2 MAKABISE 2

₁Re bona mo dikwalong tsa rona gore moprofeta Jeremia, e ne ya re a sena go laela bathopiwa go tsaya molelo, jaaka re setse re tlhalositse. ₂ya re a ba neela Molao a ba bolelela gore ba se ka ba bo ba lebala ditaelo tsa Morena, kgotsa ba lesa megopolo ya bone ya okiwa ke ditshwantsho tsa gouta le selefera kgotsa mekgabo ya tsone. ₃Mo gare ga dikgakololo tse dingwe tse di tshwanang le tse o ne a ba kgothaletsa gore ba se ka ba bo ba tlogela Molao wa tswa mo dipelong tsa bone.

₄Dikwalo tse di tlhalosa gape ka mo moprofeta yo, e rileng a sena go tlhagisiwa ka molaetsa ka teng, a neng a laela gore motlaagana le areka di tsamaye nae fa a ya kwa thabeng e Moše a neng a e palama go keleka boswa jwa Modimo. ₅Ya re Jeremia a fitlha koo, a fitlhela logaga teng, mme a tsenya motlaagana, areka le aletare ya masoralo mo teng, a ba a tswala kgoro.

₆Bangwe ba ba neng ba na nae ba ne ba tlhatloga go ya go bona gore a ga ba kake ba tshwaya tsela, fela ba se ka ba e bona. ₇Jeremia ya re a utlwa selo se a ba omanya, a re, “Felo fa ga tshwanetse gore go nne go sa itsiwe go fitlhelela Modimo o kgobokanya batho ba one gape, o ba bontsha boutlwelo-botlhoko jwa one. ₈Ke ka nako eo Modimo o tlaa senolang dilo tse mme kgalalelo ya Modimo e tla bonwang, le leru, jaaka le ne la senolwa ka nako ya ga Moše le jaaka Solomone a ne a rapela gore Felo fa go Boitshepo go itshepisiwe ka kgalalelo.”

₉Gape go ne go kwadilwe ka mo Solomone ka botlhale jwa gagwe a neng a ntsha tshupelo ya kgakolo le pheleletso ya felo ga boitshepo. ₁₀Fela jaaka Moše a ne a rapela Morena mme molelo wa fologa kwa legodimong, wa feta wa fisa tshupelo, Solomone le ene o ne a rapela jalo, mme molelo wa fologa kwa godimo, wa feta wa fisa ditshupelo tse di fisiwang gotlhelele. ₁₁Moše o ne a rile, “Tshupelo ya boleo e ne ya fisiwa jalo ka gore e ne ya se ka ya jewa.” ₁₂Solomone o ne a tshegetsa moletlo ka one mokgwa o malatsi a le 8.

₁₃Kwa ntle ga dilo tse re setseng re di boletse tse, go ne go bile go kwadilwe, mo dikwalong tse di bolokilweng le mo Diipolelong tsa ga Nehemia, ka mo a neng a itirela bobolokelo jwa dibuka ka teng a bo a kgobokanya dibuka tse di kwadilweng ke Dafita le dikwalo tsa dikgosi tse di buang ka ditshupelo. ₁₄Judase le ene ka mokgwa o, o ne a kgobokanya dibuka tsotlhe tse di neng di gasame mo ntweng e e fetileng e, mme tse tsone re sa ntse re na natso. ₁₅Fa e le gore lo batla dingwe tsa tsone, lo ka nna lwa romela mongwe gore a tle go di lo tseela.

₁₆La bofelo, ka re tlaa tloga re ja moletlo wa phepafatso ya Tempele, re lo kwalela jaana go lo kopa go tshegetsa malatsi a a moletlo a. ₁₇Modimo o o bolokileng batho ba one botlhe, wa ba naya botlhe boswa, puso, boprista le itshepiso, ₁₈jaaka re o ikanya, ka o re solofeditse ka Molao, o tlaa bo o itlhaganelele go re bontsha boutlwelo-botlhoko jwa one, o bo o re kgobokanyetse kwa Lefatsheng le le Boitshepo, o re ntsha gongwe le gongwe ka fa tlase ga legodimo, gonne o re namotse mo masuleng a mantsi mme o phepafaditse Tempele.

₁₉Polelo ya ga Judase Makabeuse le bomorwarraagwe, phepafatso ya Tempele e kgolo, le neelo-Modimo ya aletara, ₂₀mmogo le dintwa tse a neng a di tlhabana le Antiokuse Epifanese le Eupatore morwawe, ₂₁le ditshupo tse di neng di tswa kwa legodimong go tla go thatafatsa dinatla tse di pelokgale tsa Sejuta, gore e tle e re, le mororo ba ne ba se kaee, ba thope lefatshe lotlhe, ba gasagase digopa tsa ba ba neng ba sa butswa, ₂₂a bo a re busetsa Felo ga Boitshepo mo go itsegeng mo lefatsheng lotlhe, a golola motse mme a tlhoma melao gape e e neng e batlile e fedisiwa, Morena a ntse a bontsha kgatlhego ya gagwe ka go ba thusa ka bopelotshweu.

₂₃Tsotlhe tse, tse di setsang di boletswe mo dibukeng tse tlhano tse di kwadilweng ke Jasone wa Sirene, re tla leka go di sobolokela mo bukaneng e le nngwe fela. ₂₄Bontsi jwa dipalo le jwa dilo tse di tšhwanetseng go kwalwa bo dira gore go nne thata go tsenelela mo dipolelong tse kaga ditiragalo tsa ditso. ₂₅Le fa go ntse jalo re ne ra ikaelela go itumedisa ba ba ipatlelang sengwe ba ka nna ba se ipalela fela, le go tlhofofaletsa ba ba ratang go ithuta ka tlhogo, le go thusa babadi botlhe. ₂₆Tiro e ga e a ka ya nna motlhofo mo go rona ba re tsereng matsapa a go khutsafatsa gotlhe mo. E ne ya nna tiro e e fufudisang e, e e lalang e tlhobaeditse motho. ₂₇E ka tshwantshiwa le tiro e e thata ya motho yo o baakanyetsang moletlo wa dijo, yo maikaelelo a gagwe e leng go itumedisa mefuta ele farologanyeng ya ba ba tsileng go ja. Le fa go ntse jalo re tlaa nna re itshokela matsapa a gore re tle re thuse ba le bantsi. ₂₈Bonnetenete jwa ditiragalo bo tlaa nna bo bonwa ke mokwadi wa ditso. Mo tshobolokong e rona re tla ganelela mo go okoleng ditiragalo fela. ₂₉Fela jaaka moagi wa ntlo e ntšha a tlhokomela popego ya yone yotlhe, fa motho yo o takang ene a tlhokomela selekanyo sa ditsompelo tsa makgabisa, ke akanya gore go ntse fela jalo le mo go rona. ₃₀Tiro ya mokwadi wa ditso ya ntlha ke go itse se a se kwalang, go tlhatlhoba matlhakore otlhe a sone, go seka-seka thata ditharabololo tsa sone. ₃₁Fela motho yo o dirang tekantsho o tshwanetse go letlelelwa go leka go khutshwafatsa polelo le go tlhokomologa go bua ka botlalo ka selo se a kwalang ka sone. ₃₂Jalo he, mmang re simololeng jaanong polelo, re sa tlhole re oketsa se se setseng se kwadilwe fa godimo, gonne ke boeleele go lelefatsa ketapele ya ditso, ditso ka botsone di khutsafaditswe.