2 DITIRAFALO 15

₁Ke fa Asaria morwa Otete a tsenwa ke Mowa wa Modimo, ₂a tswa go kgatlhantsha Asa, a mo raya a re: “Ntheetsang, wena Asa le lona Bajuta le Babenyamene lotlhe: Morena o na le lona, fa lona lo na nae. Fa lo mmatla, lo tla mmona. Mme fa lo mo tlogela, o tla lo tlogela. ₃Ke malatsi a mantsi Baiseraele ba ntse ba se na Modimo wa nnete, le e seng moperesiti yo o ba rutang le e seng molao. ₄Mme e ne ya re ba boela kwa Moreneng, Modimo wa Iseraele, ba le mo tlalelong, ba mmatla, ba mmone. ₅Metlheng eo ba ba bololang le ba ba gorogang ba tlhoke kagiso; gonne ditherego tse dikgolo di ne di imela baagi botlhe ba mafatshe. ₆Setšhaba se bolawe ke setšhaba se sengwe le motse ke motse o mongwe, ka Modimo o ne o ba reregisa ka tlalelo ya mefutafuta. ₇Mme lona, tiang lo tsenye marapo dinameng; gonne tuelo ya tiro ya lona e teng.”

₈E rile Asa a utlwa mafoko ao le thero ya ga Asaria morwa Otete moporofeti, a itshupa a tiile, a tlosa medimo e e maila mo lefatsheng lotlhe la Juta le la Benyamene le mo metseng e o neng a e thopile kwa dithabeng tsa Eferaime; a ba a ntšhwafatsa aletare ya Morena e e neng e le fa pele ga matseno a Tempele ya Morena.

₉A ba a phutha Bajuta botlhe le Babenyamene le baeng ba ba nang nabo, ba tswa kwa go Eferaime le Manase le Simeone; gonne bontsi jwa Baiseraele bo ne bo ngwegetse kwa go ene, ka ba bona Morena, Modimo wa gagwe, o na nae. ₁₀Mme ba phuthegela kwa Jerusalema kgweding ya boraro ya ngwaga wa 15 wa puso ya ga Asa, ₁₁ba direla Morena ditlhabelo ka letsatsi leo tsa thopo e ba boileng nayo, e bong dikgomo di le 700 le difutshane di le 7 000. ₁₂Ba ipofa ka maikano a gore, ba tla batla Morena, Modimo wa borraabo, ka pelo yotlhe le ka mowa otlhe ₁₃le a gore, mongwe le mongwe yo o sa batleng Morena, Modimo wa Iseraele, a bolawe, yo mmotlana gongwe yo mogolo, monna gongwe mosadi. ₁₄Ba ikanela Morena jalo ka lentswe le legolo le ka tuduetso le ka diphala le dinaka. ₁₅Bajuta botlhe ba itumelela maikano ao; gonne ba ne ba ikanne ka pelo yotlhe, ba mmatlile ka thato yotlhe, mme ba mmona; Morena a ba naya boikhutso tikologong.

₁₆Asa a koba Maaga mmaagwe, a mo ntsha mo bohumagading, ka a diretse Ašera setshwantsho se se maswe; Asa a se pšhwetlakanya, a se fisa nokaneng ya Kiterone. ₁₇Le gale dithota tsa tlhabelo tsa se ka tsa tlosiwa mo Iseraeleng; fela pelo ya ga Asa e ne e se na molato ka malatsi otlhe a gagwe. ₁₈Le gona a tsenya dineo tse di boitshepo tsa ga rraagwe le dineo tse di boitshepo tsa gagwe mo Ntlong ya Modimo, e bong selefera le gouta le dilwana. ₁₉Mme go ne go se na ntwa go fitlhelela ngwageng wa 35 wa puso ya ga Asa.