Leboko la Baroma
1Jaanong Judase o ne a utlwa ka mo Baroma ba neng ba tumile ka teng. A utlwa ka mo ba neng ba nonofile ka teng mo botlhabaning le ka mo ba neng ba siametse mongwe le mongwe yo o neng a dira semphato nabo ka gone. A utlwa gape gore ba ne ba batla go nna ditsala tsa mongwe le mongwe yo o neng a tla go buisana nabo, 2gonne ba ne ba nonofile mo botlhabaning. Batho ba mmolelela ka ga dintwa tsa bone le ka ga ditiro tsa bone tsa bonatla, mo gare ga Mafora, a ba neng ba a fenya ba bo ba a kgethisa. 3Ba mmolelela le kaga tsotlhe tse ba neng ba di dirile mo kgaolong ya Sepaine go itseela meepo ya selefera le gouta teng. 4Ba mmolelela ka mo ba neng ba bo ba laola lefatshe le lotlhe ka teng ka ntlha ya go ikaelela ga bone le go ngangatlela, le mororo le ne le le kgakala le la bone. Ba mmolelela ka mo ba neng ba pitla ba bo ba digela dipetso tse di boitshegang ka teng mo magosing a a neng a tšwa kwa mafelelong a lefatshe go tla go ba tlhasela; le ka ga ba bangwe ba ba neng ba ba kgethela ngwaga nngwe le nngwe. 5Ba ne ba fenya ba bo ba tsenya mo taolong ya bone Filipo le Pereseuse, kgosi ya Ketime, le ba bangwe ba ba neng ba rile ba tla go ba tlhasela. 6Ba ne ba fenya le Antiokuse yo Mogolo, kgosi ya Asia yo o neng a tla go ba tlhasela ka ditlou di le 120, batlhabani-bapalami, dikara le lekoko la ntwa le legolo. 7Ba mo tsaya a ntse a tshela mme ba mo ntshisa namane e tona ya lekgetho, ene le botlhe ba ba neng ba mo tlhomaganela, ba mo laela go ba naya magolegwa a peelelo, le go tlogela dikgaolo tse dingwe tsa bone tse di neng di ba siametse thata, 8jaaka lefatshe la India, Media, Lidia le tse dingwe tsa bone tse ba neng ba di mo amoga ba bo ba di naya Kgosi Eumenese.
9Ba ne ba mmolelela gape gore Magerike a ne a kile a re a tla go bolaaka Baroma, 10fela bone ba utlwa kaga se mme ba ba romelela motsamaisi wa batlhabani a le mongwefela go ya go ba tlhasela. Mo tlhaselong e, ba utlwisa botlhoko ba bo ba bolaya ba le bantsi, ba ba tseela basadi le bana, ba ba thopela dilo, ba fenya lefatshe la bone, ba ba thubela dikago tsa phemelo, mme ba ba dira makgoba go fitlhelela le gompijeno. 11Ba mmolelela ka mo ba neng ba bolaya ba bo ba dira makgoba ka teng batho ba dipuso le ditlhaketlhake tsotlhe ba ba neng ba kile ba re ba emelana nabo. 12Fela ba ne ba tshegetsa botsala le botlhe ba e neng e le ditsala tsa bone le ba ba neng ba ba ikantse. Ba ne ba fentse magosi gongwe le gongwe. Mme botlhe ba ba neng ba utlwa leina la bone le umakiwa ba ne ba boifa. 13Mongwe le mongwe yo ba neng ba ikaeletse go mo thusa go nna kgosi, o ne a tota a nna kgosi. Mme yo ba neng ba ikaeletse go mo diga, ba ne ba mo diga. Nonofo ya bone e ne e le kgolo thata. 14Le fa go ntse jalo ga go na ope wa bone yo o kileng a ka a rwala serwalo sa bogosi kgotsa a apara bohibidu jo bo mokgona go ikgodisa. 15Ba ne ba tlhomile lekgotla la bagolo mo balekgotla ba le 320 ba neng ba aga ba akantshana malatsi otlhe teng, ba tlhola ba rerisana gore ba ka busa batho sentle jang.
