1 MAKABISE 10

₁Aleksandere yo o neng a bidiwa Epifanese, morwa Antiokuse a ne ya re ka ngwaga wa 160 a fitlha kwa Petolemaise, a bo a aga teng. Ba ne ba mo amogela sentle, mme a busa teng. ₂E rile Kgosi Demeteriuse a utlwa selo se a phutha batlhabani ba bantsi mme a ya go mo tlhasela. ₃Go feta moo, Demeteriuse o ne a romelela Jonathane lokwalo lwa kagiso a godisa tlotlo ya gagwe, ₄ka gore o ne a ithaya a re, “Go botoka gore re utlwane le batho ba pele ga a utlwana le Aleksandere go re tlhasela; ₅o tla bo a ise a lebale ditiro tsotlhe tse di bosula tse re neng ra di mo direla, ene le bomorwarraagwe le setšhaba sa gagwe.” ₆Ke gone ka moo a neng a mo fa tetla ya go ikgobokanyetsa lekoko la ntwa le go itirela dibolao le go ipitsa motšhwaragani-nae, a bo a laela gore a newe batšhwariwa ba peelelo ba ba neng ba le mo Motsaneng wa Phemelo. ₇Jonathane a bo a tlhamalalela kwa Jerusalema a feta a balela batho botlhe lokwalo lo, le banna ba Motsana wa Phemelo. ₈Botlhe ba sala ba akabetse fela fa ba utlwa gore Kgosi e mo letleletse go ikokoanyetsa mephato ya ntwa. ₉Banna ba Motsana wa Phemelo ba naya Jonathane batšhwariwa ba peelelo, mme ene a ba neela batsadi ba bone.

₁₀Ke fa Jonathane a nna kwa Jerusalema, a bo a simolola go tsosa le go tlhabolola motse o. ₁₁A laela ba ba neng ba tshwanetse go dira tiro e, go bopela dipota le go thekeletsa Thaba ya Sione ka maje a a matlhakore-mane, go di thatafatsa go feta, mme se sa dirwa. ₁₂Batšwa-kwa ba ba neng ba le mo dikagong tsa phemelo tse di neng di agilwe ke Bakitese ba tšwa mo go tsone, ₁₃mongwe le mongwe wa bone a tlogela mo a neng a beilwe teng a boela kwa ga gabo. ₁₄E ne e le kwa Bethesure fela kwa go neng go sa ntse go na le bangwenyana ba ba neng ba sa tshegetse Molao le ditaolo, gonne e ne e le botshabelo jwa bone.

₁₅Kgosi Aleksandere a utlwa ditsholofetso tsotlhe tse Demeteriuse a neng a di romeletse Jonathane. O ne a bo a bolelelwa ka ga dintwa tse monna yo a neng a di lole le ditiro tsotlhe tsa bonatla tse a neng a di dirile, ene le bomorwarraagwe le diteko tse ba neng ba kile ba di itshokela. ₁₆A buela godimo a re, “A ruri re tlaa tsamaya re bona mongwe yo o tšhwanang le monna yo? A re itlhaganele re mo dire tsala le motshwaragani le rona.” ₁₇Ke fa a mo kwalela lokwalo, a bua nae ka mafoko a: ₁₈“Nna, Kgosi Aleksandere, ke kwalela Jonathane morwarre, ka re, madume. ₁₉Re itsisitšwe fa O le senatla mo tirong e bile O na le maikutlo a go nna tsala le rona. ₂₀Ke gone ka moo re go tlhopileng, gompijeno, go nna moprista yo mogolo wa setšhaba sa ga eno. O na le leina la ‘Tsala ya Kgosi.’ ” (O ne a bo a mo romelela purapura e e bohibidu jo bo mokgona le serwalo sa gouta.) “Mme O tshwanetse go ithuta dikgatlhego tsa rona mme O nne O nne tsala le rona.”

₂₁Jonathane a apara diaparo tse di boitshepo ka kgwedi ya bosupa ya ngwaga wa 160, ka moletlo wa Metlaagana. A bo a simolola go ikokoanyetsa mephato le go itirela dibetsa tsa ntwa di le dintsi.

₂₂E rile Demeteriuse a utlwa se se neng se diragetse a se ka a itumela. ₂₃A re “Re dirileng, gore Aleksandere a re rake jaana mo go direng ditsala le Bajuta, gore a ithatafatse? ₂₄Le nna ke tlaa ba romelela kopo, ke ba nametsa, ke bile ke ba solofetsa tlotlo le dimpho, gore ke tle ke ba kwakwadieletse go nthusa.”

