2 MAKABISE 9

₁E ne e ka ne e le ka yone nako e, jaaka go ne ga diragala, fa Antiokuse a ragoga, a boela kwa morago, a tswa mo lefatshing la Peresia. ₂O ne a tsenye mo motseng mongwe o o bidiwang Peresepolise, a loga maano a go tsaya dilo mo Tempeleng ka dikgoka le go gapa motse. Ke fa batho ka bonakonako ba tlola ba phamola dibetsa ba iphemela. Ke fa baagi ba motse ba alola Antiokuse a bo a patelesega go boela kwa morago a tlhabilwe ke ditlhong. ₃Ya re a fitlha kwa Ekebatana a utlwa se se neng se diragala le se se neng se diragaletse mephato ya bo-Nikanore le Timotheuse. ₄A galefa mo go maswe, mme a ikaelela gore a dire gore Bajuta ba duelele ditlhong tse a neng a di tlhabisitswe ke ba ba neng ba mo lelekile. Ke fa a laela mokgweetsi wa kara ya gagwe gore a kgweetse a sa eme gope, ba fetse leoto. Fela katlholo ya One o o kwa legodimong e ne e ntse e tsamaya nae. Ka boikgogomoso jwa gagwe o ne a rile, “Motlhang ke fitlhang kwa motseng wa Jerusalema ke tlaa o dira namane e tona ya lebitla la Bajuta.” ₅Fela Morena yo o bonang gotlhe, Modimo wa Iseraele o ne wa mmetsa ka botlhoko bongwe jo bo agileng bo sa alafesege, jo bo sa bonaleng. E rile fela jaaka a fetsa go bua a tlhaselwa ke mala mangwe a dibetsa, go sega mo teng. ₆Mme selo se se ne se mo siametse tota, gonne gantsi le ene o ne a utlwisitse mala a ba bangwe botlhoko mo go maswe. ₇Fela a se ka a bo a fokotsa boikgogomoso jwa gagwe ka mokgwa ope. O ne a tletse boikgantsho fela mo go maswe, bogale jwa gagwe bo tšhatšhama kgatlhanong le Bajuta. O ne a sa ntse a laela gore go tabogiwe go feta moo, fa ka tshoganyetso a pirigana mo kareng ya gagwe, mme marapo a gagwe otlhe a mmele a tlhatlhara ka ntlha ya go thubagana. ₈Ene yo o neng le gone a neng a ntse a akanya ka boikgogomoso jwa gagwe jo bo fetileng selekanyo, gore o ka laola makhubu a lewatle, le gone a ithaya a re o ka lekanya boima jwa dithaba tse di kwa godimo, o ne a iphitlhela a ruthagantswe fa fatshe, e bile a kakamerwe ka setsholo, a bontsha botlhe nonofo ya Modimo, ₉gonne matlho a moikepi yo a ne a nyeula diboko mme nama ya gagwe e bodile a ntse a le mo botlhokong jo bo boitshegang jo. Mme batlhabani ba lekoko la gagwe botlhe ba gololega ka ntlha ya monkgo wa sebodu sa gagwe. ₁₀E ne e le gone a neng a ntse a akanya gore o ka tlamparela dinaledi tsa lewapi. Jaanong go ne go se na ope yo o neng a ka bo a mo tshola, gonne go ne go se ope fela yo o ka itshokelang go nkga ga sebodu sa gagwe.

₁₁Ke gone e neng ya re a kgwafofaditswe jalo a simolola go itlhotlhora boikgogomoso jwa gagwe jo bo feteletseng, ka a akanya sentle gore Modimo o ntse o mmetsa jaana, gonne o ne a khidiega nako e yotlhe. ₁₂Le ene tota o ne a tlholwa ke go itshokela monkgo wa sebodu sa gagwe mme a buela godimo a re, “Go ineela Modimo go siame, le gone ga go na motho ope yo o swang yo o tshwanetseng go eletsa go lekana le Modimo.” ₁₃Molotsanyana yo a simolola go rapela Morena, yo o neng a ka se ka a bo a mo tlhomogela pelo jaanong, a bolela ₁₄gore Motse o o Boitshepo o a neng a itlhaganeletse go ya go o gosomanya a o dira namane e tona ya lebitla, go tshwanetse go bolelwa gore o gololesegile. ₁₅A bolela gore o tla lekalekanya Bajuta botlhe le baagi ba Athena, bone Bajuta ba a neng a ntse a akanya gore le go fitlhwa tota ga ba a tshwanela go fitlhwa, gonne ke nama e e bodileng ya selo se se bosula le se se suleng fela, ba ba tshwanetseng go latlhelwa kwa ntle gore ba nne mojo wa dinonyane le dibatana. ₁₆A bolela gape gore o tlaa kgabisa Tempele e e Boitshepo ka dineo tse dintlentle jaanong, yone e a neng a kile a e thopa; le gore o tla busetsa dijana tse di boitshepo tsotlhe ka bontsintsi jo bo fetang selekanyo sa pele. A bo a bolela gore ka madi a gagwe o tla duelela ditshenyegelo tse di bakwang ke ditirelo tsa ditshupelo. ₁₇Mme go feta moo gotlhe o ne a tlaa fetoga Mojuta mme a etele mafelo otlhe kwa go neng go na le batho teng, a eta a ntse a bolela thata ya Modimo.

