2 MAKABISE 15

₁E rile Nikanore a utlwa fa Judase le banna ba gagwe ba le mo kgaolong ya Samaria; a loga maano a go ya go ba tlhasela ka letsatsi la boikhutso, ene go sena sepe se se ka mo kgonang. ₂Mme Bajuta ba ba neng ba pateleditswe go mo latela ba mo raya ba re, “O tlotle letsatsi le One o o bonang tsotlhe a le itshepisitseng go le kanakana, mme O se ka wa ba bolaaka fela ka bosetlhogo jo bo feteletseng.” ₃Ya re molotsanyana yo a utlwa se, a botsa gore a go na le Morena mongwe kwa legodimong yo o laetseng gore letsatsi la Sabata le tshegediwe jaana. ₄Mme ya re ba araba ba re, “Morena, ene Molaodi wa dilo tsotlhe yo o kwa legodimong, ke ene yo o laetseng gore go tshegediwe letsatsi la bosupa,”

₅ene a araba a re, “Mme ke nna yo ke leng molaodi wa dilo tsotlhe mo lefatshing yo ke lo laelang gore lo tseye dibetsa tsa lona, lo ye go dira tiro e ya kgosi.” Le fa go ntse jalo o ne o sa kgona go diragatsa maanonyana a gagwe a a bosula.

₆E ne ya re Nikanore, ka boikgantsho le boikgogomoso jwa gagwe jo bo feteletseng, a setse a loga maano a go aga sefikantswe se se bonwang ke mongwe le mongwe, ka dithopo tse di neng di tserwe mo go Judase le mo banneng ba gagwe, ₇Makabeuse ene o ne a nna a tlhomamisa sentle gore Morena o tlaa bo a mo thuse. ₈A kgothatsa banna ba gagwe go re ba se ka ba kgobega marapo fa baheitane ba ba tlhasela. Ba mpe ba nne ba gakologelwe gore thuso e ba neng ba kile ba thusiwa ka yone mo malatsing a a fetileng, e tswa kwa legodimong, mme ba ikanye gore ba tlaa bo ba fenya le gompijeno ka thuso ya Yo o Thatayotlhe. ₉A ba kgothatsa ka go ba balela Molao le Baprofeta. A ba gakolola dintwa tse ba neng ba setse ba kile ba di fenya. Mme ka mokgwa o a ba tsenya moko-o-thata. ₁₀Ya re a sena go ba kgothatsa tota jaana, a feleletsa puo ya gagwe ka go ba bolelela sentle ka bolotsana jwa baheitane le ka mo ba neng ba tlhanogetse maikano a bone ka teng. ₁₁O ne a naya mongwe le mongwe wa bone moya wa go sa ikanyeng go le kalokalo gore ba tlaa bolokiwa ke thebe le lerumo. O ne a ba kgothatsa ka mafoko a a tlotlegang, a bopelokgale. Mme a ba kgothatsa jaana ka go ba bolelela toro e e neng e tshwanelwa ke go dumelwa, ekete ponatsho.

₁₂Selo se a neng a se bonye e ne e le se: Oniase, yo o neng a kile a nna moprista yo mogolo, monna wa banna, yo o neng a tlotlega, a siame, a le bori, a le bonolo, a le setswerere mo go bueng, a sale a rutiwa tshiamo a sa ntse a le monnye, o ne a otlolotse mabogo a rapelela setšhaba sotlhe sa Bajuta. ₁₃Ga bo go tlhaga monna yo le ene a neng a tlotlega ka ntlha ya bogolo jwa gagwe le tlotlomalo ya gagwe, a bile a na le borena jo bo kgatlhang thata. ₁₄Oniase a simolola go bua a re, “Monna yo ke ene yo o ratang bomorwarraagwe, yo o rapelelang batho thata le motse o o boitshepo, e le Jeremia, moprofeta wa Modimo.”

₁₅Ke fa Jeremia a otlolola letsogo la moja, a naya Judase tšhaka ya gouta a ntse a re, ₁₆“Tsaya tšhaka e e boitshepo e, ke mpho e e tswang kwa Modimong. O tlaa bolaya baba ba gago ka yone.”

₁₇Ya re ba kgothaditswe jaana ke mafoko a a tlotlegang a ga Judase, a a neng a nonofile go tsenya moya wa bonatla le wa senna mo bašeng, ba dumalana gore ba se ka ba thibelela, mme ba ye go tlhasela ka natla e kgolo, ba feleletse selo se ka go kampana ka mabogo ka bopelokgale jotlhe, ka gonne motse, tumelo-Modimo e e boitshepo ya bone le Tempele di ne di le mo diphatseng. ₁₈Tlhokomelo e ba neng ba tlhokomela basadi ba bone le bana, bomorwarraabone le ba losika lwa bone ka yone e ne e ngotlegile fela. Se ba neng ba se tshogetse thata-thata fela e ne e le Tempele e e boitshepo. ₁₉Botlhe ba ba neng ba tlogetswe mo motseng le bone ba ne ba tlhobaetse jalo, ka ba ne ba tshositswe ke tlhabano e ba neng ba sa ntse ba ya go e tlhabana mo dipoeng.

