JOŠUA 24

₁Jošua a ba a phuthela ditso tsotlhe tsa Iseraele kwa Šegeme, a bitsa bagolo ba Baiseraele le ditlhogo tsa bone le baatlhodi ba bone le bakwaledi ba bone. Ba tla ba eme fa pele ga Modimo. ₂Ke fa Jošua a raya morafe otlhe a re: “Morena, Modimo wa Iseraele, o bua jaana a re: ‘Bogologolo borraeno ba ne ba agile kwa moseja ga noka ya Ferathe, e bong Thara rraagwe Aborahame le rraagwe Nahore, ba direla medimo e sele. ₃Mme ke tsere rraeno Aborahame kwa moseja ga noka ya Ferathe, ka mo tsamaisa mo lefatsheng lotlhe la Kanana, ka atisa losika lwa gagwe, ka mo naya Isaka. ₄Mme Isaka ka mo naya Jakobe le Esau. Ka naya Esau dithaba tsa Seire gore e nne tsa gagwe. Mme Jakobe le bana ba gagwe ba ya kwa Egepeto. ₅Ka roma Moše le Arone, ka betsa Baegepeto jaaka ke dirile mo go bone. Morago ga moo ka lo ntsha teng. ₆Ka ntsha borraeno kwa Egepeto, lwa fitlha fa lewatleng, mme Baegepeto ba latelela borraeno ka dikoloi tsa ntwa le ka bapalami kwa Lewatleng la Motlhaka. ₇Ke fa ba lelela Moreneng, mme a baya lefifi fa gare ga lona le Baegepeto, a ba nwetsa mo lewatleng, la ba bipa. Matlho a lona a bonye tse ke di diretseng Baegepeto. Jaanong lwa nna mo sekakeng malatsi a mantsi.

₈“ ‘Morago ga moo ka lo isa kwa lefatsheng la Baamori ba ba neng ba agile kwa moseja ga Joretane; ba tlhabana le lona, mme ka ba neela mo diatleng tsa lona, lwa thopa lefatshe la bone, ka ba nyeletsa fa pele ga lona. ₉Ga tsoga Balake morwa Siphore, kgosi ya Moabe, a lwa le Iseraele; a roma a bitsa Bileame morwa Beore gore a lo hutse. ₁₀Mme ka gana go utlwa Bileame, mo a bileng a lo tshegofatsa; ka lo pholosa jalo mo diatleng tsa gagwe. ₁₁Mme ya re lo tshela Joretane, lo fitlha kwa Jerigo, beng ba Jerigo ba tlhabana le lona, bone Baamori le Baferesi le Bakanana le Bahethe le Bagiregasi le Bahewi le Bajebusi, mme ka ba neela mo diatleng tsa lona. ₁₂Ka roma mefu, ya lo etelela pele, ya ba leleka gore ba lo tshabe jaaka dikgosi tse pedi tsa Baamori, e se ka ditšhaka tsa lona le e seng ka mara a lona. ₁₃Ka lo naya lefatshe le lo sa itapisang ka lone le metse e lo sa e agang; lo nna mo go yona. Lo ja masimo a moweine le ditlhare tsa olefa tse lo sa di jwalang.’

₁₄“Jaanong he, boifang Morena, lo mo direle ka nnete le ka boikanyego! Tlosang medimo e borraeno ba neng ba e direla kwa moseja ga noka ya Ferathe le kwa Egepeto, lo direle Morena. ₁₅Mme fa e le bosula mo matlhong a lona go direla Morena, itlhopheleng kajeno yo lo ratang go mo direla, a medimo e borraeno ba neng ba e direla ba le kwa moseja ga noka ya Ferathe kampo medimo ya Baamori ba lo agileng mo lefatsheng la bone, mme nna le ba lapa la me re tla direla Morena.”

₁₆Ke fa morafe o araba o re: “A go nne kgakala le rona go ka tlogela Morena le go ka direla medimo e sele. ₁₇Gonne Morena ke Modimo wa rona; ke ona o o re ntshitseng le borraetsho kwa lefatsheng la Egepeto kwa ntlong ya botlhanka; ke ona o o dirileng ditshupo tse dikgolo tsele mo matlhong a rona; ke ona o o re bolokileng mo tseleng yotlhe e re e tsamaileng le mo merafeng yotlhe e re neng re e raletse. ₁₈Ke ene Morena yo o lelekileng merafe yotlhe eo le Baamori, baagi ba lefatshe le fa pele ga rona. Le rona re rata go direla Morena; gonne ke ene Modimo wa rona.”

₁₉Mme Jošua a raya morafe a re: “Ga lo ne lo kgona go direla Morena; gonne ene ke Modimo o o boitshepo, ke Modimo o o lefufa; ga o kitla o lo itshwarela ditlolo tsa lona le maleo a lona. ₂₀Gonne fa lo ka tlogela Morena, lwa direla medimo e sele, o tla lo fetogela, a lo direla tse di botlhoko, a lo nyeletsa a sena go lo direla tse di molemo.”

₂₁Mme morafe wa raya Jošua wa re: “Nnyaya, re tla direla Morena.”

₂₂Ke fa Jošua a raya morafe a re: “Lona lo itshupela ka losi, fa lo itlhophetse Morena go mo direla.” Ba re: “Ee, re a itshupela.”

₂₃“Ka moo he tlosang medimo e sele e e mo go lona, mme a dipelo tsa lona di sekamele ka fa Moreneng, Modimo wa Iseraele!”

₂₄Ke fa morafe o raya Jošua o re: “Re tla direla Morena, Modimo wa rona, re utlwa lentswe la ona.”

₂₅Jošua a tlhomamisetsa morafe kgolagano ya Modimo jalo ka letsatsi leo, a o beela molao le ngwao kwa Šegeme. ₂₆Jošua a ba a kwala mafoko ao mo lokwalong lwa molao wa Modimo, a ba a tsaya letlapa le legolo, a le tlhoma teng fa tlase ga setlhare sa eike, se se fa Tempelaneng ya Morena. ₂₇Mme Jošua a raya morafe otlhe a re: “Bonang, letlapa le e tla nna mosupi ka ga rona; gonne le utlwile mafoko otlhe a Morena a o a buileng le rona; le gona e tla nna mosupi ka ga lona, e se re gongwe lwa itatola Modimo wa lona.” ₂₈Ke fa Jošua a naya morafe tsela, mongwe le mongwe a boela kwa legaeng la gagwe.

₂₉Mme morago ga dilo tseo Jošua morwa Nune motlhanka wa Morena a swa a le dinyaga di le 110. ₃₀Ba mo fitlha mo nageng ya gagwe kwa Thimenatshera e e kwa dithabeng tsa Eferaime ntlheng ya bokone ya thaba ya Gaaše. ₃₁Baiseraele ba ne ba direla Morena ka malatsi otlhe a ga Jošua le ka malatsi otlhe a bagolo ba ba neng ba phela sebaka se seleele sehularong sa ga Jošua, e le ba ba itseng ditiro tsotlhe tsa Morena tse o di diretseng Baiseraele. ₃₂Le marapo a ga Josefa a Baiseraele ba duleng nao kwa Egepeto ba a fitlha mo Šegeme mo karolong ya tshimo e Jakobe o neng a e rekile mo go bomorwa Hemore rraagwe Šegeme ka dipapetlana tsa madi di le kgolo, a ba a e naya Josefa go nna boswa. ₃₃Le Eleasare morwa Arone, e rile a swa, ba mo fitlha mo motseng wa Gibea wa ga Phinehase morwawe, o a o filweng kwa dithabeng tsa ga Eferaime.