Lokwalo lo Jeremia o lo kwaletseng batshwarwi ba ba kwa Babele
1Ke ona mafoko a lokwalo lo moporofeti Jeremia o lo kwaletseng masalela a bagolo ba batshwarwi le baperesiti le baporofeti le morafe otlhe go tswa Jerusalema, ba Nebukatenesare a ba tlositseng mo Jerusalema, a ba isa kwa Babele mo botshwarong. – 2Fa kgosi Jegonya le mmaagwe kgosi le badiredi ba lapa la kgosi le dikgosana tsa Juta le Jerusalema le babetli le bathudi ba sena go tlosiwa mo Jerusalema. – 3A lo romela kwa Babele ka Eleasa, morwa Safane, le Gemaria, morwa Hilekia, ba Setekia, kgosi ya Juta, o ba romileng kwa go Nebukatenesare, kgosi ya Babele, lo na le mafoko a a reng:
4“Morena wa masomosomo, Modimo wa Iseraele, o raya batshwarwi botlhe ba o ba ntshitseng mo Jerusalema, a ba isa kwa Babele mo botshwarong, a re: 5‘Agang matlo, lo nne mo go ona! Lemang masimo, lo je maungo a ona! 6Tsayang basadi, lo tsale bana ba basimane le ba basetsana. Le gona lo tseele bomorwaa-lona basadi mme a bomorwadia-lona ba nyalwe ke banna gore ba belege bana ba basimane le ba basetsana gore lo ntsifale teng koo, mme lo se ka lwa ngotlega. 7Batlang kagiso ya lefatshe le ke lo isitseng kwa go lone mo botshwarong, lo le rapelele Morena. Gonne kagiso ya lone e bile ke kagiso ya lona.’ 8Gonne Morena wa masomosomo, Modimo wa Iseraele, o bua jaana a re: ‘A baporofeti ba lona ba ba mo go lona le baitseanape ba lona ba se ka ba lo tsietsa. Le gona se dumeleng ditoro tsa bone tse ba di lorang. 9Gonne ba lo rerela mo leineng la me ka maaka; ga ke a ba roma, go bua Morena.’
10“Gonne Morena o bua jaana a re: ‘E tla re dinyaga di le 70 di sena go feta, lo ntse lo le kwa Babele, ke lo gopole, ke dirafatse lefoko le le molemo la me mo go lona le le reng: Ke tla lo busetsa gape mo felong fano. 11Gonne ke itse megopolo e ke e gopolang ka ga lona; ke megopolo ya kagiso, e seng ya bosula, gore ke lo nee tse di tlang, tse lo ka di solofelang.’ Morena a re jalo. 12‘Mme lo tla mpitsa, lo bo lo nthapela, mme ke tla lo utlwa. 13Fa lo mpatla, lo tla mpona; ee, fa lo mpatla ka pelo yotlhe, 14ke tla bonwa ke lona,’ go bua Morena. ‘Le gona ke tla fetola tatlhego ya lona, ke lo phutha mo ditšhabeng tsotlhe le mo mafelong otlhe kwa ke lo leleketseng teng,’ go bua Morena; ‘ke tla lo busetsa mo felong fa ke lo tlositseng teng, ka lo isa mo botshwarong.’
15“Fa lona lo re: ‘Morena o re tsoseditse baporofeti mono Babele.’ – 16Nnyaya! Morena o bua jaana ka ga kgosi e e ntseng mo sedulong sa bogosi sa ga Dafita le ka ga batho botlhe ba ba setseng mo motseng o, ka ga ba ga lona ba ba sa isiwang le lona mo botshwarong; 17ee, Morena wa masomosomo o bua jaana a re: ‘Itseng gore ke tla ba romela tšhaka le tlala le leroborobo, ke ba dira jaaka difeie tse di bodileng tse di sa jeweng ke motho, ka di le dimpe thata. 18Ke tla ba latelela ka tšhaka le ka tlala le ka leroborobo, ke ba dira theregiso ya magosi otlhe a lefatshe, le thogako le setshosa le tshotlo le kgobo mo ditšhabeng tsotlhe kwa ke ba lelekelang teng. 19Ke ka gore ga ba a ka ba utlwa mafoko a me,’ go bua Morena, ‘a ke a ba rometseng ka baporofeti, batlhanka ba me ka tlhoafalo, mme ba ganne go utlwa,’ go bua Morena. 20Mme lona batshwarwi botlhe ba ke lo tlositseng mo Jerusalema, ka lo isa kwa Babele, utlwang Lefoko la Morena! –
21“Morena wa masomosomo, Modimo wa Iseraele, o bua jaana ka ga Ahabe, morwa Kolaya, le ka ga Setekia, morwa Maaseya, ba ba lo rerelang maaka mo leineng la me, a re: ‘Bonang, ke tla ba neela mo diatleng tsa ga Nebukatenesare, kgosi ya Babele; o tla ba bolaya fa pele ga matlho a lona. 22Mme batshwarwi botlhe ba Juta ba ba kwa Babele ba tla dira thogako ka bona ba re: A Morena a go direle jaaka Setekia le Ahabe, ba kgosi ya Babele e ba besitseng mo molelong. 23Ke ka gore ba dirile tsa botlhabisa-ditlhong mo Iseraeleng, ba senya nyalo le basadi ba bangwe-ka-bone, ba bua mafoko a maaka mo leineng la me, a ke sa a ba laelang. Dilo tseo ke a di itse, ke mosupi wa tsona,’ go bua Morena.
Lokwalo lo lo tswang kwa go Semaya
24“Mme Semaya wa kwa Nehelame ene o mo ree o re: 25‘Morena wa masomosomo, Modimo wa Iseraele, o bua jaana a re: E re ka o rometse lokwalo ka bogagago kwa bathong botlhe ba ba mo Jerusalema, le kwa go moperesiti Sefanya, morwa Maaseya, le kwa go baperesiti botlhe wa re: 26Morena o go dirile moperesiti mo boemong jwa moperesiti Joyata gore o nne mookamedi mo Ntlong ya Morena wa monna mongwe le mongwe yo o tsenwang, yo o itirang moporofeti gore o mo golegele mo dikoteng le ka mhiri wa molala. 27Mme jaanong ke ka ntlhaang fa o sa thibela Jeremia wa kwa Anathothe yo o itirang moporofeti mo go lona? 28Kana ke ka moo fa a re rometse mafoko kwano Babele a a reng: Botshwaro e tla nna jo boleele. Agang matlo, lo nne mo go ona! Lemang masimo, lo je maungo a ona.’ ”
29Mme moperesiti Sefanya o ne a buisa lokwalo loo mo ditsebeng tsa moporofeti Jeremia. 30Lefoko la Morena la ba la tla kwa go Jeremia la re: 31“Romela batshwarwi botlhe mafoko a a reng: ‘Morena o bua jaana ka ga Semaya wa kwa Nehelame a re: E re ka Semaya a lo rerela, le fa ke sa mo roma, a lo ruta go ikanya maaka,’ 32ke ka moo Morena a buang jaana a re: ‘Bonang, ke tla otla Semaya wa kwa Nehelame le losika lwa gagwe. Ga a kitla a nna le ope yo o agang mo gare ga morafe o; ga a nke a bona tse di molemo tse ke tla di direlang morafe wa me, go bua Morena. Gonne o tsogetse Morena ka go rera boikepo.’ ”
