2 SAMUELE 9

₁Dafita o kile a botsa a re: “A go sa ntse go le mongwe yo o setseng wa losika lwa ga Saule? Fa a le teng, ke tla mo direla ka bopelotlhomogi ka ntlha ya ga Jonathane.”

₂Go ne go le motlhanka wa lelapa la ga Saule, leina la gagwe e le Siba; ba mmiletsa kwa go Dafita. Kgosi ya mmotsa ya re: “A ke wena Siba?” A araba a re: “Ke nna motlhanka wa gago.”

₃Kgosi ya ba ya botsa ya re: “A ga go tlhole go na le ope wa lelapa la ga Saule gore ke tle ke dirafatse bopelotlhomogi jwa Modimo mo ge ene.” Siba a araba kgosi a re: “Go sa le morwa Jonathane yo o golafetseng maoto.”

₄Kgosi ya mmotsa ya re: “O kwa kae?” Siba a araba kgosi a re: “O mo lapeng la ga Magire morwa Amiele kwa Lotebare.” ₅Ke fa kgosi Dafita a roma motho go ya go mo tsaya kwa lapeng la ga Magire, morwa Amiele kwa Lotebare.

₆Jaanong ya re Mefibosethe morwa Jonathane morwa Saule a fitlha kwa go Dafita, a wela fa fatshe ka sefatlhego, a ikoba. Mme Dafita a re: “Mefibosethe!” A araba a re: “Bona, motlhanka wa gago o fano.”

₇Dafita a ba a mo raya a re: “Se boife, gonne ruri ke tla go direla ka bopelotlhomogi ka ntlha ya ga Jonathane rraago, ke go busetsa naga yotlhe ya ga Saule rraago (mogolo). Wena ka wesi o tla ja dijo fa lobating lwa me ka gale.”

₈A ba a ikoba a re: “Motlhanka wa gago ke eng, mo o ntlhokomelang ke le ntšwa e e suleng?”

₉Kgosi ya boa ya bitsa Siba modiredi wa ga Saule, ya mo laela ya re: “Tsotlhe tse e neng e le tsa ga Saule le tsa botlhe ba lapa la gagwe ke di neile morwa mong-wa-go. ₁₀Mo lemele masimo, wena le bomorwao le batlhanka ba gago, o be o kotule gore e nne dijo tsa ba lapa la mong-wa-go, ba di je, mme Mefibosethe morwa mong-wa-go o tla nna a ja dijo fa lobating lwa me ka gale.” Siba o ne a na le bomorwa ba le 15 le batlhanka ba le 20.

₁₁Siba a araba kgosi a re: “Motlhanka wa gago o tla dira tsotlhe fela jaaka kgosi morena wa me a laetse.” Mme Mefibosethe a nna a ja fa lobating lwa ga Dafita jaaka mongwe wa bomorwa kgosi. ₁₂Mme Mefibosethe o ne a na le morwa yo monnye, leina la gagwe e le Miga. Botlhe ba ba neng ba agile mo ntlong ya ga Siba e ne e le batlhanka ba ga Mefibosethe. ₁₃Mefibosethe o ne a nna mo Jerusalema, a ntse a ja lobating lwa kgosi ka gale, a golafetse maoto a mabedi.