₂₅A bo a ba kwalela jaana: “Nna, Kgosi Demeteriuse, ke kwalela setšhaba sa Bajuta, ka re, madume. ₂₆Re utlwile jaaka lo ntse lo tshegeditse tumalano le rona lo ntse lo le ditsala le rona, lo bile lo sa tsena mo lesomong la baba ba rona. Mme selo se se re itumedisitse thata. ₂₇Jaanong fa lo tšwelela-pele jalo go nna lo ikanyega jaana mo go rona, le rona re tlaa lo duelela tiro e e molemo e lo ntseng lo e re direla ka bomolemo jo bogolo. ₂₈Re tlaa lo direla dilo di le dintsi tse re se keng re di direla batho ba bangwe re be re lo tlotle go feta ba bangwe. ₂₉Go tloga gompijeno re a lo golola mme re ntsha Bajuta botlhe mo lekgethong, lekgetho la letšwai, le dikgafela tsa kgosi. ₃₀Le fa ka tšhwanelo ke tšhwanetse go kgethisa selekanyo sa bontlhanngwe jwa boraro jwa thobo le mhama wa palo ya maungo a ditlhare, ke fidisa lekgethole, go simologa gompieno go tšwelela pele, mo lefatsheng la Juta le mo dikgaolong tse tharo tse di tšhwaraganyeng nalo go tšwa Samaria-Galelea, go simologa gompieno go ya bosakhutleng. ₃₁Kgaolo ya Jerusalema, dikgafela le dikabelo tsa Jerusalema di tlaa nna boitshepo, di bo di se ka tsa kgethisiwa. ₃₂Ke tlogela go tlhola ke busa Motsana wa Phemelo mo Jerusalema mme ke o neela moprista yo mogolo gore a beye lekoko la batlhabani-balebeledi ba ba itlhopetšweng ke ene. ₃₃Ke golola, kwa ntle ga thekololo, Bajuta ba ba kileng ba gapiwa mo lefatsheng la Juta ba ba mo dikgaolong tsotlhe tsa puso ya me, mme ke laela gore gotlhe ba se ka ba kgethisiwa, le fa e le go kgethisediwa leruo la bone.

₃₄“Meletlo yotlhe, diSabata, go rogwa ga kgwedi gongwe le gongwe le malatsi a meletlo e mogolo, le malatsi a mararo pele le malatsi a mararo morago ga moletlo mongwe le mongwe otlhe e tla nna malatsi a go gololwa mo ditšhwanelong le mo melatong mo Bajuteng botlhe mo pusong ya me. ₃₅Mme ga go na ope yo o tlaa letlelelwang go latelela kgotsa go tšhwenya ope wa bone ka sepe le fa e ka ne e le eng.

₃₆“Bajuta ba tlaa tsenngwa mo mephatong ya kgosi ba le 30 000 mme ba bone kotla ka selekanyo se se kana ka sa ba bangwe ba ba mo mephatong ya kgosi. ₃₇Bangwe ba bone ba tla bewa mo dikagong tsa phemelo tse dikgolo tsa kgosi. Bangwe ba bone ba tla bewa mo maemong a boikanyo mo pusong. Magosana a bone le balaodi ba bone ba tla tlhopiwa mo palong ya bone, mme ba tla tshela ka melao ya bone jaaka kgosi e laoletse lefatshe la Juta.

₃₈“Fa e le dikgaolo tse tharo tse di tšhwaraganyeng le Juta go tšwa mo kgaolong ya Samaria, tsone di tlaa momaganngwa le Juta mme di tsewe e le tse di laolwang ke molaodi a le mongwefela, di ikobela taolo ya moprista yo mogolo fela. ₃₉Ke abile Petolemaise le dikgaolo tsa teng e le mpho ya Felo ga Boitshepo mo Jerusalema, go duelela ditshenyegelo tse di tlhokegang tsa kobamelo ya batho. ₄₀Mme ke dira seabe sa me sa ditibidikwe di le 15 000 tsa selefera tse di tlaa ntshiwang mo mading a letlole la kgosi mo mafelong a a lebanyeng. ₄₁Mme madi a a fetileng selekanyo se se beilweng, a magosana a iseng a a duele jaaka mo dingwageng tse di fetileng, go tloga gompijeno a tla a duelela tiro ya Tempele. ₄₂Go feta moo, ditibidikwe tsa selefera tse di 5 000 tse magosana a me a ntseng a di amogela ngwaga nngwe le nngwe, di tšwa mo mading a letlole la ditirelo tsa tempele, le tsone di a tlogelwa, gonne ke tsa baprista ba ba tšhwarang tirelo Modimo. ₄₃Mongwe le mongwe yo o tshabelang mo tempeleng e e mo Jerusalema kgotsa mo lolwapeng longwe lwa yone ka ntlha ya gore o kolota kgosi madi kgotsa o na le sesuga sengwe fela, o tla tlogelwa a se ka a duedisiwa sesuga se, mme a busediwe di-tsa-gagwe tsotlhe mo pusong ya me. ₄₄Fa e le go agiwa le go tlhabololwa ga Felo ga Boitshepo, ditshenyegelo tsa tiro eo di tlaa tšwa mo mading a letlole la kgosi. ₄₅Go tsosiwa ga dipota tsa Jerusalema le go thatafadiwa ga thekeletso le gone go tlaa duelelwa ka madi a letlole la kgosi. Go tlaa nna fela jalo le ka go tsosiwa ga dipota tse dingwe tsa motse mo Juta.”

