Menelause le Jasone
1E ne e batla e le yone nako e fa Antiokuse a bolola lwa bobedi go ya go tlhasela Egepeto. 2Mme ga diragala gore gongwe le gongwe mo motseng, malatsi a ka ne a le 40, go bonale bapalami ba potokela mo moyeng, ba apere diaparo tsa bone tsa gouta, e le mephato ya batlhabani ba ba tlhometseng tota, ba tshotse marumo le ditshaka, 3e le digopagopa tsa batlhabani-bapalami ba dirile theko, go tlhaselwa, go femelwa ka fa le ka fa, go tsokodiwa dithebe, digai di ntse mafaratlhatlha, ditšhaka le tsone di tsokotsega mo moyeng, go kolopiwa dibetsa, go phatshimaka mefutafuta ya diaparo le ditlhomelo tsa ntwa tsa gouta. 4Ke fa mongwe le mongwe a rapela gore ponalo e e nne sengwe se se tlaa tlisetsang batho lesego lengwe.
5Ya re mešwadile ya maaka e bolelela gore Antiokuse o sule, Jasone a tsaya banna ba ka ne ba le 1 000 kgotsa go feta moo, a tlhasela motse o sa ntse o itebetse. Mephato e e neng e lebeletse lobota ya re e kgoromelediwa kwa morago, mme motse o tloga o gapiwa, Menelause a tshabela mo Motsaneng wa Phemelo. 6Fela Jasone ene a nna a tswelelapele ka go bolaaka ba ga gabo a se na bopelotlhomogi, a sa lemoge gore go fenya ba ga gabo ke namane e tona ya bomadimabe. A tshwere ba ga gabo jaaka e kete o gapa dikgele tsa phenyo mo babeng ba gagwe, e seng mo go ba ga gabo. 7Mme le fa go ntse jalo o ne a se ka a bo a kgona go tsenya mmuso mo diatleng tsa gagwe. Kgabagare borukutlhinyana jwa gagwe bo ne jwa mo tsisetsa ditlhong fela, a bo a tshabela gape kwa kgaolong ya Maamonite. 8Go dira bosula ga gagwe ga ema. O ne a tshwaretswe gautshwane ke Aretase, mmusi wa seganka wa Learabia, a siasia le metse, e le setsomiwa sa batho botlhe tota, a tlhoetswe go tlola melao, a ilelwa go senya lefatshe la ga gabo, le go bolaaka batho ba ga gabo. A siela kwa Egepeto. 9Mme kgabagare, motho yo, yo a neng a lelekile ba le bantsintsi mo lefatshing la ga bone, le ene o ne a swela mo lefatshing le sele, e le gore o ne a ile kwa bathong ba Separta, a ithaya a re ka ntlha ya gore o ne a le losika nabo ba tla mo amogela, ba mo fe bonno. 10Ene yo o neng a latlhetse ditopo di le dintsintsi ka kwa ntle gore di nne di sa fitlhiwa, le ene jaanong o ne a se na ope yo o mo lelelang, a se na ditirelo tsa phitlho, a sa fitlhwa mo lebitleng la bagologolo ba ga gabo.
Antiokuse Epifanese o thopa Tempele
11E rile kgosi e tla go utlwa se se neng se diragetse, ya ithaya ya re Juta o tsositse mokubukubu. Ke fa a tla a gwanta a tswa Egepeto, a tla a ja ditlhare ka meno jaaka sebatana sa naga, mme a feta a simolola go tlhasela motse ka sekgatlha. 12A bo a laela batlhabani ba gagwe gore ba kgemethe mongwe le mongwe yo ba kgatlhanang nae, ba sa mo utlwele botlhoko, le go bolaaka botlhe ba ba neng ba tshabetse mo matlong a bone. 13Baša le bagolo ba bolaakwa, basadi le bana ba feleletswa, makgarebane le masea a ripitlwa. 14Ba ba neng ba welwa ke bomadimabe mo malatsing a mararo ao ba ne ba tshwara 80 000. Ba le 40 000 ba ne ba swa ka go bolawa, mme ba le kalo gape ba ne ba rekisiwa e le makgoba.
