2 DITIRAFALO 8

₁E rile dinyaga di le 20 di sena go feta, tse Salomo o neng a aga Ntlo ya Morena le ntlo ya gagwe ka tsona ₂Salomo a agelela metse e a e filweng ke Hurame, a ba a baya Baiseraele mo go yona. ₃Salomo a ba a ya kwa Hamathe-Soba, a mo fenya, ₄a agelela Thatemore kwa sekakeng le metse yotlhe ya difala e o neng a e aga kwa nageng ya Hamathe. ₅A ba a agelela Bethorone-godimo le Bethorone-tlase, ya nna metse e e femetsweng ka dipota le ditswalo le mephakarego ₆le Baalathe le metse yotlhe ya difala e Salomo o neng a na nayo le metse yotlhe ya dikoloi tsa ntwa le metse ya bapalami; a dira le tsotlhe tse di neng di mo kgatlha tse a ratang go di aga mo Jerusalema le kwa Lebanone le mo lefatsheng lotlhe la puso ya gagwe. ₇Masalela otlhe a Bahethe le Baamori le Baferesi le Bahewi le Bajebusi, ba e seng ba Baiseraele ₈bana ba bone ba ba setseng mo lefatsheng sehularong sa bone ba Baiseraele ba se kang ba ba nyeletsa, bone Salomo a ba dirisa tiro ya mokuio, ga nna jalo go fitlhelela letsatsing leno. ₉Mme Salomo a se ka a dira makgoba ape mo Baiseraeleng a go dira tiro ya gagwe; gonne bone e ne e le batlhabani le balaodi ba bagale le balaodi ba dikoloi tsa gagwe le ba bapalami ba gagwe. ₁₀Baokamedi ba bagolo ba kgosi Salomo ba ne ba le 250; bao ba ne ba okametse batho.

₁₁Salomo a ba a ntsha morwadia Farao mo motseng wa ga Dafita, a mo isa kwa ntlong e o e mo agetseng; gonne o ne a re: “A go se nne mosadi ope wa me mo ntlong ya ga Dafita kgosi ya Iseraele; gonne mafelo ao a boitshepo, ka Letlole la Morena le tsenye mo go ona.”

₁₂Metlheng eo Salomo a direla Morena ditlhabelo tsa phiso mo aletareng ya Morena e o e agileng fa pele ga matseno a Tempele; ₁₃go ne go dirwa ditlhabelo tsa letsatsi lengwe le lengwe ka fa taelong ya ga Moše ka boSabata le ka dingwedi tse di rogilweng le ka malatsi a meletlo, gararo ka ngwaga, ka Moletlo wa Dinkgwe tse di sa bedisiwang le ka Moletlo wa Dibeke le ka Moletlo wa Metlaagana. ₁₄Le gona a tsenya ditlhopha tsa baperesiti mo tirelong ya bone ka fa taelong ya ga Dafita rraagwe le Balefi mo ditirong tsa bone tsa go baka Modimo le go thusa baperesiti gore go dirwe ka fa go batlegang letsatsi lengwe le lengwe ka teng; a ba a baya badisa ba dikgoro kwa kgorong nngwe le nngwe ka fa ditlhopheng tsa bone; gonne taelo ya ga Dafita monna wa Modimo e ne e re jalo. ₁₅Mme ba se ka ba fapoga ka gope mo taelong ya kgosi ka ga baperesiti le Balefi le ka ga badisa ba matlwana a dikhumo.

₁₆Tiro yotlhe ya ga Salomo ya wediwa go tloga letsatsing le Ntlo ya Morena e theilweng ka lone go fitlhelela e be e fediwe. Ntlo ya Morena ya agega jalo ka botlalo.

₁₇Metlheng eo Salomo a ya kwa Esione-Gebere le kwa Elothe fa losing lwa lewatle kwa lefatsheng la Baetomo. ₁₈Mme Hurame a mo romela dikepe ka batlhanka ba gagwe le batlhanka ba bangwe ba ba itseng lewatle. Bao ba ya kwa Ofire, ba na le batlhanka ba ga Salomo, ba tsaya teng ditalente di le 450 tsa gouta, ba di tlisetsa kgosi Salomo.