JOBE 27

₂“Ka bophelo jwa Modimo

o o nkamogileng

tshwanelo ya me!

Le ka Mong-wa-thata-yotlhe

yo o njesitseng tse di galakang!

₃Ruri, fa bophelo jwa me bo sa

ntse bo itekanetse mo go nna,

fa mowa wa Modimo

o le mo dinkong tsa me

₄molomo wa me ga o kitla o bua

tsa tshiamololo;

loleme lwa me ga

lo kitla lo bolela tsa tsietso.

₅A go nne kgakala le nna

go ka dumela

gore lona lo mo nneteng;

ke tla swa

ke ise ke ipone molato.

₆Ke itshwarelela mo tshiamong

ya me, ga nkitla ke e lesa;

pelo ya me ga e nkgalemele

ka letsatsi lepe la me.

₇Mmaba wa me o tshwanetse

go nna jaaka moikepi;

yo o ntsogelang o tshwanetse

go nna jaaka mosiamolodi.

₈Gonne moikepi o solofela eng,

fa Modimo o kgaola le go tlosa

mowa wa gagwe?

₉A Modimo o tla utlwa

go goa ga gagwe,

fa tlalelo e mo wela?

₁₀A ene o ka itumelela

Mong-wa-thata-yotlhe?

A o ka tlhaeletsa Modimo

ka metlha yotlhe?

₁₁Ke tla lo ruta

ka ga letsogo la Modimo;

tse di mo go Mong-wa-thata-yotlhe

ga nkitla ke di loba.

₁₂Bonang,

lona lotlhe lo di bonye ka nosi.

Jaanong ke eng fa lo bua dipuo

tsa boithamako fela?

₁₃Kabelo ya motho

wa moikepi mo Modimong ke e;

boswa jwa morena yo o pelompe

jo o tla bo amogelang mo go

Mong-wa-thata-yotlhe ke bo:

₁₄Fa bana ba gagwe ba ata,

ba atela tšhaka fela

bana ba bana ba gagwe

ga ba kitla ba kgora bogobe.

₁₅Masalela a gagwe

a tla fitlhwa ke leroborobo;

batlholagadi ba motse wa gagwe

ga ba kitla ba a lelela.

₁₆Le fa a kgobokanya selefera

jaaka lerole,

a itshegela diaparo tse dintsi

jaaka motlhaba,

₁₇o tla di itshegela,

mme di tla aparwa ke mosiami;

yo o se nang molato

o tla abelwa selefera.

₁₈O agile ntlo ya gagwe

jaaka segokgo

le jaaka mokgoro

o o dirwang ke modisa.

₁₉O ya go robala a humile,

mme a se ke a boelele gape:

E re a budulola matlho,

a fitlhele a se na sepe.

₂₀Ditherego di mo wela

jaaka morwalela;

ledimo le mo tsaya bosigo.

₂₁Phefo ya botlhabatsatsi

e mo kuke, a tloge;

e mo gogole mo felong ga gagwe.

₂₂Modimo o mo konopa

o sa rekegele;

o ntse a tshaba seatla sa ona.

₂₃Batho ba tla mo opela diatla;

ba mo leletsa molodi,

fa a tswa mo felong ga gagwe.