MORERI 5

₁Disa dinao tsa gago, fa o ya kwa Ntlong ya Modimo! Kana go atamela go reetsa go phala ditlhabelo tsa masilo. Gonne ga a itse sepe fa e se go dira bosula fela. ₂Ikakanye o ise o bue; a pelo ya gago e se ka ya itlhaganela go ntsha lefoko fa pele ga Modimo. Gonne Modimo o kwa legodimong, mme wena o mo lefatsheng. Ke gona he, a mafoko a gago a se nne mantsi. ₃Gonne toro e tla ka matshwenyego a mantsi; lentswe la seeleele le utlwala ka mafoko a mantsi. ₄Fa o ikanela Modimo maikano, se diege go a dirafatsa; gonne Modimo ga o kgatlhwe ke masilo. Dira se o se ikanetseng. ₅Yo o sa ipofeng ka maikano o phala yo o ipofang ka maikano, mme a sa a dirafatse. ₆O se ka wa itsenya mo molatong ka molomo wa gago! Se bue fa pele ga morongwi wa Modimo wa re: “Ke fositse!” O biletsang Modimo gore o galefele lentswe la gago le go senya tiro ya diatla tsa gago? ₇Gonne ditoro tse dintsi le mafoko a mantsi di na le maithamako a magolo. Mme wena, boifa Modimo.

₈Fa o bona mohumanegi a gatelelwa, mme tshiamo le molao di tlosiwa mo nageng, se gakgamale. Gonne morena yo mogolo o disa yo mmotlana, mme Modimo o mogolo bogolo, o ba okametse botlhe.

₉Thuso ya lefatshe ka metlha ke fa kgosi e tlhokomela masimo.

₁₀Yo o ratang selefera ga a nke a kgora selefera, yo o ratang letlotlo o tla galala tse a di bonang. Le selo se ke boithamako fela. ₁₁Fa khumo e ata, go ata le baji ba yona. Jaanong e thusa mong wa yona eng, fa e se go e leba fela ka matlho? ₁₂Boroko jwa modiri bo monate, le fa a ja tse dipotlana gongwe tse dintsi, mme letlotlo la mohumi le a mo tlhobaetsa.

₁₃Go na le bosula jo bo boitshegang jo ke bo bonyeng fa tlase ga letsatsi, ke khumo e mong wa yona o e bolokelang tatlhego ya gagwe. ₁₄Mme fa khumo eo e mo latlhegela ka kotsi, ngwana yo a mo tsetseng o tla sala a se na sepe. ₁₅Motho o dule mo mmeleng wa ga mmaagwe a sa ikatega, e bile o tla tloga jaaka a tlile. Ga a nke a tsaya sepe sa tse o di itiretseng ka matsapa, se a ka tsamayang ka sona. ₁₆Le selo se ke bosula jo bo botlhoko, fa a na le go tloga a tshwana fela le jaaka fa a ne a tla. Jaanong go mo thusa eng, fa a itapiseditse phefo fela? ₁₇Le gona ka malatsi otlhe a gagwe o ne a ntse a le mo lefifing le mo khutsafalong le mo matshwenyegong a mantsi le mo bolwetseng le mo kgalefong.

₁₈Bonang, se ke se bonyeng se le molemo, se le sentle ke fa motho a ja, a nwa, a phela monate mo matsapeng aotlhe a o itapisang ka ona fa tlase ga letsatsi ka malatsi otlhe a bophelo jwa gagwe jo Modimo o bo mo neileng, gonne ke yona kabelo ya gagwe. ₁₉Le gona ke neo ya Modimo mo mothong mongwe le mongwe, fa Modimo o mo naya khumo le matlotlo, o bo o mo dumelela go di ja le go tsaya kabelo ya gagwe le go itumelela tse a di itapisetsang. ₂₀Ee, yo o ntseng jalo ga a tshwenyegele malatsi a bophelo jwa gagwe; gonne Modimo o mo phedisa a le mo boitumelong jwa pelo ya gagwe.