JOŠUA 5

₁E rile dikgosi tsotlhe tsa Baamori tse di neng di le ka kwano ga Joretane mo ntlheng ya bophirimatsatsi le dikgosi tsotlhe tsa Bakanana tse di neng di le fa lewatleng di utlwa ka fa Morena a kgadisitseng metsi a Joretane ka teng fa pele ga Baiseraele ga tsamaya ba tshela, tsa kgobega marapo, ga se ka ga tlhola go nna bopelokgale mo go tsona fa pele ga Baiseraele.

₂Ka sebaka seo Morena a laela Jošua a re: “Itirele dithipa tsa matlapa, o rupise Baiseraele.” ₃Ke fa Jošua a itirela dithipa tsa matlapa, a rupisa Baiseraele kwa thabeng ya Aralothe. ₄Jošua o ba rupisitse ka ntlha ya go re morafe otlhe o o neng o hudugile kwa Egepeto, e bong banna botlhe ba mephato ba ne ba swetse mo sekakeng ba le mo tseleng ya go huduga kwa Egepeto. ₅Gonne batho botlhe ba ba hudugileng ba ne ba rupile; fela batho botlhe ba ba tsaletsweng mo tseleng go sena go duwa kwa Egepeto ba ne ba sa rupa. ₆Gonne Baiseraele ba ne ba sepela dinyaga di le 40 mo sekakeng ga tsamaya setšhaba sotlhe sa banna ba batlhabani ba ba hudugileng kwa Egepeto sa nyelediwa, ka ba se ka ba utlwa lentswe la Morena. Ke bone ba Morena o neng a ba ikanela a re, ga a kitla a ba abela lefatshe le Morena o neng a le solofeditse borraabo ka maikano a re: “O tla le re naya, e bong lefatshe le le elang mašwi le dinotshe.” ₇Bomorwa-bone ba ba neng ba godile mo boemong jwa borraabo ke bone ba Jošua o neng a ba rupisa; gonne ba ne ba ise ba rupe, ka go ne go se na thupiso mo tseleng.

₈Jaanong ya re setšhaba sotlhe se sena go rupisiwa, ba nna fela mo mannong a bone mo bothibelelong go fitlhelela ba fola. ₉Ke fa Morena a raya Jošua a re: “Kajeno ke pitikile kgobo ya Baegepeto, ka e tlosa mo go lona.” Ke ka moo felo foo go bidiwang ka leina la Gilegala go fitlha letsatsing la kajeno.

₁₀E rile Baiseraele ba ntse ba thibeletse kwa Gilegala mo nageng ya Jerigo, ba ja Moletlo wa Tlolaganyo ka letsatsi la 14 la kgwedi go le mantsiboa. ₁₁Go tloga ka letsatsi le le latelang la Tlolaganyo ba ja tse di robilweng mo lefatsheng le, e bong dinkgwe tse di sa bedisiwang le dipabe tsa mabele, e le ka lone letsatsi leo. ₁₂Ka letsatsi la ka moso Mmana wa khutla, ka jaanong Baiseraele ba ja tsa thobo ya lefatshe le. Go tsweng foo ga ba a ka ba tlhola ba nna le Mmana, mme ba ja tse di rojwang mo lefatsheng la Kanana ka ngwaga oo.

₁₃E kile ya re Jošua a ntse a le gaufi le Jerigo, a tsholetsa matlho, a leba, a bona monna a eme fa pele ga gagwe, a tshotse tšhaka a e somotse. Jošua a ya kwa go ene, a mmotsa a re: “A o wa rona kampo a o wa baba ba rona?”

₁₄A araba a re: “Nnyaya! Ke nna molaodi wa mephato ya Morena. Ke gona ke tlang.” Ke fa Jošua a wela fa fatshe ka sefatlhego, a ikoba a mmotsa a re: “Morena wa me o laela motlhanka wa gagwe a reng?”

₁₅Molaodi wa mephato ya Morena a raya Jošua a re: “Rola ditlhako tsa gago mo dinaong tsa gago; gonne felo fa o emeng teng go boitshepo.” Jošua a dira jalo.