ESERA 5

₁Mme baporofeti Hakai le Sagaria morwa Ito ba rerela Bajuta ba ba kwa Juta le Jerusalema Lefoko la Modimo ka taelo ya Modimo wa Baiseraele o o neng o ba okame. ₂Ke fa Serubabele morwa Salathiele le Jesua morwa Josatake ba nanoga, ba simolola go aga Ntlo ya Modimo kwa Jerusalema, ba na le baporofeti ba Modimo ba ba ba thusang.

₃Ka nako eo ga tla kwa go bone Thathenai molaodi wa naga ntlheng ya bophirimatsatsi ya noka ya Ferathe le Sethare-Bosenai le balekane ba bone, ba ba botsa jaana ba re: “Ke mang yo o lo reboletseng go aga Ntlo e le go fetsa lobota lo?” ₄Ke fa re ba bolelela maina a banna ba ba agang kago eo. ₅Mme leitlho la Modimo le ne le okame bagolo ba Bajuta, mo ba bileng ba se ka ba thibelwa gore kitsiso e be e fitlhe kwa go Dario pele le karabo ya kgosi e be e boe e e atlholang kgang eo. ₆Mafoko a lokwalo lo Thathenai molaodi wa naga ntlheng ya bophirimatsatsi ya noka ya Ferathe le Sethare-Bosenai le balekane ba gagwe, e bong Baperesia ba ba mo ntlheng ya bophirimatsatsi ya noka ya Ferathe ba lo rometseng kwa go Dario kgosi.

₇Ba mo romela mafoko ka lokwalo, mme go ne go kwadilwe jaana mo go lone ga twe: “Go kgosi Dario! Kagiso yotlhe! ₈A go itsiwe ke kgosi gore re ile kwa nageng ya Juta kwa Ntlong ya Modimo o mogolo. E agiwa ka mafika a magolo, dipota di manegwa dipati; tiro eo e dirwa ka tlhokomelo, e tswelela pele sentle ka diatla tsa bona. ₉Ra botsa bagolo ba teng, ra ba raya ra re: ‘Ke mang yo o lo reboletseng go aga Ntlo e le go fetsa lobota lo?’ ₁₀Le gona re ba boditse maina a bone gore re tle re a go begele; ra kwala maina a banna ba e leng ditlhogo tsa bone. ₁₁Ba re araba ba re: ‘Rona re batlhanka ba Modimo wa legodimo le lefatshe; re aga Ntlo ya Modimo wa legodimo le lefatshe; re aga Ntlo ya Modimo gape e e kileng ya agiwa pele ga dinyaga tse dintsi, e kgosi e kgolo ya Iseraele e e agileng ya e fetsa. ₁₂Mme e re ka borraetsho ba ne ba galefisitse Modimo wa legodimo, wa ba neela mo diatleng tsa ga Nebukatenesare wa Mokalatea kgosi ya Babele; ene a senya Ntlo e, a isa batho mo botshwarong kwa Babele. ₁₃Mme ka ngwaga wa ntlha wa ga Korese kgosi ya Babele, kgosi Korese a laela gore ntlo e ya Modimo e agiwe gape. ₁₄A ba a ntsha le dilwana tsa Ntlo ya Modimo tsa gouta le tsa selefera tse Nebukatenesare o neng a di ntshitse mo Tempeleng ya Jerusalema, a di isa kwa tempeleng ya Babele; kgosi Korese a di ntsha mo tempeleng ya Babele, a di neela mongwe yo leina la gagwe e leng Sesebasare yo a mo dirileng molaodi; ₁₅a mo laela a re: Tsaya dilwana tse, o ye o di bee mo Tempeleng e e kwa Jerusalema, mme a Ntlo ya Modimo e agiwe mo felong ga yona. ₁₆Ke fa Sesebasare yoo a tla, a thaya motheo wa Ntlo ya Modimo mono Jerusalema, mme go tloga foo go fitlha jaanong go ntse go agiwa, mme ga go ise go fediwe.’ ₁₇Jaanong he, fa go kgatlha kgosi, a go batliwe mo ntlong ya khumo ya kgosi koo Babele, fa e le nnete, fa kgosi Korese a laetse go aga Ntlo e ya Modimo mono Jerusalema. Mme a kgosi e re itsise katlholo ya yona ka ga selo se.”