2 MAKABISE 6

₁Moragonyana ga moo, kgosi e ne ya romela monnamogolo mongwe a tswa kwa Athenese go ya go pateletsa Bajuta go tlogela mekgwa ya bagologolo ba bone le go tlhokomologa melao ya Modimo mo botshelong jwa bone, ₂le go itshepolola Tempele e e kwa Jerusalema ka go e neela Tseuse wa Olimpia, mme e e mo Thabeng ya Gerisime ka go e neela Tseuse, mosireletsi wa baeng, jaaka baagi ba koo ba ne ba kopile.

₃Go pateletsa bosula jo go ne go kokonela tota le gone go ne go se na ope yo o ka go itshokelang. ₄Baheitane ba ne ba tshwere tlhapedi e ntsi le go ja monate mo go feteletseng mo Tempeleng. Ba iketlile le diaka, mme ba robalela mo malwapeng a a boitshepo le basadi. Ba dira le ditiro tse dingwe tse di bosula gone moo.

₅Aletare ya tshupelo e tletse dilo tse melao e neng e di iditse, e re ga di a itsheka. ₆Motho o ne a ka nna a tlhokomologa Sabata kgotsa a se ka a tshegetsa meletlo ya setšhaba e e tlwaelesegileng. Le gone o ne a ka nna a ganela gore o Mojuta. ₇Batho ba patelediwa go ja mateng a ditlhabelo kwa modirong wa kgwedi wa botsalo jwa kgosi. Mme e ne e tle e re mo moletlong wa ga Dionisuse ba patelediwe go tsamaya mo popelelong e e neng e tlotla Dionisuse ba rwele dikgare tsa metantanyane. ₈Ka kopo ya batho ba Petolemaise metse e e gaufi ya Magerika e ne ya laelwa gore e tshware Bajuta ka mokgwa one o, ba ba pateletse go ja nabo dijo tsa ditlhabelo. ₉Ya laelwa go bolaya botlhe ba ba neng ba gana go dumalana le mekgwa ya Segerika. Ga bonala sentle gore bomadimabe bo ba okame. ₁₀Go fa sekai: Basadi ba babedi ba ne ba sekisediwa go rupisa bana ba bone. Ba tsamaisiwa mo pontsheng gongwe le gongwe mo motseng, ba kakamere bana ba bone, ba tloga ba digelwa kwa tlase ba le mo godimo ga lobotana lwa motse. ₁₁Batho ba bangwe ba ba neng ba phuthaganetse mo dikgageng go tshegetsa letsatsi la bosupa ba iphitlhetse, mongwe le mongwe ba ne ba bolelelwa Filipo mme ba fisiwa botlhe mmogo, gonne digakolodi tsa bone tsa borapedi jwa bone di ne di sa ba dumelele go iphemela, ka ntlha ya go tlotla boitshepo jwa letsatsi le.

₁₂Jaanong ke kopa mongwe le mongwe yo o ka nnang a bala lokwalo lo gore a se ka a gakgamadiwa ke dipetso tse. Ke mo kopa gore a akanye gore ditekolo tse di ntseng jaana ga di diragalele go bolaya setšhaba sa rona. Di diragalela go se ruta. ₁₃Tota ke sesupo sa bomolemo fa baleofi ba sa tlogelwe nako e telele ba ntse ba dira bosula mme ba otlhaiwa ka bonako. ₁₄Ditšhaba tse dingwe tsone Morena o di iketlela nako e telele go fitlhelela dibe tsa tsone di nna dintsi tota a ise a di otlhaye. Fela rona o bonye go siame go re tshwara ka mokgwa o o sa tshwaneng, ₁₅gore a tle a se ka a re otlhaya morago, dibe tsa rona di setse di feteletse. ₁₆Jalo he, ga a nke a bo a tlhoka go re utlwela botlhoko gotlhelele. O ka nna a re laya ka bomadimabenyana bongwe, fela ga a nke a tlhokomologa batho ba gagwe. ₁₇A se re se boletseng se e nne kgakololo. Re tshwanetse go tswelelapele ka polelo ya rona kwa ntle ga go diega.

