2 DITIRAFALO 11

₁E rile Rehabeame a fitlha kwa Jerusalema a feta a kgobokanya lotso lwa Juta le lwa Benyamene, e le banna ba ba tlhaotsweng ba batlhabani ba le 180 000, go ya go tlhabana le Baiseraele go busetsa bogosi go ene. ₂Mme lefoko la Morena la tla kwa go Semaya, monna wa Modimo, la re: ₃“Raya Rehabeame morwa Salomo kgosi ya Juta le Baiseraele botlhe kwa Juta le Benyamene o re: ₄‘Morena o bua jaana a re: Lo se ka lwa bolola go ya go tlhabana le ba ga lona. A mongwe le mongwe a boele kwa lapeng la gagwe. Gonne selo se, se dirilwe ke nna.’ ” Ba utlwa mafoko a Morena, ba boa, ba se ka ba bololela Jerobeame.

₅Rehabeame a nna mo Jerusalema, a agelela metse go nna e e femetsweng mo Juta. ₆A agelela Betleheme le Etame le Thekoa ₇le Betshure le Sogo le Adulame ₈le Gathe le Mareša le Sife ₉le Atoraime le Lagiše le Aseka ₁₀le Sorea le Ayalone le Heberone. Ke yona metse e e ne ya femelwa mo Juta le Benyamene. ₁₁A ba a tiisa metse e e femetsweng eo, a baya balaodi mo go yona le ditlamelo tsa dijo le lookwane le weine ₁₂le dithebe le marumo mo motseng mongwe le mongwe, a e thatafatsa gagolo thata. Bajuta le Babenyamene e ne e le ba gagwe.

₁₃Le baperesiti le Balefi ba ba neng ba le mo gare ga Baiseraele botlhe ba ineela mo go ene, ba huduga mo dinageng tsotlhe tsa bone. ₁₄Gonne Balefi ba ne ba tlogela mafulo a bone le di-tsa-bone, ba ya kwa Juta le Jerusalema. Gonne Jerobeame le bomorwawe ba ne ba ba amogile boperesiti jwa Morena. ₁₅Mme o ne a itlhometse baperesiti ba dithota tsa tlhabelo le ba didimo tsa sekaka le ba dinamane tse o di dirileng. ₁₆Balefi ba latelwa ke ba ba ineetseng ka dipelo go batla Morena, Modimo wa Iseraele, ba tswa mo ditsong tsotlhe tsa Iseraele, ba ya kwa Jerusalema go direla Morena, Modimo wa borraabo, ditlhabelo. ₁₇Ba tiisa bogosi jwa Juta, ba nonotsha Rehabeame morwa Salomo dinyaga di le tharo; gonne ba ne ba sepela mo tseleng ya ga Dafita le Salomo dinyaga di le tharo fela.

₁₈Mme Rehabeame a tsaya Mahalathe go nna mosadi wa gagwe. Bagolo ba mosadi e ne e le Jerimothe morwa Dafita le Abihaile morwadia Eliabe morwa Isai. ₁₉Ene a tshola nae bana ba basimane, e bong Jeuse le Semaria le Sahame. ₂₀Morago ga Mahalathe a nyala Maaga morwadia Abesalomo; a tshola nae Abia le Athai le Sisa le Selomithe. ₂₁Mme Rehabeame a rata Maaga morwadia Abesalomo bogolo go basadi le bagadingwana botlhe ba gagwe; gonne o ne a tsere basadi ba le 18 le bagadingwana ba le 60: a tsala bomorwa ba le 28 le bomorwadi ba le 60. ₂₂Rehabeame a ba a tlhoma Abia morwa Maaga go nna tlhogo le moetapele wa bomorwa-rraagwe. Gonne o ne a ikaeletse go mo dira kgosi. ₂₃Mme a dira ka botlhale, a kgaoganya bomorwawe botlhe, a ba baya kwa dinageng tsotlhe tsa Juta le Benyamene le kwa metseng yotlhe e e femetsweng, bangwe kwa, ba bangwe kwa gongwe, a ba naya bontsi jwa dijo, a ba batlela basadi ba bantsi.