2 MAKABISE 7

₁Gape go ne go le bana ba motho ba supa ba ba neng ba tsenngwa mo kgolegelong le mmaabone. Kgosi e ne ya leka go ba pateletsa go ja nama ya kolobe ka go ba utlwisa botlhoko ka go ba kgwathisa ka dime le dikgole. Go ja nama ya kolobe ke selo se se iditšweng ke Molao. ₂Mongwe wa bone, a buelela ba bangwe, a re, “Tota lo leka go lemoga eng mo go rona? Re ikaeletse go swa go na le go tlola melao ya bagologolo ba rona.”

₃Kgosi ya galefa mo go maswe mme ya laela gore digadikelo le dibedisetso di gotediwe ka molelo. ₄E rile fela di sena go gotela thata-thata ya laela gore mmueledi yo wa bone a kgaolwe loleme, a obolwe tlhogo a bo a kgaolwe maoto le matsogo, bomorwarraagwe le mmaagwe ba ntse ba lebile. ₅Ya re ba sena go mo dira jaana, kgosi ya laela go mo isa kwa molelong, a ntse a hema, mme a gadikiwe mo segadikelong a ntse a tshela. Mosi o o tswang mo segadikelong ya re o ntse o kuelela, mmaagwe le bomorwarraagwe botlhe ba kgothatsana gore ba swe ka botlotlegi ba ntse ba bua jaana, ₆“Morena Modimo o lebeletse, mme ga o kake wa tlhoka go re tlhomogela pelo, jaaka Moše mo sefeleng sa gagwe a ne a supa kgatlhanong le batho ba utlwa, a re ‘Ammaaruri o tla tlhomogela batlhanka ba one pelo.’ ”

₇Ya re wa ntlha a sena go tswa mo lefatshing ka mokgwa o, ba kgokgoeletsa wa bobedi kwa pele go va go ja monate ka one mokgwa o o setlhogo o. Ya re ba sena go mo obola tlhogo, ka moriri le gotlhe, ba mmotsa ba re, “A O tla ja nama pele ga mmele wa gago o utlwisia botlhoko ka go mukaganngwa?”

₈Mme ene a araba ka bokhutshwane ka puo ya bagologolo ba gagwe a re, “Le go ka!” Ke fa le ene a utlwisiwa botlhoko. ₉Ya re a tloga a fela moya a buela godimo a re, “Molotsana ke wena, O setlhogo, O ka nna wa re tlosa mo botshelong jono, fela kgosi ya lefatshe e tlaa boa e re tsosa, gonne re swela melao ya yone, gore re tle re tshelele ruri.”

₁₀Morago ga gagwe, ba ne ba ijesa monate ka wa boraro, ene e rile ba tla go batla loleme lwa gagwe a lo ntsha ka bonako, mme ka bopelokgale a sarolola mabogo a gagwe. ₁₁A bua mafoko a a tlotlegang a re, “Ke One wa legodimo o o neng wa nnaya dirwe tse, mme ka ntlha ya melao ya one ke a di nyatsa. Mme ke solofela gore ke tla di bona gape mo go one.” ₁₂Kgosi le batlhanka ba yone ba gakgamala thata go bona bopelokgale jwa lekau le ka mo a neng a tlhokomologile go boga ka teng.

₁₃Ya re yo a sena go swa ba utlwisa wa bone botlhoko jo bo boitshegang jo. ₁₄Mme ya re a tloga a swa a goa a re, “Rona re itlhophetse se se botoka: go bolawa ke batho, re ntse re ikantse tsholofelo ya Modimo, jaaka o re solofeditse gore o tlaa re tsosa. Fela fa e le lona ga lo kake lwa bo lwa nna le tsogo, jaaka rona, kgotsa lwa nna le botshelo jo boša.”

₁₅Ba bo ba goga wa botlhano mme le ene ba mo utlwisa botlhoko. ₁₆Fela o ne a leba kgosi mme a re, “O na le thata ya go laola batho, le mororo o tlaa swa, mme O ka nna wa dira se O se ratang. Fela O se ka wa gopola gore Modimo o hulere setšhaba sa rona. ₁₇Iketle pele fela wena, O tlaa iponela ka bowena ka mo thata ya one e kgolo e tlaa lo utlwisang botlhoko ka teng, wena le setšhaba sa gago.”

₁₈Morago ga gagwe ba kgokgoetsa wa borataro, mme ya re a swa a bua mafoko a, a re, “Lo se ka lwa itsietsa: re boga jaana ka ntlha ya molato wa rona, gonne re leofetse Modimo wa rona. Ke gone ka moo dilo di boitshegang ka teng jaana. ₁₉Fela O se ka wa ithaya wa re, wena ga O kitla O otlhaelwa go leka go tlhasela Modimo.”

₂₀Mme mmaabo o ne a kgatlha go feta, e bile a tshwanelwa ke go gakologelwa ka tlotlo, gonne o ne a lebelela loso lwa bomorwawe ba supa letsatsi le lengwefela, mme a itshokela selo seo ka ntlha ya gore o ne a ikantse Morena. ₂₁O bile a kgothatsa mongwe le mongwe wa bone ka mafoko a bagologolo ba bone. Ka jaana a ne a na le tumelo e e tlotlegang o ne a nonotsha kakanyo ya gagwe ya sesadi ka bopelokgale jwa senna, a ntse a ba raya a re, ₂₂“Ga ke itse gore lo ne lwa tlhaga jang mo popelong ya me. Ga se nna ke lo neileng moya wa lona le botshelo. Dirwe tsotlhe tsa lona ga se nna ke di bopileng. ₂₃Ke motlhodi wa lefatshe yo o bopang botsalo jwa motho mme a laola tshimologo ya dilo tsotlhe, yo, ka boutlwelo-botlhoko jwa gagwe, ke tlhomamisang gore o tlaa bo a lo busetse moya le botshelo, ka ke mo lo inyatsa ka ntlha ya melao ya gagwe.”

