JUDITHE 3

₁Ke gone ka moo ba neng ba romela barongwa kwa go ene go ya go kopa kagiso le go re,

₂“Rona batlhanka ba Kgosi e kgolo Nebukatenesare, re patlama fa pele ga gago ka boikokobetso. Re tšhware fela jaaka wena O bona go tšhwanela. ₃Meraka ya rona ya dikgomo, lefatshe la rona lotlhe, masimo a rona otlhe a korong, matsomane a rona le metlhape, maraka a dinku mo mathibelelong a rona, tsotlhe tse di mo diatleng tsa gago. Dira ka tsone ka mo O ratang ka teng. ₄Metse ya rona le yone le baagi ba yone ke batlhanka ba gago; tla O dire ka bone mo O bonang go go itumedisang ka teng.”

₅Banna ba, ba ne ba tla kwa go Holofernese mme ba mmolelela molaetsa fela jaaka o setse o boletšwe fa godimo. ₆Ke fa a fologela kwa lefatsheng le le ikamileng ka lewatle a na le mophato wa gagwe wa batlhabani, a bo a feta a thibelela batlhabanibalebeledi mo metseng yotlhe ya phemelo, a tlhaola banna ba dikwankwetla mo go yone gore e nne bathusi ba gagwe. ₇Batho ba metse e le ba metse e mengwe yotlhe e e ba dikologileng ba ne ba mo amogela ka mabogo a mabedi le ka pelo e tšhweu, ba apere melogo ya dithunya, ba bina go bidiwa meropa. ₈Le fa go ntse jalo, o ne a senyaka mafelo a bone a a boitshepo, a kgaola ditlhare tse di boitshepo tsa bone, e le gore o diragatsa thomo ya gagwe ya gore a thubake medingwana yotlhe ya mafelo ao, a bo a pateletse ditšhaba go obamela Nebukatenesare fela, a ntse a pateletsa batho ba dipuo tsotlhe le ba merafe go mmitsa modimo.

₉Ka mokgwa oo, o ne a fitlha mo molelwaneng wa Esederaelone, gautšwane le Dothane, e leng motse o o lebaganyeng le mokokotlo o mogolo wa Juta. ₁₀A thibelela fa gare ga Geba le Sithopolise mme a nna foo kgwedi e e tletseng yotlhe go kgobokanyetsa mophato wa gagwe mofago.