₁₈Eleasare, mongwe wa baruti ba maemo a a kwa godimo wa Molao, motho yo o neng a setse a godile le yo o neng a tlotlega thata, o ne a patelediwa go atlhama thata go metsa nama ya kolobe. ₁₉Fela ene a ikaelela go swa a tlotlega go na le go tshela ka ditlhong. Mme ka mokgwa oo a ikisa kwa go bolaweng ka boene. ₂₀O ne a kgwa selo se, e leng tiro ya mongwe le mongwe yo o nang le bopelokgale jwa go gana selo se go sa letlelelwang go se utlwa, le ka ntlha ya lorato lwa botshelo jwa gagwe tota. ₂₁Ba ba neng ba neilwe tiro ya modiro o o bosula o, ba ne ba mo tseela fa thoko, ka ntlha ya gore e ne e le ditsala tsa gagwe tsa bogologolo, mme ya re go sa utlwe ope, ba mo tlhotlheletsa go itsisetsa nama e a neng a dumeletswe go e ja, e a neng a e ikapeetse, mme a ipeye jaaka e kete o ja nama ya ditlhabelo jaaka kgosi e ne e laetse. ₂₂Go dira jaana go ne go tlaa mo falodisa loso, ka go ithusa ka tiro e ya bomolemo e ba neng ba e mo direla ka ntlha ya go nna ditsala nae nako e telele.

₂₃Fela ene o ne a ba bolelela mo pontsheng se a se dumelang, gonne o ne a bonye go le botoka go dira se se tshwanelang dingwaga tsa gagwe le go tlotlega ga botsofe jwa gagwe le tlotlomalo e e neng e mo tshwanela ka ntlha ya moriri o mosweu wa gagwe le maitseo a a itshekileng a gagwe a o saleng a ntse a na nao go tswa bonyaneng jwa gagwe, mme bogologolo go dira se se neng se tshwanela Molao o o tlhomilweng ke Modimo ka boone. A bo a ba bolelela gore ba ka mpa ba mo isa Bobipong. ₂₄A ba raya a re, “Go ipaya jalo ga go tshwanele nako ya rona ya botshelo, baša ba le bantsi ba ka tloga ba ithaya ba re, Eleasare mo ngwageng yo wa bo-90 o dumalanye le mekgwa ya batho ba sele, ₂₅mme ka ntlha ya go ne e kete ke dirile jalo gore ke tle ke tshele nako e teletsana e e sa thuseng sepe ka tloga ka ba timetsa, mme ka leswefatsa botsofe jwa me ka bo ka bo tlontlolola. ₂₆Le fa, ka nakonyana ke ka falola go bolaiwa ke motho, ga nkake ka bo ka falola go tshwarwa ke Mogodimodimo ke tshela kgotsa ke sule. ₂₇Jalo he, fa nka swa senna jaanong jaana, ga nkitla ke rona botsofe jwa me. ₂₈Mme ke tla bo ke tlogeletse baša sekai se se tlotlegang sa gore motho o ka swa loso lo lo siameng jang, ka go rata le ka go ineela a swela melao e e tlotlegang e e boitshepo.” Ya re a sena go bua jaana a tlhamalalela kwa bobolaelong. ₂₉Ba ba neng ba mo isa koo, le mororo ba ne ba ntse ba mo rata, ba ne ba mo tlhanogela, morago ga a sena go bua jaana, ka ba ne ba gopola gore se a neng a se buile e ne e le botseno fela. ₃₀Ya re a tloga a swa a ntse a bediwa jaana, a dumela godimo a re, “Morena yo kitso ya gagwe e leng boitshepo, o bona sentle gore, le mororo ke ka bo ke ne ke ka nna ka falola loso, ke itshoketse dipogo tse ke di bogang mo mmeleng wa me ke ntse ke kitlwa ka melamu jaana, ke itumelela go boga, gonne ke a mmoifa.”

₃₁A swa jaana, go swa ga gagwe e le sekai sa botlotlegi le segopotsi sa tshiamo go baša le batho ba le bantsi ba setšhaba.