ESERA 10

₁Jaanong ya re Esera a ntse a rapela jalo, a ipobola, a lela a namaletse fa pele ga Ntlo ya Modimo, phuthego e kgolo thata ya Baiseraele ya phuthegela kwa go ene ya banna le basadi le bana; gonne batho ba ne ba lela ka selelo se segolo. ₂Mme Seganya morwa Jehiele oora Elame a simolola go bua, a raya Esera a re: “Re leofetse Modimo wa rona ka boikanyologo, ra nyala basadi ba sele ba merafe ya lefatshe. Mme tsholofelo e sa le teng ya gore Baiseraele ba ka tswa mo molatong oo. ₃Ka moo he, a re direng kgolagano le Modimo wa rona, re ipofe go busetsa basadi botlhe bao kwa ga bone le bana ba bone ka fa kgakololong ya mong wa me le ya ba ba boifang taolo ya Modimo wa rona. A go dirwe ka fa molaong. ₄Nanoga, gonne ke tiro ya gago, mme rona re tla nna nao. Tia o e dirafatse!”

₅Ke fa Esera a nanoga a ikanisa bagolo ba baperesiti le Balefi le Baiseraele botlhe gore ba tla dira ka fa lefokong leo. Ba ikana jalo. ₆Esera a ba a tloga fa pele ga Ntlo ya Modimo, a ya kwa ntlwaneng ya ga Johanane, morwa Eliasibe; a lala teng, a sa je dijo, le metsi a sa a nwe, ka a ne a hutsafaletse boikanyologo jwa ba ba boileng kwa botshwarong.

₇Jaanong ba tlhabela botlhe ba ba boileng kwa botshwarong mokgosi mo Juta le Jerusalema gore ba kgobokane kwa Jerusalema. ₈Ba be ba re: “Mongwe le mongwe yo o sa tleng malatsi a mararo a ise a fete ka fa go bofilweng ke dikgosana le bagolo ka teng, di-tsa-gagwe tsotlhe di tla senngwa di rogilwe ke Modimo, mme ene a kgaolwe mo phuthegong ya baboa-botshwarong.” ₉Ke fa banna botlhe ba Juta le Benyamene ba kgobokana kwa Jerusalema ka malatsi a mararo ao, e le ka kgwedi ya robongwe e le 20. Mme batho botlhe ba nna mo patlelong ya Ntlo ya Modimo, ba tetesela ka ntlha ya kgang eo le ka ntlha ya dipula.

₁₀Jaanong Esera moperesiti a ema a ba raya a re: “Lo dirile ka boikanyologo, lwa nyala basadi ba sele, lwa godisa molato wa Iseraele ka go dira jalo. ₁₁Ka moo he, ipoboleleng Morena, Modimo wa borraeno, molato wa lona, lo dire ka fa natefelong ya ona, lo ikgaoganye le merafe ya lefatshe le basadi ba sele.”

₁₂Ke fa phuthego yotlhe e araba e tlhatlositse mantswe e re: “Ke tshwanelo gore re dire ka fa lefokong la gago. ₁₃Fela batho ba bantsi, le sebaka ke sa dipula, go a pala go ka ema ka kwa ntle. E bile ga se tiro ya letsatsi le le lengwe le e seng ya malatsi a mabedi; gonne re dirile melato e mentsi e e ntseng jalo. ₁₄Tsweetswee a dikgosana tsa rona di emele phuthego yotlhe, mme a botlhe mo metseng ya rona ba ba nyetseng basadi ba sele ba tle ka dinako tse di beilweng, ba na le bagolo ba motse wa ga bone le baatlhodi ba ona go tsamaya bogale jwa Modimo wa rona jo bo re tukelang ka ntlha ya molato oo bo be bo re timele.” ₁₅E ne e le Jonathane morwa Asahele le Jasia morwa Thikwa fela ba ba ganneng mafoko ao; mme Mesulame le Sabethai Molefi ba goga nabo.

₁₆Mme baboa-botshwarong ba dira jaaka go kopilwe. Ga tlhaolwa Esera moperesiti le banna ba e leng ditlhogo tsa dikgoro tsa bone, botlhe ba bidiwa ka maina a bone, mme bao ba nnela kgang eo go simolola ka letsatsi la ntlha la kgwedi ya some go e bua. ₁₇Mme ba fetsa dikgang tsa banna botlhe ba ba nyetseng basadi ba sele ka letsatsi la ntlha la kgwedi ya ntlha.

₁₈Ga fitlhelwa bangwe ba bomorwa baperesiti ba ba nyetseng basadi ba sele: Mo go bomorwa Jesua, morwa Josatake, le mo go bomorwa-rraagwe e ne e le Maaseya le Eliesere le Jaribe le Ketalea. ₁₉Mme ba ipofa ka go fana diatla le bagolo gore ba tla tlhala basadi bao ba bone le go ntshetsa molato wa bone phelehu ya letsomane go nna setlhabelo sa molato.

₂₀Mo go boora Imere e ne e le Hanani le Sebatya. ₂₁Mo go boora Harime e ne e le Maaseya le Elia le Semaya le Jehiele le Usia.

₂₂Mo go boora Phašure e ne e le Eleyoenai le Maaseya le Isemaele le Nethanele le Josabate le Eleasa. ₂₃Mo Balefing e ne e le Josabate le Simei le Kelaya (ke ene Keleta) le Phethaya le Juta le Eliesere. ₂₄Mo baopeding e ne e le Eliasibe; mo badiseng ba dikgoro e ne e le Sadume le Teleme le Uri. ₂₅Ba Baiseraele: Mo go boora Pharoše e ne e le Ramia le Isia le Malekhia le Miyamine le Eleasare le Malekhia le Benaya.

₂₆Mo go boora Elame e ne e le Mathanya le Sagaria le Jehiele le Abedi le Jeremothe le Elia.

₂₇Mo go boora Sathu e ne e le Eleyoenai le Eliasibe le Mathanya le Jeremothe le Sabate le Asisa.

₂₈Mo go boora Bebai e ne e le Johanane le Hananya le Sabai le Athelai.

₂₉Mo go boora Bani e ne e le Mesulame le Maloge le Ataya le Jašube le Seale le Jeremothe.

₃₀Mo go boora Phahathe-Moabe e ne e le Atena le Kelale le Benaya le Maaseya le Mathanya le Besalele le Binui le Manase. ₃₁Mo go boora Harime e ne e le Eliesere le Isia le Malekhia le Semaya le Simeone ₃₂le Benyamene le Maloge le Semaria.

₃₃Mo go boora Hasume e ne e le Mathenai le Mathatha le Sabate le Elifelete le Jeremai le Manase le Simei.

₃₄Mo go boora Bani e ne e le Maatai le Amerame le Uele ₃₅le Benaya le Bedia le Kelohi ₃₆le Wanya le Meremothe le Eliasibe ₃₇le Mathanya le Mathenai le Jaasia ₃₈le Bani le Binui le Simei ₃₉le Selemia le Nathane le Ataya ₄₀le Magenatebai le Sasai le Sarai ₄₁le Asarele le Selemia le Semaria ₄₂le Sadume le Amaria le Josefa.

₄₃Mo go boora Nebo e ne e le Jehiele le Mathitya le Sabate le Sebina le Jatai le Joele le Benaya.

₄₄Botlhe bao ba ne ba tsere basadi ba sele, mme mo basading bao go ne go le bangwe ba ba setseng ba tshotse bana.