BAATLHODI 16

₁Simesone o kile a ya kwa Gasa, a bona mosadi wa seaka teng, a tsena kwa go ene. ₂Ya re ba Gasa ba begelwa go twe: “Simesone o tsile mono,” ba mo dikanyetsa, ba mo lalela bosigo jotlhe kwa kgorong ya motse; ba lala ba didimetse fela ba re: “E tla re mo mosong boo sa, re mmolae.” ₃Mme Simesone a robala fela go fitlha bosigogare; bosigogare a tsoga, a tshwara ditswalo tsa kgoro ya motse le disana tsoo pedi tsa tsona, a di somola mmogo le mephakarego, a di sikara magetleng, a di isa kwa setlhoeng sa thaba e e lebaganyeng le Heberone.

₄Morago ga moo a rata mosadi mo molapong wa Soreke; leina la gagwe e ne e le Delila. ₅Dikgosana tsa Bafelesita tsa tla kwa go ene, tsa mo raya tsa re: “Mo tlakise gore o lemoge kwa thata e kgolo ya gagwe e tswang teng le ka fa re ka mo kgonang ka teng gore re tle re mo golege, re mo fenye. Foo mongwe le mongwe wa rona o tla go naya diselefera di le 1 100.”

₆Ke fa Delila a mo raya a re: “A ko o mpolele gore thata ya gago e kgolo ka eng? O ka golegwa ka eng go go fenya?”

₇Simesone a mo raya a re: “Fa ba ka mpofa ka mesifa e supa e mešwa e e iseng e omelele, ke tla nna bokoa, ke tshwana le batho botlhe.”

₈Dikgosana tsa Bafelesita tsa mo tlisetsa mesifa e supa e mešwa e e iseng e omelele; a mo golega ka yona. ₉Jaanong ya re ba ntse ba mo laletse mo ntlwaneng, a mo raya a re: “Simesone, Bafelesita ba a go wela!” Ke fa a kgaola mesifa jaaka go kgaolwa megala ya lelodi, fa e utlwa molelo. Mme sephiri sa thata ya gagwe sa se ka sa itsiwe.

₁₀Ke fa Delila a raya Simesone a re: “Bona, o ntsieditse, o mpoleletse maaka! Jaanong a ko o ntshebele gore o ka golegwa ka eng?”

₁₁A mo araba a re: “Fa ba ka mpofa ka megala e mešwa e go iseng go dirwe tiro epe ka yona, ke tla nna bokoa, ke tshwana le batho botlhe.”

₁₂Delila a tsaya megala a mešwa, a mo golega ka yona. A ba a mo raya a re: “Simesone, Bafelesita ba a go wela!” Ba ntse ba mo laletse mo ntlwaneng. Mme a di kgaola jaaka ditlhale, a bofologa mabogo.

₁₃Ke fa Delila a raya Simesone a re: “Go fitlha jaanong o ntsieditse, o mpoleletse maaka. Mpolelele tlhe gore o ka golegwa ka eng?” A mo araba a re: “Fa o ka loga makaodi a supa a tlhogo ya me mmogo le ditlhale tse di logwang, wa a kokotela ka lomapo mo loboteng, foo ke tla nna bokoa, ke tshwana le batho botlhe.”

₁₄Jaanong a mo robatsa, a loga makaodi a supa a tlhogo ya gagwe mmogo le ditlhale tse di logwang, a a kokotela ka lomapo; a ba a mo raya a re: “Simesone, Bafelesita ba a go wela!” Mme a tsoga borokong jwa gagwe, a somola lomapo mmogo le lesela le le logilweng.

₁₅Ke fa Delila a mo raya a re: “O ka bua jang o a re, o a nthata, etswe pelo ya gago e sa re sepe ka nna. E setse e le gararo o ntse o ntsietsa, o sa mpolele gore thata ya gago e kgolo ka eng.” ₁₆Mme ya re ka a mo tshwenya ka mafoko a gagwe ka malatsi aotlhe, a mo emeletse, a fela pelo, mo e keteng a ka swa, ₁₇a mmolelela tsotlhe tse di mo pelong ya gagwe, a mo raya a re: “Logare ga lo ise lo tle mo tlhogong ya me, gonne ke moikiledi wa Modimo go tswa botsalong jwa me. Fa nka beolwa, thata ya me e ka ntlogela; ke ka nna bokoa, ke tshwana le batho botlhe.”

