1Ke fa a laela gore a tsenngwe mo dijo tsa gagwe tse di neng di tsholelwa mo dikotleleng tsa selefera di neng di setse di le gone, mme a bolela gore a tsholelwe dijo tsa gagwe a bo a sielwe veini ya gagwe. 2Fela Judithe a re, “Ke ne ke ka se ka ka rata go ja dijo tse, e se re kgotsa ka dira molato mongwe. Tse ke tsileng natso di tlaa ntekana.”
3Holofernese a bo a mo raya a re, “Fa mofago wa gago o ka fela, re tlaa ya go go tseela kae o mongwe o o tšhwanang nao? Gonne ga go na ope wa batho ba ga eno yo o nnang mono le rona.”
4Judithe a araba a re, “Morena wa me, ka rre, ke a go bolelela, Morena o tlaa bo a ntirisitse go diragatsa se a se ikaeletseng, pele ga mohula wa gago a fetsa mofago o.”
5Ke fa masole-bathusi ba ga Holofernese ba mo tsaya ba mo isa kwa tanteng mo a neng a robala teng go fitlhelela bosigo-gare. Mme e rile pelenyana ga mahube a moso a tsoga. 6O ne a setse a kopile Holofernese a rile, “A morena wa me jaanong a laele gore mohula wa gago a dumelelwe go tšwa go ya go rapela,” 7mme Holofernese a laela masolebalebeledi a gagwe gore a se ka a mo thibela. O ne a nna mo bothibelelong malatsi a le 3. O ne a tšwa bosigo bongwe le bongwe a ya kwa kgophung ya Bethulia, a feta a tlhapa mo motsweding o o neng o le mo bothibelelong, 8e re a tlhatloga mo gape, a rapele Morena Modimo wa Iseraele gore a mo kaele tsela mo maikaelelong a gagwe a go namola bana ba batho ba gagwe. 9Mme e ne e tle e re a sena go iphepafatsa a boe mme a fete a nne mo tanteng ya gagwe go fitlhelela dijo tsa gagwe di tsisiwa kwa go ene maitsiboa.
Judithe kwa Moletlong wa Dijo wa ga Holofernese
10E rile ka letsatsi la bone Holofernese a dira moletlo wa dijo, a laletsa batlhanka ba gagwe fela, mme a se ka a laletsa ope wa ba lekgotla ba bangwe ba gagwe. 11A raya Bagoase, kala ya kgosi yo o neng a tlhokomela tsa ntlo ya gagwe, “A ko O ye go leka go kgorola mosadi yole wa Mohebera yo O mo lebelelang gore a tle go ja le go nwa le rona. 12Fa re ka tlogela mosadi yo o ntseng jaana a tsamaya re sa mo itse botoka re tlaa itlhabisa ditlhong. Re tlaa itshegisa batho fa re sa mo hepise!”
13Ke fa Bagoase a tšwa fa go Holofernese a ya go bona Judithe. A feta a mmotsa a re, “A kgarebane e ntlentle e e ne e ka tla kwa moreneng wa me? O tlaa nna mo setulong sa tlotlo go lebagana nae, a nwa veini ya boitumelo le rona mme o tlaa tlhola a tšhwerwe fela jaaka mongwe wa basadi ba Maasiria ba ba dirang mo tlung ya segosi ya ga Nebukatenesare.”
14Judithe a fetola a re, “Ke mang nna yo ke ka ganang morena wa me? Ga nkake ka bo ka diega go dira sengwe le sengwe se a se batlang, mme go dira jalo e tlaa nna boitumelo mo go nna go fitlhelela letsatsi la loso lwa me.”
15Ya re nako e a ema a apara mosese wa gagwe le mekgabo yotlhe ya gagwe ya sesadi. Mohula wa gagwe a mo etelela pele, mme ya re mo bodilong fa pele ga ga Holofernese, a feta a mo alela leloba le Bagoase a neng a le file Judithe gore a nne a sekame mo go lone malatsi otlhe fa a ja.
16Judithe a tsena mme a nna mo mannong a gagwe. Ya re Holofernese a mmona a garoga pelo; moya wa gagwe le one wa kgoberega. A eletsa thata fela mo go mašwe go robala nae, mme tota o ne a sale a ntse a emetse lobaka lo lo siameng lwa go mo hepisa fa e sale letsatsi la ntlha a mmona. 17Holofernese a nna a re, “O nwe, O itumele le rona!”
18Judithe ene a re, “Ke itumelela go dira jalo, Morena, gonne fa e sale ke tsalwa ga ke ise ke ke ke utlwe gore botshelo jwa me bo na le mosola go feta jaaka ke utlwa gompieno.” 19A tsaya se mohula wa gagwe a neng a se baakantse, mme a ja a nwa a lebaganye nae. 20Holofernese o ne a tserwe maikutlo ke ene mo e leng gore o ne a nwa go feta jaaka a ne a tle a nwe mo malatsing a mangwe a botshelo jwa gagwe.