15Fela o ne a utlwa selo se se ise se mo itumedise sentle. Ke fa a nna le sebete sa go tsena mo Tempeleng e e boitshepo go feta tse dingwe mo lefatshing lotlhe, a bontshiwa tsela ke Menelause yo o neng a tlhanogetse melao le lefatshe la ga gabo. 16A phamola dijana tse di boitshepo ka diatla tsa gagwe tse di itshekologileng. Mme diatla tsa gagwe tse di sa itshekang tse di sa siamang tse tsa gogoba sengwe le sengwe se dikgosi tse dingwe di neng di se abetse go godisa, go galaletsa le go tlotla felo fa. 17Antiokuse o ne a ikgogomosa mo go maswe, mme a se ka a lemoga gore Morena ka lobakanyana o galefetse dibe tsa ba ba neng ba nna mo motseng, ke gone ka moo, a tlhokomologileng felo fa go boitshepo mo. 18Fa e ka bo e ne e se gore batho ba totometse mo dibeng tse dintsi, Antiokuse le ene o ka bo a ne a gobiwa ka yone nako e a neng a goroga ka yone, mme a kgorelediwa mo tirong ya gagwe ya boikgogomoso, fela jaaka Heliodoruse, mogang kgosi Seleukuse a neng a mo romile go tla go keleka Bobolokelo-Madi. 19Le gale, Morena o ne a tlhopile batho e seng ka ntlha ya felo fa; o ne a tlhopile felo fa ka ntlha ya batho. 20Ke gone ka moo felo fa go neng ga boga le batho bomadimabe jo bo neng jwa ba wela, mme ya re morago ga itumelela nabo lesego le le neng la ba tlela. Go ne ga hularwa ke Mothatiyotlhe ka nako e a neng a galefile ka yone, mme ya re Morena a kokobetse mo bogaleng jwa gagwe ga busediwa mo kgalalelong ya gone yotlhe.
Balaodi ba bagolo mo Juta
21Antiokuse o ne a itsamaela ka ditalenta di le 1 800 tse a neng a di utswile mo Tempeleng, mme a itlhaganela go boela kwa Antioko. O ne a ikgogomositse mo e leng gore o ne a ka nna a leka go tsamaisa dikepe mo godimo ga lefatshe le le kwakwaletseng, a bo a leka go tsamaya ka dinao mo lewatleng, ka mokgwa o a neng a ikgantsha ka teng. 22Fela o ne a tlogela balaodi ba gagwe ba bagolo go kokonela batho, mo Jerusalema a tlogela Filipo wa setšhaba sa Mafrigia, yo o neng a sa butswa go feta motho yo o neng a mo tlhophile. 23Mo thabeng ya Gerisime a tlogela Anderonikuse, mme kwa ntle ga ba a tlogela Menelause, yo o neng a busa ba ga gabo ka kgatelelo go feta ba bangwe botlhe, a ba a tlhoa Bajuta thata. 24Kgosi ya bo ya romela molaodi wa Mamisia yo o neng a bidiwa Apolloniuse a eteletse pele lekoko la batlhabani ba le 22 000 e mo laetse go bolaya masogwana otlhe le go rekisa basadi le banna. 25Ya re a goroga kwa Jerusalema mme a ipeile jaaka ekete ke motho wa kagiso a emela letsatsi la boikhutso e leng Sabata, mme ya re Bajuta ba sa ntse ba thubile kobo segole, a laela banna ba gagwe go dira theko, ba tlhometse tota. 26Mme a kgekgetha botlhe ba ba neng ba tsile go lebelela. Ke fa a ralala motse ka mophato wa gagwe o tlhometse, a eta a kgemetha namane e tona ya palo ya batho.
27Le gale Judase yo o neng a bidiwa Makabeuse, a na le ba bangwe ba ne ba le 9, o ne a ya go nna kwa nageng le balekane ba gagwe, ba tshela jaaka diphologolo tsa naga, ba sa je sepe fa e se dimela tsa naga gore ba tle ba se ka ba iteswafatsa.