₁₈Ya re Delila a bona, fa a mmoleletse sephiri sa pelo ya gagwe sotlhe, a roma a bitsa dikgosana tsa Bafelesita a re: “Tlayang jaanong, gonne o mpoleletse sephiri sa pelo ya gagwe sotlhe.” Dikgosana tsa Bafelesita tsa tla kwa go ene, di tshotse diselefera. ₁₉Delila a mo robatsa a mo farile, a ba a bitsa monna yo mongwe, mme a beola makaodi a supa a tlhogo ya gagwe. Ke fa a simolola go koafala, mme thata ya gagwe ya mo tlogela. ₂₀Ke fa Delila a re: “Simesone, Bafelesita ba a go wela!” Mme ya re a thanya borokong jwa gagwe, a ithaya a re: “Ke tla tswa jaaka gangwe le gape, ke ikgolola,” mme a sa itse, fa Morena a mo tlogetse. ₂₁Mme Bafelesita ba mo tshwara, ba mo gonya matlho, ba mo isa kwa Gasa, ba mo golega ka dikeetane tse pedi tsa kgotlho, mme tiro ya gagwe ya nna go sila mo ntlong ya kgolegelo. ₂₂Mme ya re a sena go beolwa, moriri wa tlhogo ya gagwe wa tlhoga gape.

₂₃Jaanong tsatsi le lengwe dikgosana tsa Bafelesita tsa kgobokana go tlhabela Dagone, modimo wa bone, ditlhabelo tse dikgolo le go itumela. Ke fa ba opela ba re: “Modimo wa rona o neetse Simesone, mmaba wa rona, mo diatleng tsa rona!” ₂₄Ya re batho ba mmona, ba boka modimo wa bone ba re: “Modimo wa rona o neetse Simesone, mmaba wa rona, mo diatleng tsa rona; ke ene yo o sentseng lefatshe la rona, a bolaya ba bantsi ba rona!” ₂₅Mme ya re dipelo tsa bone di itumela, ba re: “Bitsang Simesone, a tle go re tshamekela.” Ba bitsa Simesone, a tswa mo ntlong ya kgolegelo, a tshameka fa pele ga bone, ba mmeile fa gare ga dipinagare tsa ntlo. ₂₆Mme Simesone a raya mosimane yo o neng a mo tshwere letsogo a re: “Nte ke apaape dipinagare tse di rweleng ntlo gore ke ikaege ka tsona.” ₂₇Kana ntlo e ne e tletse banna le basadi le dikgosana tsotlhe tsa Bafelesita di le teng; le mo godimo ga ntlo go le banna le basadi, e ka nna ba le kete tse tharo, ba ntse ba lebile metshameko ya ga Simesone.

₂₈Mme Simesone a rapela Morena a re: “Morena Modimo, a ko o nkgopole, o ntiise ka nako eno fela, Modimo, gore ke ipusolosetse mo Bafelesiteng ka pusoloso e le nngwe ka ntlha ya matlho a mabedi a me.” ₂₉Ke fa Simesone a tshwara dipinagare tse di rweleng ntlo, a di kgarametsa, nngwe ka le le jang le e nngwe ka la molema. ₃₀Mme Simesone a re: “A ke swe le Bafelesita!” A ba a inama a ntse a kgarametsa ka thata. Ke fa ntlo e wela dikgosana le batho botlhe ba ba mo go yona. Batho ba o ba bolaileng jalo mo losong lwa gagwe ba ne ba feta ba o ba bolaileng mo bophelong jwa gagwe.

₃₁Jaanong ga tla bomorwa-rraagwe le ba kgotla ya ga rraagwe botlhe, ba mo tsaya, ba mo tlosa, ba ya go mo fitlha fa gare ga Sorea le Ešethaole mo mabitleng a ga Manoa rraagwe. O ne a siamiseditse Iseraele dinyaga di le 20.