16Ba ne ba naya motho a le mongwefela mmuso wa bone ngwaga e le nngwefela a na le thata ya go busa botlhe mo lefatsheng lotlhe la puso ya bone. Mme motho yo o ne a ikobelwa ke botlhe kwa ntle ga bopelotshetlha kgotsa lefufa.
Tšhwaragono Ya Bajuta le Baroma
17E rile Judase a sena go tlhopa Eupolemuse morwa Johane, wa losika lwa ga Akose le Jasone morwa Eleasare, a ba roma kwa bathong ba Roma go ya go dira tumalano ya botsala le tšhwaragano nabo, 18gore bone ba tle ba ba sikarolole jokwe fa ba sena go itse gore puso ya Magerike e ne e dira Iseraele lekgoba. 19Barongwa ba ba tsaya loeto lwa bone lo loleele go ya Roma, mme ba itlhagisa fa pele ga Balekgotla mme ba baya kopo ya bone jaana, ba re, 20“Judase Makabeuse le bomorwarraagwe le setšhaba sa Bajuta, ba re romile kwa go lona go tla go dira tumalano ya tšhwaragano le kagiso le lona, le go itsenya mo lesomong la batšhwaragani ba lona le ditsala tsa lona.”
21Balekgotla ba dumalana le kopo e. 22Mme mafoko a phetolo a ba neng ba a kwala mo matlapaneng a kgotlho mme ba a romela kwa Jerusalema go bolokwa teng e le tshupo ya kagiso le tšhwaragano ke a:
23“A setšhaba sa Baroma le Bajuta se nne le letlhogonolo mo lewatleng le mo lefatsheng ka bosafeleng. A ba se atamelwe ke tšhaka epe kgotsa mmaba ope! 24Fa ntwa e tlela Roma kgotsa batšhwaragani-nae pele gongwe le gongwe mo dikgaolong tse a di busang, 25setšhaba sa Bajuta se tšhwanetse go tsenya letsogo jaaka fa se le motšhwaragani-nae, go ya ka mo ba tla bong ba bona go eme ka teng, mme ba tšhwanetse go thusa jalo ka pelo ya bone yotlhe. 26Ba se ka ba bo ba naya motlhasedi mabele, dibetsa, madi kgotsa dikepe. Se ke maikaelelo a Baroma; mme ba tšhwanetse go tlotla ditšhwanelo tsa bone kwa ntle ga go duelwa.
27“Ka one mokgwa o, fa ntwa e tlela setšhaba sa Bajuta, Baroma ba tšhwanetse go ba thusa ka natla, fela ka mo mabaka a tla bong a eme ka teng. 28Mme motlhasedi ga a na go newa mabele, dibetsa, madi kgotsa dikepe. Se ke maikano a Baroma mme ba tla tlotla ditšhwanelo tsa bone ka pelo e e phuthologileng.”
29A ke one mafoko a tumalano a a neng a direlwa batho ba Iseraele ke Baroma. 30Fa e re a simolola go diragadiwa, batho ba setšhaba sengwe ba bo ba eletsa go a oketsa kgotsa go phimola sengwe, ba tla bo ba letlelesegile go dira jalo. Mme koketso eo le phimolo eo e tla bo e tšhwanela go elwatlhoko.
31“Mabapi le dilo tse di mašwe tse ba di dirilweng ke Kgosi Demeteriuse re mo kwaletse jaana: ‘Ke eng O imeditse Bajuta ba e leng ditsala tsa rona le bathusi ba rona jokwe ya gago? 32Fa ba ka kopa go thusiwa go tlhabana nao re tla femela ditšhwanelo tsa bone mme re tlhabane nao mo lewatleng e mo lefatsheng.’ ”
