LEFITIKO 24

₁Morena a ba a raya Moše a re: ₂“Laela Baiseraele gore ba go tlisetse lookwane lo lo sa pekwang lwa diolefa tse di thugilweng gore e nne lwa setlhomo, go tle go nne lobone lo lo tukang ka gale. ₃A Arone a lo baakanye ka fa ntle ga lesire la Letlole la Tshupo mo Tenteng ya Boipontsho gore lo tuke go tloga maitsiboa go ya mosong fa pele ga Morena ka gale. Ke molao o o nnetseng ruri wa ditshika tsa lona. ₄A a baakanye dipone mo setlhomong sa gouta e e sa pekwang gore di tuke fa pele ga Morena ka gale.

₅“Le gona a a tsee bupe jo bo boleta, a bese dinkgwe di le 12 tsa jona; dikarolo di le pedi tsa some tsa efa ya bupe e nne tsa senkgwe se le sengwe. ₆A di tlhatlaganye mekoa e le mebedi, di le 6 mo mokoeng o le mongwe mo tafoleng ya gouta e e sa pekwang fa pele ga Morena. ₇A ba a bee bupe jwa maswalo a a phepa mo dinkgweng tse di tlhatlaganyeng e le jo bo tshubelwang Morena mo boemong wa dinkgwe. ₈A a di rulaganye jalo ka letsatsi lengwe le lengwe la Sabata fa pele ga Morena ka gale, di tswa mo Baiseraeleng, e nne tshwanelo ya kgolagano e e nnetseng ruri. ₉E tla nna tsa ga Arone le bomorwawe; ba di je mo Felong-ga-Boitshepo; gonne ke tse di boitshepotshepo tsa gagwe, di tswa mo ditshupelong tsa molelo tsa Morena; ke tshiamelo e e sa khutleng.”

₁₀Mme monna mongwe yo mmaagwe e neng e le Moiseraele, mme rraagwe e le Moegepeto, o kile a tswa mo lapeng a tsena mo gare ga Baiseraele; ene morwa mosadi wa Moiseraele a lwa le Moiseraele yo mongwe. ₁₁Jaanong morwa mosadi wa Moiseraele a kgala leina la Morena, a ba a rogaka. Ke fa a isiwa kwa go Moše. Leina la ga mmaagwe e ne e le Selomithe morwadia Diberi wa lotso lwa ga Dane. ₁₂Mme ba mo golega go ya ba be ba utlwe katlholo ka fa taelong ya Morena.

₁₃Mme Morena a raya Moše a re: ₁₄“Morogaki yo o mo ntshetse kwa ntle ga bothibelelo, mme a botlhe ba ba mo utlwileng ba mmee mabogo mo tlhogong, mme phuthego yotlhe e mo kgobotletse ka majwe. ₁₅O be o ree Baiseraele o re: ‘Mongwe le mongwe yo o rogang Modimo wa gagwe o tla rwala boleo jwa gagwe. ₁₆Yo o kgalang leina la Morena o tshwanetse go bolawa. A phuthego yotlhe e mo kgobotletse ka majwe. Le fa e le moeng gongwe yo o tsaletsweng mo gae, fa a kgala leina la Morena a a bolawe.

₁₇“ ‘Le motho yo o bolayang motho yo mongwe o tshwanetse go bolawa. ₁₈Yo o bolayang seruiwa a a se lefe ka se sengwe, botshelo bo lefiwe ka botshelo.

₁₉“ ‘Mme fa motho a golafatsa mongwe-ka-ene a a direlwe jaaka a dirile: ₂₀A lefele thobego ka thobego le leitlho ka leitlho le leino ka leino; a a direlwe jaaka a golafaditse motho. ₂₁Yo o bolaileng seruiwa a a se lefe, mme yo o bolaileng motho a a bolawe! ₂₂Molao o le mongwe o tla lo laola, moeng fela jaaka ngwana wa legae; gonne ke nna Morena Modimo wa lona.’ ”

₂₃Moše a bolelela Baiseraele jalo, mme ba ntshetsa morogaki kwa ntle ga bothibelelo, ba mo kgobotletsa ka majwe. Baiseraele ba dira jaaka Morena a laetse Moše.