₂₄Antiokuse o ne a ithaya a re o a nyadiwa, mme a belaela gore o utlwa thogano mo lentsweng la gagwe. Ka gofele wa bone a ne a sa ntse a tshela o ne a bua nae ka mafoko, e bile a ntse a mo solofetsa, a ikana, gore o tlaa mo humisa a bo a mo itumedise fa fela a ka tlogela mekgwa ya bagologolo ba ga gabo. A mo solofetsa gore a ka bo a mo dira Tsala ya gagwe, mme a mo naya tiro ya maemo a a kwa godimo ya setšhaba. ₂₅Lekawana le la mo tlhokomologa fela. Ke fa kgosi e lebagana le mmaalone, e mo tlhotlheletsa gore a gakolole mosimane yo go boloka botshelo jwa gagwe. ₂₆Ya re a sena go nna a leka go mo tlhotlheletsa jaana a dumalana le gore o tlaa leka go tlhotlheletsa morwawe. ₂₇A inamela mo go ene, mme a tsietsa seganka se se setlhogo se ka mafoko a, a a neng a a bua ka puo ya bagologolo ba bone, a re, “Morwaaka, O ntlhomogele pelo. Ke go tshotse dikgwedi di di le 9 mo popelong ya me, mme ka go amusa dingwaga di le tharo, ka go otla mme ka go godisa go fitlhelela O nna kana (ka go tlamela). ₂₈Jaanong, ngwanaka, ke a go kopa, a ko O gopole legodimo le lefatshe, O akanye tsotlhe tse di mo go tsone, mme O dumele gore Modimo o di dirile ka se se neng se se yo, le gore batho ba dirwa ka mokgwa one o. ₂₉O se ka wa tshaba mmolai yo. Mme O tshwane le bomorwarrago. O amogele loso ka pelo e tshweu le ka mabogo a mabedi, gore e tle e re ka letsatsi la boutlwelo-botlhoko ke tle ke go amogele gape O na le bomorwarrago.”

₃₀E rile fela jaaka a fetsa go bua mosimane yo a tswa molomo a re, “Tota fela lotlhe jaaka lo ntse jaana lo letile eng? Ga nkitla ke bo ke dumalana le taolo ya kgosi. Ke ikobela taolo ya Molao o o neng wa newa bagologolo ba rona ka Moše. ₃₁Fa e le wena, rra, wena yo O lekileng mefuta yotlhe ya bosula kgatlhanong le Bahebera, O se ka wa bo wa ithaya wa re O tlaa falola diatla tsa Modimo. ₃₂Re boga ka ntlha ya dibe tsa rona. ₃₃Mme le fa Morena yo o tshelang a re gakaletse jaana, a re otlhaya, a re laya, o tlaa boa gape a itshwarela batlhanka ba gagwe. ₃₄Fela wena, molotsana ke wena, selalome ke wena O ratang go tsholola madi go feta batho botlhe, O se ka wa bo wa nnela go ikgogomosa ka boikgogomoso jo bo se nang thuso, O ikgantsha ka ditsholofelo tse e seng tsone fa O ntse O tsholeletsa batlhanka ba gagwe letsogo, ₃₅gonne ga O ise O bo O falole katlholo ya Modimo o o thatayotlhe, o o bonang tsotlhe. ₃₆Bomorwarre, morago ga ba sena go boga botlhokonyana jwa bone, ba setse ba le mo botshelong jo bo a bong bo ntse bo kgaphasela, ka ntlha ya kgolagano ya Modimo. Mme fa e le wena, ka katlholo ya Modimo, O sa ntse O tsile go otlhaelwa makgakganyana a gago. ₃₇Mme le nna, jaaka bomorwarre, ke tlhoboga mmele wa me le botshelo jwa me ntlha e le ya melao ya bagologolo ba me, ke ntse ke bitsa Modimo gore o supegetse setshaba sa rona bomolemo jwa one, le gore e re le wena O sena go lekwa O bo O boga O bolele gore ke one Modimo o le osi, ₃₈gore ka bomorwarre le nna bogale jwa Mogodimodimo bo tle bo fele, jo ka tshiamo bo lebaganyeng le setshaba sa ga rona sotlhe.”

₃₉Kgosi ya gakala mo go maswe mme ya tshwara mosimane yo ka bosetlhogo jo bo fetang jo a neng a tshwere ba bangwe ka jone, gonne e ne e tlhabilwe ke lonyatso lwa gagwe. ₄₀Ka mokgwa o o ntseng jalo ngwana yo le ene a swa a sa leswefadiwa, a ikantse Morena gotlhelele.

₄₁Mmaabone e ne ya nna ene wa bofelo go swa, morago ga bomorwawe.

₄₂Fela jaanong go ntse ka polelo ya go ja dijo tsa ditlhabelo le dipogo tse di boitshegang tse.