₄₆Ya re Jonathane le batho ba utlwa mafoko a ditsholofetso ba se ka ba a ikanya mme ba gana go a amogela, gonne ba ne ba gakologelwa ditiro tse di bosula tse Demeteriuse a neng a di dirile mo Iseraele le bosetlhogo jo a neng a kile a ba gatelela ka jone. ₄₇Ba ne ba amogela Aleksandere gonne ba ne ba bona fa e le modiredi-molemo wa bone yo mogolo. Mme ba nnela ruri batšhwaragani-nae.

₄₈Kgosi Aleksandere jaanong a kokoanya mephato e megolo, a bo a dira theko go tlhabana le Demeteriuse. ₄₉Mme dikgosi tse pedi tse tsa tlhabana. Lekoko la ntwa la ga Demeteriuse la gasagasanngwa, Aleksandere a mo alola a bo a fenya makoko a gagwe. ₅₀A nna a lwa ka natla go fitlhelela letsatsi le phirima. Fela Demeteriuse ka boene o ne a bolawa tsatsing leo.

₅₁Aleksandere o ne a romela baemedi kwa go Petolemi kgosi ya Egepeto ka molaetsa o: ₅₂“Ka jaanong ke mo ke boetse mo pusong ya me mme ke ntse setilo sa bogosi sa bagologolo ba me, le gone ke tlhomile thata ya me ya go laola ka go pitla Demeteriuse, mme ka mokgwa oo, ka tsenya lefatshe la ga etsho mo taolong ya me, ₅₃gonne ke lole nae mme ra mmolaya, ene le batlhabani ba lekoko la gagwe mme jaanong re ntse setilo sa bogosi sa puso ya gagwe: ₅₄Jaanong he, a re direng tumalano ya botsala. A ko O nneye morwadio ke mo nyale, mme ke tlaa nna mogwe wa gago, ke go fe, wena le ene, dimpho tse di lo tshwanelang.”

₅₅Kgosi Petolemi a fetola jaana: “Go sego letsatsi le ka lone O neng wa boela mo lefatsheng la bagologolo ba gago mme wa tsaya setilo sa bone sa bogosi! ₅₆Kwa ntle ga go senya nako ke tlaa dira se lokwalo lwa gago lo se kopang. Fela nkgatlhantshe kwa Petolemaise gore re tle re bonane. Mme ke tlaa nna mogogwadiago jaaka O kopile.”

₅₇Petolemi a tswa mo Egepeto le morwadie Kleopatra. Mme a goroga kwa Petolemaise mo ngwageng wa 162. ₅₈Kgosi Aleksandere a ya go kopana nae. Mme Petolemi a mo nyadisa Kleopatera morwadie. Ba jela modiro wa nyalo ya gagwe kwa Petolemaise ka maatlametlo a magolo jaaka dikgosi di dira.

₅₉Ke fa Kgosi Aleksandere a kwalela Jonathane a mo raya a re a tle go kopana nae. ₆₀Jonathane a ya kwa Petolemaise ka tlotlo, mme a kopana le dikgosi tse pedi tse. A ba fa, bone le ditsala tsa bone, selefera le gouta le dimpho tse dintsi, mme a ba kgatlha thata. ₆₁Balotsananyana bangwe ba ba neng ba tswa Iseraele ba ne ba kopanela go mmua maswe. Fela kgosi ya ba tlhokomologa fela. ₆₂Tota e bile kgosi e ne ya laela gore a apolwe diaparo tsa gagwe mme a apesiwe bohibidu jo bo mokgona. Ga dirwa jalo. ₆₃Ke fa Kgosi e mmapisa nayo mme e raya magosana a yone e re, “Mo iseng kwa gare ga motse mme lo boleleng gore go se ka ga ba ga nna le ope yo o tsenyang kgetsi kgatlhanong nae. Go se ka ga bo ga nna le ope yo o mo tshwenyang ka sepe.” ₆₄Jalo he, ya re bammoni-molato ba bona Jonathane a tlotlilwe ka polelo e, e bile a apesitswe bohibidu jo bo mokgona, ba inaya naga botlhe. ₆₅Kgosi ya mo tlotla ka go mo tsenya mo lesomong la “Ditsala tsa Ntlha” mme a mo tlhoma motsamaisi wa batlhabani le molaodi yo mogolo. ₆₆Ke fa Jonathane a boela kwa Jerusalema ka kagiso, a itumetse thata.

