JOBE 4

₂“A fa motho a leka

go bua le wena,

o tla kgopisega?

Fela ke mang yo o ka kgonang

go ithiba go bua?

₃Kana ke wena

o rutileng ba bantsi,

wa tiisa diatla tse di repileng.

₄Yo o kgopiwang,

mafoko a gago a mo tsositse,

wa nonotsha mangole

a a kgwetlhang.

₅Mme fa jaanong di wela wena,

o nyema moko;

fa di ama wena, o a tshoga.

₆Poifo-Modimo ya gago

a ga o e ikanye?

Tsamao ya gago e e siameng

a ga o e solofele?

₇A ko o akanye: Ke mang yo

o latlhegileng a se na molato?

Ke bafe basiami

ba ba nyeleditsweng?

₈Ka fa ke bonyeng ka teng:

Ba ba lemang boikepo

le ba ba jwalang tatlhego

ba roba tsona tseo.

₉Ba latlhega ka pudulo

ya Modimo;

ba felelela ka phefo

ya bogale jwa ona.

₁₀Go duma ga tau le go rora

ga tawana go a khutla;

meno a ditawana a robegile.

₁₁Tau e kgolo e a swa,

fa e se na thopo;

bana ba tau e namagadi

ba a phatlalala.

₁₂Lefoko le ntletse sephiring;

tsebe ya me ya utlwa

go sebasebelwa ga lone.

₁₃E rile ke akanya

dipono tsa bosigo,

fa batho ba tshwerwe ke boroko

jo bogolo,

₁₄therego ya nkwela le go tetesela,

ya roromisa marapo a me otlhe.

₁₅Ke fa mowa o feta fa pele ga me,

mmele wa me wa tlhonya.

₁₆Wa ba wa ema,

ke sa lemoge ponalo ya ona,

mme e le sebopego sa mongwe

yo o fa pele ga me;

ka utlwa go sebaseba ga lentswe

le le reng:

₁₇‘A motho o siame

fa pele ga Modimo?

Gongwe a monna o itshekile

fa pele ga Mmopi wa gagwe?

₁₈Bonang, ga o ikanye

batlhanka ba ona;

baengele ba ona

o ba tshwaya phoso.

₁₉Bogolo jang bone ba ba agileng

mo matlong a letsopa,

ba tlholego ya bone

e leng mo loroleng,

ba ba pšhwetlwang

jaaka motoutwana?

₂₀Le tlhaba ba le gona,

le phirima ba remagantswe;

ba latlhega ka bosakhutleng,

ba sa tlhokomelwe ke ope.

₂₁A ga ke re, fa dimapo

tsa tente ya bone di somolwa,

ba a swa, ba se na botlhale?’