JEREMIA 21

₁Lefoko le le tsileng kwa go Jeremia le tswa mo Moreneng, motlhang kgosi Setekia a romang Phašure, morwa Malekhia, le moperesiti Sefanya, morwa Maaseya, kwa go ene a re: ₂“A ko o re boletse Morena. Gonne Nebukatenesare, kgosi ya Babele, o tlhabana le rona. A ka gongwe Morena o tla re direla ka fa ditirong tse di gakgamatsang tsa gagwe gore a re tlogele?”

₃Ke fa Jeremia a ba raya a re: “Fetolang Setekia jaana lo re: ₄‘Morena, Modimo wa Iseraele, o buile jaana a re: Bonang, dibolai tse lo di tshotseng tse lo tlhabanang ka tsona le kgosi ya Babele le Bakalatea ba ba lo dikaganyetsang ka ntwa, ke tla di busa ka kwa ntle ga lobota, ke di phuthela mo teng ga motse o. ₅Mme nna ka nosi ke tla lwa le lona ka seatla se se otlologileng le ka letsogo le le thata le ka bogale jo bo tukang, ke gaketse thata. ₆Mme ke tla bolaya baagi ba motse o, e leng batho le diruiwa, gore ba swe ka leroborobo.’ ” ₇Gape Morena a re: “ ‘Setekia, kgosi ya Juta, le batlhanka ba gagwe, le morafe – e bong botlhe ba ba phologileng mo motseng o, ba ba sa bolawang ke leroborobo gongwe tšhaka gongwe tlala – morago ga moo ke tla ba neela mo diatleng tsa ga Nebukatenesare, kgosi ya Babele, le mo diatleng tsa baba ba bona le mo diatleng tsa ba ba ratang go ba bolaya; mme ene o tla ba itaya ka tšhaka e e bogale, a sa ba utlwele botlhoko, a sa ba rekegele, a sa ba tlhomogele pelo.’

₈“Mme o ree morafe o ò re: ‘Morena o bua jaana a re: Bonang, ke baya tsela ya bophelo le tsela ya loso fa pele ga lona. ₉Yo o salang mo motseng o, o tla swa ka tšhaka gongwe ka tlala gongwe ka leroborobo; mme yo o tswelang kwa go Bakalatea ba ba lo dikanyetsang ka ntwa, a ineela mo go bona, ene o tla phela, a ithopela bophelo. ₁₀Gonne ke lebisitse sefatlhego sa me mo motseng o, go o isa mo tatlhegong, e seng mo kagisong. Morena o buile jalo. O tla neelwa mo diatleng tsa kgosi ya Babele gore e o fise ka molelo.’

₁₁“Gape o ree ba lapa la kgosi ya Juta o re: ‘Utlwang Lefoko la Morena! ₁₂Lona ba ntlo ya ga Dafita! Morena a re: Atlholang ka tshiamo mo mosong mongwe le mongwe, lo pholose yo o thukhuthilweng mo diatleng tsa mogateledi, e se re gongwe bogale jwa me jwa gakala jaaka molelo, jwa tuka mo go se nang ope yo o ka bo timang ka ntlha ya ditiro tse di bosula tsa lona. ₁₃Bona, ke tla go tlhasela, wena yo o agileng mo mogorogorong; wena lefika leboeng. Morena o raya lona ba lo reng: Ke mang yo o tla fologang, a re lwantsha? Ke mang yo o ka tsenang mo meagong ya rona e e femetsweng? ₁₄Ke tla lo betsa ka fa maungong a ditiro tsa lona. Morena o buile jalo. Ke tla tshuba molelo mo sekgweng sa gagwe o o tla nyeletsang tsotlhe tse di mo tikologong ya gagwe.’ ”