2 SAMUELE 22

Morena ke lefika la me

le kago ya phemelo ya me

le mopholosi wa me.

₃Modimo wa me ke lefika

la phemelo ya me,

ke tla tshabela kwa go ona;

ke thebe ya me

le lonaka lwa pholoso ya me

le kago ya phemelo ya me

le botshabelo jwa me

le mothusi wa me,

o nkgolola mo kgatelelong.

₄E ne ya e re fa ke bitsa Morena

yo o bakwang,

ke gololwe mo babeng ba me.

₅Gonne merwalela ya loso

e ne e ntikanyeditse;

dinoka tsa tatlhego tsa ntshosa.

₆Megala ya felo ga baswi

e ne e ntsentse gare;

diru tsa loso tsa nkwela.

₇Ya re ke le tlalelong,

ka bitsa Morena,

ka ba ka tlhaeleletsa

Modimong wa me;

mme wa utlwa lentswe la me

o le mo Tempeleng ya ona;

tlhaeletso ya me ya tsena

mo ditsebeng tsa ona.

₈Ga reketla,

ga roroma lefatshe;

metheo ya legodimo

ya tetesela ya reketla,

ka o ne o tuka bogale.

₉Dinko tsa ona tsa kua musi,

molelo o o jang wa tswa

mo molomong wa ona;

magala a a tukang

a tswa mo go ona.

₁₀Wa sekamisa legodimo

wa fologa;

bontsho bo le fa tlase

ga dinao tsa ona.

₁₁O ne o palame Kerubime,

o fofa;

o kala o le mo diphukeng tsa

phefo.

₁₂Wa itikanyetsa ka lefifi

go nna maobo a ona;

e ne e le bontsho jwa maru

a a kwenneng.

₁₃Magala a molelo a tuka,

a tswa phatsimong

e e fa pele ga ona.

₁₄Morena a dumisa maru

a le kwa legodimong;

Mogodimodimo a utlwatsa

lentswe la gagwe;

₁₅a thuntsha metsu,

a phatlalatsa baba;

a rathisa tladi, a ba tshosa.

₁₆Ke fa mateng a lewatle

a bonala

le metheo ya lefatshe

e senolwa

ka go kgalemela ga Morena

le ka pudulo ya mowa

wa nko ya gagwe.

₁₇A ntsha letsogo a le kwa godimo,

a ntshwara;

a nkinola mo metsing

a magolo.

₁₈A mpholosa mo babeng ba me

ba ba thata;

mo go ba ba ntlhoileng,

gonne ba ne ba le thata

bogolo go nna.

₁₉Ba ne ba nkwela

ka letsatsi la tatlhego ya me,

mme Morena a nna seitsetsepelo

sa me.

₂₀A nntshetsa kwa go

atlhameng, a nkgolola,

ka gonne ke a mo kgatlha.

₂₁Morena a ntuela

ka fa tshiamong ya me,

a mpusetsa ka fa boitshekong

jwa diatla tsa me.

₂₂Gonne ke tshegeditse

ditsela tsa Morena,

mme ga ke a ka ka ikepa

mo Modimong wa me.

₂₃Gonne tsotlhe tse di siameng

fa pele ga ona

ke ntse ke di tlhokomela;

le ditaolo tsa ona

ga ke a fapoga mo go tsona.

₂₄Ka bo ke siame fa pele

ga ona,

ka itisa gore ke se nne molato.

₂₅Ke ka moo Morena

a mpuseditseng

ka fa tshiamong ya me

le ka fa boitshekong jwa me

fa pele ga matlho a gagwe.

₂₆O itshupa o le bopelotlhomogi

mo go yo o tlhomogang pelo;

o itshupa o le tlhamalalo

mo monneng

yo o tlhamaletseng.

₂₇O itshupa o le phepa

mo go yo o phepa,

mme mo molotsaneng

o itshupa o le kgopo.

₂₈O thusa batho

ba ba gateletsweng,

mme matlho a gago

a galefela ba ba ikgodisang;

o a ba kokobetsa.

₂₉Gonne wena o lobone lwa me,

Morena;

mme Morena o sedimosa

lefifi la me.

₃₀Gonne ke tlhasela lesomo

la baba ka wena;

ke tlola lobota

ka Modimo wa me.

₃₁Tsela ya Modimo oo e

itekanetse;

lefoko la Morena le itshekile.

Ke ene thebe ya botlhe

ba ba tshabelang kwa go ene.

₃₂Gonne ke mang yo e leng

Modimo kwa ntle ga Morena?

Gape ke mang yo e leng lefika

kwa ntle ga Modimo wa rona?

₃₃Modimo oo ke kago

ya phemelo e e thata ya me;

o tsamaisa yo o itekanetseng

mo tseleng ya ona.

₃₄Ke ona o o dirang dinao

tsa me jaaka tsa phele;

o nkemisa mo mafelong

a a godimo.

₃₅Ke ona o o rutang diatla

tsa me go tlhabana

le mabogo a me

go gagamatsa bora

jwa kgotlho.

₃₆O bile o nneile thebe

ya pholoso ya gago;

go ikinamisa ga gago

go ntira mogolo.

₃₇O atlhamolositse kgato ya me

fa tlase ga me;

mangenana a me

ga a ka a temeka.

₃₈Ke lateletse baba ba me,

ka ba fetsa;

ka se ka ka boa

ke ise ke ba nyeletse.

₃₉Ruri, ka ba nyeletsa,

ka ba remaganya,

mo ba se kang ba tlhola

ba tsoga,

mme ba wela fa tlase

ga dinao tsa me.

₄₀O ntlamile ka thata

go ka tlhabana;

wa khubamisa ba ba ntsogetseng

fa tlase ga me.

₄₁O tshabisitse baba ba me

gore ba nkhularele;

ba ba ntlhoileng

ka ba nyeletsa.

₄₂Ba šebašeba go batla thuso,

mme go se na mothusi;

ba tlhaeleletsa

kwa Moreneng,

mme a se ka a ba araba.

₄₃Ka ba gatlampola

jaaka lerole la lefatshe,

ka ba phatlakanya

jaaka seretse sa mebila,

ka ba gataka.

₄₄O mpholositse mo dintweng

tsa morafe wa me,

wa mpoloka

go nna tlhogo ya merafe;

batho ba ke neng ke sa ba itse

ba ntirela.

₄₅Bomorwa ditšhaba

ba inneela ka go mpoifa;

fela fa ba nkutlwela,

ba tle go inkobela.

₄₆Bomorwa ditšhaba

ba a koafala;

ba tswa mo maiphitlhong

a bone, ba tetesela.

₄₇Morena o a phela.

A go bakwe ene lefika la me!

A go godisiwe Modimo

o e leng lefika la pholoso

ya me;

₄₈ona Modimo

o o nnayang pusoloso,

o o digelang merafe

kwa tlase ga me

₄₉o o nntshang

mo babeng ba me.

Wena o nkgodisetsa

ba ba ntsogelang;

o nkgolola mo monneng

yo o setlhogo.

₅₀Ka moo ke tla go baka,

Morena, mo merafeng,

ke opelela leina la gago;

₅₁wena yo o nayang kgosi

e o e tlhomileng pholoso

e kgolo,

o direla motlodiwa wa gago

ka bopelotlhomogi,

e bong Dafita le losika lwa

gagwe ka bosakhutleng.