LEFITIKO 5

₁“ ‘Fa motho a leofa, ka a utlwa go hutsiwa mosenyi yo o sa itsiweng, mme ene e le mosupi, ka a bonye molato gongwe a o lemoga, mme a sa o bege, a itsenya jalo mo molatong;

₂“ ‘gongwe fa motho a ama sengwe se se sa itshekang, le fa e le setoto sa phologolo e e sa itshekang gongwe setoto sa seruiwa se se sa itshekang gongwe setoto sa segagabi se se sa itshekang, mme go mo fitlhegetse a itshekologa, a nna molato;

₃“ ‘gongwe fa a ama sengwe sa itshekologo ya motho, le fa e le itshekologo efe e motho o ka itshekologang ka yona, mme go mo fitlhegetse, fela morago a lemoga, fa a le molato;

₄“ ‘gongwe fa motho a ikana ka go bua fela a sa ikakanya mo go tse a reng o tla di dira tsa bosula kampo tsa molemo, le fa e le eng se motho o ka se buang ka maikano, a sa ikakanya, mme go mo fitlhegetse, fela morago a lemoga gore o molato ka sengwe sa dilo tse di ntseng jalo:

₅“ ‘A e re ka a le molato ka sengwe sa dilo tseo, a a ipobole se o leofileng ka sona, ₆a be a tlisetse Morena tefo ya boikwatlhao jwa gagwe ka ntlha ya boleo jwa gagwe jo o bo dirileng, e bong kwana e namagadi ya letsomane gongwe podi e namagadi go nna setlhabelo sa boleo, mme a moperesiti a mo ruanye le Modimo ka ntlha ya boleo jwa gagwe.

₇“ ‘Mme fa a tlhoka sefutshane, a a tlisetse Morena tefo ya boleo jwa gagwe, e bong maphoi a le mabedi gongwe maebana a le mabedi; le lengwe e nne la setlhabelo sa boleo, le lengwe e nne la setlhabelo sa phiso. ₈A a a tlise kwa go moperesiti, mme ene a atametse le e leng la setlhabelo sa boleo pele, a le soke tlhogo fa molaleng, mme a se ka a e kgaola. ₉A be a kgatshe madi mangwe a setlhabelo sa boleo mo lotlhakoreng lwa aletare, mme a gamolele madi a a setseng mo motheong wa aletare; ke setlhabelo sa boleo. ₁₀Mme la bobedi a a le dire setlhabelo sa phiso ka fa molaong wa teng, mme moperesiti a mo ruanye jalo le Modimo ka ntlha ya boleo jwa gagwe jo o bo dirileng; foo o tla itshwarelwa.

₁₁“ ‘Mme fa a tlhoka maphoi a le mabedi gongwe maebana a le mabedi, a a tlise tshupelo go nna tefo ya boleo jwa gagwe, e bong karolo ya lesome ya efa ya bupe jo bo boleta go nna tshupelo ya boleo. A se ka a tshela lookwane mo go jona le e seng go baya tse di nkgang monate mo go jona; gonne ke tshupelo ya boleo. ₁₂A a bo tlise kwa go moperesiti, mme moperesiti a bo tabole bo tletse seatla, e le jo bo fisiwang, a bo fise mo aletareng mo godimo ga ditshupelo tsa molelo tsa Morena; ke tshupelo ya boleo. ₁₃A moperesiti a mo ruanye jalo le Modimo ka ntlha ya boleo jwa gagwe jo o bo dirileng e le jwa sengwe sa dilo tseo; foo o tla itshwarelwa. Mme bupe jo bo setseng e tla nna jwa moperesiti jaaka tshupelo ya dijo.’ ”

₁₄Morena a ba a raya Moše a re: ₁₅“Fa motho a dira ka boikanyologo, a leofa ntlheng ya dineo tse di boitshepo tsa Morena ka go sa itse, a a tlisetse Morena setlhabelo sa molato wa gagwe, e bong phelehu e e se nang bogole jwa letsomane, ka fa o e bonang e lekanye dišekele tsa selefera ka teng, e le dišekele tse di tletseng tsa Felo-ga-Boitshepo, go nna setlhabelo sa molato. ₁₆Mme tse o di senyeditseng dineo tse di boitshepo a a di lefe, a be a di okeletse karolo ya botlhano ya tsona, a di neele moperesiti, mme moperesiti a mo ruanye le Modimo ka phelehu ya setlhabelo sa molato; foo o tla itshwarelwa. ₁₇Mme fa motho a leofa, a dira sengwe sa go leofela ditaolo tsa Morena se se sa tshwanelang go dirwa a sa itse, mme a nna molato jalo, a itsenya mo molatong, ₁₈foo a a tlise phelehu ya letsomane la gagwe e e se nang bogole kwa go moperesiti e o e bonang e lekanye tshenyo go nna setlhabelo sa molato, mme a moperesiti a mo ruanye le Modimo ka ntlha ya tshenyo ya gagwe e o e dirileng e se ka bomo a sa itse, foo o tla itshwarelwa. ₁₉Ke sona setlhabelo sa molato; o itiretse molato mo Moreneng.”