modimo mo Baiseraeleng ka go itshepolola Sabata?”

₁₉Jaanong ya re fa dikgorong go simolola go fifala pele ga Sabata, ka laela gore ba tswale dikgoro; ka ba ka laela gore ba se ka ba di bula gape pele Sabata a ise a fete. Ka ba ka baya bangwe ba batlhanka ba me kwa dikgorong gore go se ka ga tsenngwa morwalo ope ka letsatsi la Sabata. ₂₀Ke fa babapatsi le barekisi ba dilo tsa mefutafuta ba lala ka fa ntle ga Jerusalema gangwe le gabedi. ₂₁Ka ba tlhagisa, ka ba raya ka re: “Ke ka ntlha ya eng fa lo lala fa loboteng? Fa lo ka dira gape, ke tla lo tshwara ka mabogo.” Go tloga ka sebaka seo ba se ka ba tlhola ba tla ka Sabata. ₂₂Ka ba ka laela Balefi gore ba iitshekise, ba be ba tle ba dise dikgoro gore letsatsi la Sabata le tle le itshepisiwe. “Le tseo o di nkgopole Modimo wa me, o nthekegele ka fa bogolong jwa lorato lwa gago.”

₂₃Mo metlheng eo ke bile ka bona Bajuta ba ba nyetseng basadi ba kwa Ašetote le ba Baamone le ba Bamoabe. ₂₄Bontlhanngwe jwa bana ba bone ba bua Seašetote, le fa e le puo efe, mme ba sa itse go bua Sejuta. ₂₅Ka ba omanya, ka ba hutsa, ka betsa banna bangwe ba bone, ka ba kumola meriri, ka ba ikanisa ka Modimo ka re: “Ga lo a tshwanela go neela bomorwaa-bone bomorwadia-lona le e seng go tseisa bomorwaa-lona le e seng go ipatlela basadi mo go bomorwadia-bone. ₂₆A ga lo a bona Salomo kgosi ya Iseraele yo o neng a leofa ka ntlha ya basadi ba ba ntseng jalo? Le fa mo ditšhabeng tse dintsi go ne go se kgosi e e tshwanang nae, a ratilwe ke Modimo wa gagwe, mme Modimo wa mo dira kgosi ya Baiseraele botlhe, le ene basadi ba ditšhaba di sele ba mo leofisa. ₂₇Jaanong a ga se thona mo go lona, fa lo dira bosula jotlhe jo bogolo jo go direla Modimo wa rona ka boikanyologo ka go nyala basadi ba sele?”

₂₈Mme mongwe wa bomorwa Joyata morwa Eliasibe moperesiti yo mogolo e ne e le mongwe wa ga Sanebalate wa kwa Horone, mme ka mo leleka fa go nna.

₂₉“Ba gopole, Modimo wa me, ka ntlha ya go itshekolola boperesiti le kgolagano ya boperesiti le Balefi.”

₃₀Ka ba phepafatsa jalo mo dilong tsotlhe tsa ditšhaba di sele, ka baya thulaganyo ya tirelo ya baperesiti le Balefi ka fa tirong ya mongwe le mongwe; ₃₁le thulaganyo ya go tlisa dikgong ka dipaka tse di beilweng le ya go tlisa mabutswapele. “Modimo wa me, nkgopole molemong.”