GENESI 44

₁Jaanong Josefa a laela mookamedi wa lelapa la gagwe a re: “Tlatsa dikgetse tsa banna bao mabele ka fa ba ka kgonang go belesa ka teng, o tsenye madi a mongwe le mongwe mo molomong wa kgetse ya gagwe. ₂Mme senwelo sa me sa selefera o se tsenye mo molomong wa kgetse ya yo mmotlana mmogo le madi a mabele a gagwe.” A dira ka fa Josefa a mo laetseng ka teng. ₃E rile bosigo bo sena go sa, banna bao ba newa tsela, ba tsamaya ka diesele tsa bone. ₄Ya re ba sena go tswa mo motseng, ba ise ba nne kgakala, Josefa a laela mookamedi wa lelapa la gagwe a re: “Tsamaya, o latelele banna bale, mme kwa o tla ba tshwarang teng, o ba ree o re: ‘Ke ka ntlha ya eng, fa lo leboga molemo ka bosula? Lo utswa senwelo sa me sa selefera? ₅A ga se sona se morena wa me o nwang ka sona, e bile e le taola ya gagwe? Lo dirile bosula thata ka go dira jalo.’ ”

₆Ya re a sena go ba tshwara a bua mafoko ao nabo. ₇Mme ba mo raya ba re: “Ke ka ntlha ya eng, fa morena wa rona a bua mafoko a a ntseng jalo? Go kgakala le batlhanka ba gago go ka dira jalo. ₈Kana madi a re a fitlhetseng mo melomong ya dikgetse tsa rona re a buseditse kwa go wena, re tswa kwa lefatsheng la Kanana! Jaanong re ka utswa jang selefera gongwe gouta mo ntlong ya morena wa gago? ₉Yo se tla fitlhelwang mo go ene gare ga batlhanka ba gago, a a bolawe! Le rona re tla nna batlhanka ba morena wa rona.”

₁₀Ene a re: “Ee, go siame! A go dirwe jaaka lo buile, yo se tla fitlhelwang mo go ene o tla nna motlhanka wa me, mme lona lo tla bo lo se na molato.” ₁₁Ke fa ba itlhaganela, mongwe le mongwe a belegolola kgetse ya gagwe, a ba a e bofolola. ₁₂Mookamedi a fukutsa, a simolola mo go yo mogolo, a khutla mo go yo mmotlana, mme senwelo seo sa fitlhelwa mo kgetseng ya ga Benyamene. ₁₃Ke fa ba ikgagola diaparo, ba belesa diesele tsa bone botlhe, ba boela kwa motseng.

₁₄Juta le bomorwa-rraagwe ba tsena mo ntlong ya ga Josefa – ene a sa ntse a le teng – ba wela fa fatshe fa pele ga gagwe. ₁₅Josefa a ba botsa a re: “Ke tiro e e ntseng jang e lo e dirileng? A ga lo itse gore monna yo o tshwanang le nna o itse dilo ka boitseanape?”

₁₆Juta a re: “Re ka raya morena wa rona ra reng? Re ka bolela eng? Re ka itshiamisa jang? Modimo o bonye molato wa batlhanka ba gago. Bona, re batlhanka ba morena wa rona, rona le ene yo senwelo se fitlhetsweng mo go ene.”

₁₇Mme a fetola a re: “A go nne kgakala le nna go dira jalo. Monna yo go fitlhetsweng senwelo mo go ene, ke ene yo o tla nnang motlhanka wa me. Mme lona boelang gae kwa go rraeno ka kagiso!”

₁₈Ke fa Juta a atamela kwa go ene a re: “Ka thapelo, morena wa me! A ko o letlelele motlhanka wa gago gore a bue lefoko mo ditsebeng tsa morena wa me. A bogale jwa gago bo se ka jwa tukela motlhanka wa gago! Kana o kana ka Farao. ₁₉Morena wa me o kile a botsa batlhanka ba gagwe a re: ‘A lo na le rraeno le monnaa-lona?’ ₂₀Ra araba morena wa rona ra re: ‘Re na le rraetsho yo o tsofetseng le morwawe yo mmotlana yo a mo tsaletsweng a setse a tsofetse. Mogolowe o sule, go setse ene a le esi wa ga mmaagwe, mme rraagwe o a mo rata.’ ₂₁Ke fa o laela rona batlhanka ba gago o re: ‘Yaang go mo tlisa kwano go nna gore ke mmone ka matlho.’ ₂₂Ra fetola morena wa rona ra re: ‘Mosimane yoo ga a ka ke a tlogela rraagwe. Fa a ka mo tlogela, rraagwe a ka swa.’ ₂₃Ke fa o raya batlhanka ba gago o re: ‘Fa monnaa-lona a sa tle le lona, ga lo kitla lo bona sefatlhego sa me gape.’

₂₄“Ya re re sena go boela kwa go rraetsho, motlhanka wa gago, ra mmolelela mafoko a morena wa rona. ₂₅Ya re morago ga malatsi rraetsho a re: ‘Tsamayang gape lo ye go re rekela dijonyana.’ ₂₆Ra fetola ra re: ‘Ga re ka ke ra ya teng. Re ka ya fela, fa monnaa-rona a na le rona. Gonne ga re kitla re bona sefatlhego sa monna yole, fa monnaa-rona a se na le rona.’ ₂₇Ke fa motlhanka wa gago, rraetsho, a re raya a re: ‘Lo a itse ka losi, fa mosadi wa me a ntsaletse basimane ba le babedi fela. ₂₈Yo mongwe o sa le a tsamaya, ke bona gore o gagogantswe ke dibata. Ga ke ise ke be ke mmone go fitlhelela jaanong. ₂₉Jaanong fa lo ka tsaya le ene yoo, lwa mo tlosa mo go nna, mme a welwa ke kotsi, lo tla folosetsa moriri o mobududu wa me kwa felong ga baswi ka botlhoko.’

₃₀“Jaanong fa nka fitlha kwa go rre motlhanka wa gago, mme mosimane yo a se na le rona, yo pelo ya ga rre e mo kgomaretseng; ₃₁fa a bona mosimane a se yo, o tla swa. Foo batlhanka ba gago ba tla folosetsa moriri o mobududu wa ga rraetsho, motlhanka wa gago, kwa felong ga baswi ka botlhoko. ₃₂Gonne nna motlhanka wa gago ke neetswe mosimane yo ke rre ke sena go ipofa go nna moemedi wa gagwe ka re: ‘Fa ke sa boele nae kwa go wena, ke tla nna molato fa pele ga rre ka malatsi otlhe.’ ₃₃A bogolo go sale motlhanka wa gago mo boemong jwa lekau, ke nne motlhanka wa morena wa me; mme a lekau le boele kwa gae le bomogoloa-lone. ₃₄Gonne nka boela jang kwa go rre, ke se na le lekau? Nka palelwa ke go bona botlhoko jo bo tla welang mo go rre.”