₁₈Mme e rile botlhoko jwa gagwe bo sa kokobele, gonne Modimo o ne o mo otlhaile ka katlholo e e siameng, a itlhoboga mme a kwalela Bajuta lokwalo lo lo kwadilweng fa tlase lo, lo e neng e le kopo. Mme lo ne lo tsamaya jaana: ₁₉“Nna, Antiokuse, kgosi le molaodi wa masole, ka pelo ya me yotlhe, ke kwalela lona Bajuta ba ba tlotlegang thata, ka re madume, ke bile ke lo eleletsa boitekanelo le letlhogonolo. ₂₀Fa e le gore lo tsogile sentle lona le bana ba lona le gotlhe go ntse fela jaaka lo rata, nka leboga thata. ₂₁Fa e le nna, le mororo ke rapame ke lwala, ke ntse ke lo gakologelwa ka lorato lo logolo. E rile ke boa kwa lefatsheng la Peresia ka tsenwa ke bolwetsi jo bogolo, mme ka akanya gore ke ke ke lo lebalebele lotlhe. ₂₂Ga se gore ke setse ke itlhobogile, gonne ke sa ntse ke solofela gore ke tlaa fola. ₂₃Fela ke lemogile gore e ne e tle e re rre a bolola a ya kwa mafatsheng a a ntlheng ya godimo, a tlhophe mongwe yo o neng a tle a tseye maemo a gagwe, ₂₄gore e ne e re fa e le gore sengwe se se neng se sa lebelelwa se ka diragala kgotsa mešwadile mengwe e e tlhobaetsang e a utlwala, batho ba dikgaolo ba itse gore o tlogetse tsamaiso ya dilo mo diatleng tsa ga mang, mme ka mokgwa oo ba nne ba sa tlhobaele. ₂₅Go feta moo, ka gonne ke itse sentle gore magosana a melelwane ya rona le botlhe ba ba gaufi le lefatshe le la rona ba a bo ba ntse ba lebeletse mabaka a a ba siametseng mme ba letile go bona se se a bong se tlaa diragala, ke tlhophile Antiokuse, morwaake, go nna kgosi, yo gantsi ke nnileng ka mo tlogela le ba le bantsi ba lona, ka bo ka mo haka, fa ke ne ke a tle ke bololele kwa dikgaolong tsa kwa ntlheng ya godimo. Mme se ke se mo kwaletseng se tshwaragantswe le lokwalo lo. ₂₆Ke gone ka moo ke lo laelang ke be ke lo kopa gore lo gakologelwe dithuso tse di neng tsa direlwa setšhaba ka kakaretso le motho ka boene mo malatsing a a fetileng, mme mongwe le mongwe wa lona a nne a tswelele-pele go nna a nthata a bo a rata morwaake. ₂₇Ke solofela thata gore o tlaa nna a latela mokgwa wa me wa go busa ka bopelotshweu le ka botho, mme o tlaa nna a lo akanyetsa.”

₂₈Jalo he, mmolai yo le motlhapatsi yo, e ne ya re a sena go boga tsone dipogo tse le ene a neng a bogisitse ba bangwe ka tsone, le ene a tla mo bofelong jwa gagwe jo bo tlhomolang pelo, mme a feleletsa botshelo jwa gagwe mo gare ga dithaba tse di kgakala tse go sa nneng ope mo go tsone. ₂₉Molekane wa gagwe Filipo a busa mmele wa gagwe. Mme ka gore o ne a tshaba morwa Antiokuse, a ne a ikgogela kwa Egepeto, kwa kgotleng ya ga Petolemi Filometore.