HOSEA 1

₁Lefoko la Morena le le tsileng kwa go Hosea, morwa Beeri, mo sebakeng sa ga Usia le Jothame le Ahase le Hesekia, dikgosi tsa Juta, le mo sebakeng sa ga Jerobeame morwa Joase, kgosi ya Iseraele.

₂E rile Morena a simolola go bua ka Hosea, a mo raya a re: “Tsamaya o tsee mosadi wa seaka le bana ba seaka; gonne lefatshe le ntse le akafala thata ka go tlogela Morena.”

₃Ke fa a ya a tsaya Gomere, morwadia Dibelaime; Gomere a ithwala, a mo tsholela ngwana wa mosimane. ₄Jaanong Morena a mo raya a re: “Mo tee leina la Iserele, gonne go setse sebaka se sekhutshwane fela, ke tla be ke beletsa melato ya polao ya kwa Iserele mo losikeng lwa ga Jehu, ke fedisa bogosi jwa Baiseraele. ₅Mo motlheng oo ke tla roba bora jwa Iseraele mo lebaleng la Iserele.”

₆Mosadi a ithwala gape, a tshola ngwana wa mosetsana. Morena a mo raya a re: “Mmitse Gaautlwelwa-botlhoko; gonne ga nkitla ke tlhola ke utlwela Baiseraele botlhoko le e seng go ba itshwarela. ₇Bajuta bone ke tla ba utlwela botlhoko, ke ba golola ke le Morena, Modimo wa bone; ga nkitla ke ba pholosa ka bora gongwe ka tšhaka gongwe ka ntwa gongwe ka dipitse, le fa e le ka bapalami ba tsona.”

₈Ya re a sena go kgwisa Gaautlwelwa-botlhoko, a boa a nna moimana gape, a tshola ngwana wa mosimane. ₉Jaanong Morena a re: “Mmitse Gasebame; gonne ga lo batho ba me, le nna ga ke wa lona.”

₁₀Mme palo ya Baiseraele e tla tshwana le ya motlhaba wa lewatle o o sa ka keng wa lekanngwa ka sepe, le e seng go balwa. Mo boemong jwa go bidiwa “Galobame” ba tla bidiwa “bomorwa Modimo o o phelang.” ₁₁Bajuta le Baiseraele ba tla kopana, ba ipeela tlhogo e le nngwe, ba bolola lefatsheng; gonne letsatsi la Iserele le legolo.