JOBE 9

₂“Ke nnete.

Ke a itse gore go ntse jalo.

Motho o ka nna jang mosiami

fa pele ga Modimo?

₃Fa a rata go ganetsanya naô,

a ka palelwa le ke go o araba

potso e le nngwe fela

mo go di le sekete.

₄Modimo o pelo-e-botlhale,

o thata nonofong.

Ke mang yo o kileng a o ganetsa,

a se ka a bona petso?

₅Dithaba o a di sutisa,

go sa lemogiwe;

o di ribegetsa ka bogale jwa ona.

₆Lefatshe o a le roromisa,

le tswe mo felong ga lone;

maotwana a lone a be a reketle.

₇Letsatsi o a le laela,

mme le se ke le tlhabe;

dinaledi o a di bipa,

di se ke di bonale.

₈Legodimo o le tsharolola

o le osi,

o gate mo godimo ga dintelo

tsa lewatle.

₉O dirile dinaledi

tsa ‘Bere e kgolo’

le tsa ‘Dikolobe’ le tsa ‘Selemela’

le tsa ‘Sefapaano’

kwa ntlheng ya borwa.

₁₀O dira tse dikgolo

tse di se nang botlhotlhomiso

le dikgakgamatso

tse di se nang palo.

₁₁Bonang! O a mpheta,

ke sa o bone;

o a tlhaga, ke sa o lemoge.

₁₂Bonang, fa o amoga,

o ka thibelwa ke mang?

Ke mang yo o ka o botsang

a re:

‘O dira eng?’

₁₃Modimo ga o buse

bogale jwa ona;

bathusi ba kgogela tlholegong

ba ne ba o ikokobeletsa.

₁₄Jaanong nna ke mang

yo nka o fetolang?

Nka tlhopha jang

mafoko a a o tshwanetseng?

₁₅Le fa nka bo ke le yo o siameng,

ga ke na go o araba.

Ke na le go kopa bopelotlhomogi

mo go Moatlhodi wa me.

₁₆Fa ke o bitsa, o sa nkarabe,

ga ke dumele gore o tla reetsa

lentswe la me.

₁₇Kana o ka mpšhwetla ka ledimo,

wa ntsifatsa dintho tsa me

ka bomo.

₁₈Ga o ke o mpha nako

ya go ka busa mowa,

mme o nkgorisa matlhoko

a a galakang.

₁₉Fa go lebilwe thata

ya yo o tiileng,

ona o na nayo.

Fa go lebilwe tshiamo,

ke mang

yo o ka biletsang ona tshekong?

₂₀Le fa nka bo ke le yo o siameng,

molomo wa me

o ka bo o nkatlhola

ke le moikepi;

le fa ke se na molato,

ona o ka mpona molato.

₂₁Ga ke na molato!

Mme ga ke tlhole ke ikitse.

Bophelo jwa me ke a bo nyatsa.

₂₂Go tshwana fela!

Ke ka moo ke reng:

Ona o fedisa mosiami

jaaka moikepi.

₂₃Fa kotlo ya Modimo

e bolaya ka tshoganyetso,

o tshege tsholofologo

ya ba ba se nang molato.

₂₄Lefatshe o le neetse mo diatleng

tsa moikepi;

o bipa difatlhego

tsa baatlhodi ba lone.

Fa e se ona, go dira mang?

₂₅Malatsi a me a fetile ka lobelo

lwa go sia motabogi;

a tshabile a ise a bone

tse di molemo.

₂₆A ile ka bobebe

jwa mekoro ya lotlhaka

jaaka fa lenong

le fologela kwa dijong.

₂₇Fa nka re:

‘A nke ke lebale selelo sa me,

ke fetoge sefatlhego

se se tlhontseng,

e nne se se thabileng;’

₂₈ke gona ke tshogang

matlhoko a me otlhe.

Ke a itse gore ga o nke o nkaya

yo o se nang molato.

₂₉Ke tshwanetse

ka bo ke le molato.

Ke itapisa felafela

ka lebaka la eng?

₃₀Le fa ke le yo o tlhapang

ka semathana;

le fa ke tlhapa diatla ka molora:

₃₁Wena o tla ntatlhela seretseng

gore ke tene diaparo tsa me.

₃₂Gonne ona ga se motho ka nna

yo nka mo fetolang,

yo nka yang nae kwa tshekong.

₃₃Ga go motsereganyi

fa gare ga rona

yo o ka bayang seatla sa gagwe

mo go ona le mo go nna.

₃₄A o tlose thupa ya ona

mo go nna!

Theregiso ya ona

a e se ka ya ntshosa!

₃₅Foo nka bo ke bua, ke sa o boife;

kana maikutlo a me

a tletse poifo.