₂₀Mongwe le mongwe jaanong o ne a letile se se neng se tsile go diragala. Baba ba ne ba setse ba kgobokantse mephato ya bone mme ba eme ba dirile theko, ditlou di emisitswe fa go siametseng tlhabano teng, batlhabani-bapalami ba eme ka fa matlhakoreng. ₂₁Makabeuse a bona batlhabani ba bantsintsi ba ba neng ba tsile go thulana nae, ditlhomelo tse di phatsimang tsa ntwa, go tshabega ga ditlou. Ke fa a tsholeletsa mabogo a gagwe kwa legodimong, a rapela Modimo o o dirang dikgakgamatso, gonne o ne a itse gore ga se ka thata ya dibetsa Morena a dirang gore ba ba tshwanelwang ke go fenya ba fenye. Ba fenya ka mo a bonang go tshwanela ka teng. ₂₂Mme o ne a rapela Morena ka mafoko a: “Oh Morena, O kile wa romela moengele ka nako ya ga Hesekia, kgosi ya Juta, mme a bolaaka batlhabani ba ka ne ba le 185 000 ba lekoko la ga Saneheribe. ₂₃A jaanong he, wena Morena wa legodimo, O ko O re romele moengele yo o molemo gore a re etelele pele, a tshosa, e bile a kgoba marapo. ₂₄A nonofo ya letsogo la gago e ke e dige batho ba, gonne ba tsile ba tlhapatsa, go tla go tlhasela batho ba gago ba ba boitshepo.” A feleletsa thapelo ya gagwe ka one mafoko a.

₂₅Nikanore le banna ba gagwe ba ne ba ya go tlhasela go lediwa diphala, go bile go opelwa dipina tsa ntwa. ₂₆Fela banna ba ga Judase bone ba ne ba ya go thulana le baba ba ntse ba bitsa Modimo, ba o rapela. ₂₇Ba lwa ka diatla tsa bone, ka pelo ba ntse ba rapela Modimo. Mme ba kgekgetha batho ba le 35 000 kgotsa go feta moo. Go iponatsha ga thata ya Modimo mo ga ba itumedisa thata. ₂₈Ya re tlhabano e e fela, mme ba boela kwa morago ka boitumelo, ba lemoga gore Nikanore o kgwaphaletse fa fatshe a sule, a ntse a feletse ka diaparo le ditlhomelo tsa gagwe tsa ntwa. ₂₉Ba goa ba tlhakatlhakanye, ba baka Morena yo mogolo ka puo ya borraabonemogolwagolwane.

₃₀Jaanong monna yo o neng a ntse a ineetse gotlhelele, ka mmele le moya wa gagwe, go femela ba ga gabo, monna yo, yo o neng a ntse a rata setšhaba sa ga gabo fela jaaka a ne a se rata fa a ne a sa le monnye, o ne a laela gore tlhogo ya ga Nikanore e kgaolwe mmogo le letsogo le legetla la gagwe, mme di isiwe kwa Jerusalema. ₃₁Ya re a fitlha teng a phutha ba ga gabo le baprista. A ema fa pele ga aletara mme a laela gore go bidiwe banna ba ba neng ba le mo Motsaneng wa Phemelo. ₃₂A ba bontsha tlhogo ya ga Nikanore yole wa molotsana, le letsogo le, ka makgakga, a neng a le tsholeleditse ntlo e e boitshepo ya Yo o thatayotlhe. ₃₃Ke fa a kgaola loleme lwa ga Nikanore yole wa moikepi, a bo a laela gore lo nne lo kumaganyediwe dinonyane, lo bo lo pegwe go lebagana le Tempele, go mo duelela boeleele jwa gagwe. ₃₄Mme ya re botlhe ba bona ba ntse ba feta ba lelalela kwa legodimong, mme ba baka Morena yo o galalelang, ba ntse ba re: “A go bakwe One o o neng wa dira gore felo ga One go se ka ga leswafadiwa.” ₃₅A pega tlhogo ya ga Nikanore kwa Motsaneng wa Phemelo, e le sesupo sa thuso ya Morena se se bonwang sentle thata ke botlhe. ₃₆Ba dumalana botlhe ka moya o le mongwefela go laela gore ba se ka ba bo ba tlogela letsatsi le le sa tshegediwa, mme letsatsi la bo-13, la kgwedi ya bo-12 e e bidiwang Adara ka Searamaike, ba le je moletlo, letsatsi pele ga letsatsi la ga Moredekai.

₃₇Polelo ya ditso tsa ga Nikanore e felelela gone jaana. Mme ka jaana motse o sale o nna mo diatleng tsa Bahebera, le nna ke tla feleletsa tiro ya me gone fa. ₃₈Fa e le gore e dirilwe sentle mme e boletse sentle se e neng e tshwanetse go se bolela, ke sone se ke neng ke se eletsa seo. Fa e le gore ga e a bolelwa sentle, mme e ntse motoma fela, moo ke gone fela mo ke neng ke ka go kgona. ₃₉Ga go monate go nwa bojalwa jwa mofine bo le bosi, kgotsa metsi a le osi. Fela bojalwa jwa mofine fa bo tlhakantswe le metsi bo monate, le gone bo dira gore motho a fitlhele a itumela fela. Mme go ntse fela jalo le mo polelong ya ditso. Botswerere jwa go bolela ditso le jone bo itumedisa botlhe ba ba balang ditso tse. Ke konelela jalo.