JOŠUA 20

₁Jaanong Morena a bua le Jošua a re: ₂“Bolelela Baiseraele o re: ‘Supang metse ya botshabelo mo go lona e ke buileng le lona ka ga yona ka Moše ₃gore yo o bolaileng motho ka go fosa, e se ka bomo, a tle a tshabele teng; metse eo e tla nna botshabelo jwa lona go tshaba mmusolosi wa madi. ₄Jaanong yo o tshabelang kwa go mongwe wa metse eo a a eme fa mojakong wa kgoro ya motse, a bolele kgang ya gagwe mo ditsebeng tsa bagolo ba motse oo, mme a ba mo tsholele kwa go bone mo motseng, ba mo nee manno gore a nne nabo. ₅Mme e re fa mmusolosi wa madi a mo latelela, a ba se ka ba neela mmolai mo diatleng tsa gagwe; gonne o bolaile mongwe ka ene ka go sa itse, o ne a sa mo tlhoa. ₆Jaanong a a nne mo motseng oo go ya a be a eme fa pele ga phuthego go sekisiwa; go ya moperesiti yo mogolo yo o tla bong a le teng ka sebaka seo a be a swe. Ke gona mmolai a ka boelang kwa gae, a tsene mo motseng wa ga gabo le mo lapeng labo mo motseng o o tshabileng mo go ona.’ ”

₇Ke fa ba tlhaola motse wa Keteše kwa Galelea mo dithabeng tsa Nafetale le Šegeme mo dithabeng tsa Eferaime le Khiriathe-Areba o e leng Heberone mo dithabeng tsa Juta. ₈Mme kwa moseja ga Joretane go lebagana le Jerigo kwa botlhabatsatsi ba supa Besere mo nageng mo lebaleng la lotso lwa Rubene le Ramothe kwa Gileate mo nageng ya lotso lwa Gate le Golane kwa Basane mo nageng ya lotso lwa Manase. ₉Ke yona metse e e beetsweng Baiseraele botlhe le baeng ba ba nnang mo gare ga bone gore mongwe le mongwe yo o bolaileng motho a sa ikaelela a tshabele teng, mme a se ka a swa ka seatla sa mmusolosi wa madi, a ise a eme fa pele ga phuthego.