₆₇Mo ngwageng wa 165 Demeteriuse morwa Demeteriuse o ne a tswa kwa Kerete a ya kwa lefatsheng la bagologolo ba gagwe. ₆₈Ya re Kgosi Aleksandere a utlwa se a hutsafala thata mme a ya kwa Antioko. ₆₉Demeteriuse a dira Apolloniuse molaodi wa Koele-Siria. Mme ene Apolloniuse a kokoanya batlhabani ba bantsi. Ya re a le mo bothibelelong jwa gagwe kwa Jamnia a romela molaetsa o, kwa go Jonathane moprista yo mogolo: ₇₀“Ke wena fela yo o batlang go re tlhasela. Le gone ke iphitlhela ke tshegwa ke batho ke be ke kgojwa ka ntlha ya gago. O dirisetsang thata ya gago ya taolo kgatlhanong le rona mo lefatshing ja makgabana? ₇₁Fa e le gore O ikantse mephato ya gago go le kalokalo fologela kwano re tle go thulana mo leboeng, mme re lekane teng. Nna thata ya me e tswa mo metseng. ₇₂Botsa mme O itse gore ke mang le gore bathusi ba rona ke bomang. Batho ba tlaa go bolelela gore ga O kake wa bo wa emelana le rona, gonne bagologolo ba gago ba ne ba gasagasanngwe mo ga bone gabedi. ₇₃Le wena gompijeno ga O kake wa itlhabanela le batlhabani-bapalami ba lekoko la ntwa le legolo jaana mo leboeng, mo go se nang lentswe kgotsa lejenyana le fa e le mo motho a ka iphitlhang teng.”

₇₄Ya re Jonathane a utlwa molaetsa o wa ga Apolloniuse a utlwa a galefa thata. A tsaya banna ba le 10 000 mme a tswa mo Jerusalema. Mme Simone morwarraagwe a mo okeletsa ka batlhabani ba bangwe. ₇₅A dira theko ka mephato ya gagwe gaufi le Joppa. Baagi ba teng ba ne ba mo tswaletse kwa ntle gonne Apolloniuse o ne a beile mophato wa batlhabani-balebeledi kwa Joppa. Ya re ba simolola go tlhasela, ₇₆baagi ba teng ba tshoga, ba bo ba bula dikgoro. Mme Jonathane a gapa Joppa. ₇₇Ya re Apolloniuse a utlwa se, a kgobokanya batlhabani-bapalami ba le 3 000 le lekoko la ntwa le legolo. A boa a ya kwa Asotuse a ipaya jaaka e kete o batla go o tsena. Mme tota o ne a itlhaganelela kwa leboeng ka gore o ne a na le batlhabani-bapalami ba bantsi ba a neng a ba ikantse. ₇₈Jonathane a mo alola go fitlhelela kwa Asotuse, kwa makoko a neng a thulana gone. ₇₉Jaanong Apolloniuse o ne a tlogetse batlhabani-bapalami ba le 1 000 kwa morago ba iphitlhile. ₈₀Fela Jonathane o ne a itse ka ga go lalela mo go neng go le kwa morago ga gagwe mo. Batlhabani-bapalami ba dikaganyetsa lekoko la gagwe, mme ba tlhola ba hula batho ba gagwe ka metsu motshegare otlhe go tswa mo mosong go fitlhelela maitsiboa. ₈₁Fela batho ba ne ba emelana nae tota, fela jaaka Jonathane a ne a laetse; dipitse tsa baba tsone di lapa. ₈₂Ke fa Simone a tsena ka mophato wa gagwe, a tlhasela segopa sa batlhabani, ba a neng a ba kgemetha a bo a ba gasagasa. ₈₃Batlhabani-bapalami ba gasana le leboa, mme ba siela kwa Asotuse kwa ba neng ba tsena mo Bethedagone, tempele ya modimo wa disetwa wa bone go iphitlha teng. ₈₄Fela Jonathane a fisa Asotuse le metse e e neng e o dikologile. A e thopa. Mme a tshuba tempele ya Dagone le botlhe ba ba neng ba tshabetse mo go yone. ₈₅Baba ba ne ba latlhegetswe ke batho ba ka ne ba le 8 000 fa re bala ba ba neng ba bolailwe ka tšhaka le ba ba neng ba bolailwe ka go fisiwa. ₈₆Ke fa Jonathane a ya go thibelela go lebagana le Asekalone kwa batho ba teng ba neng ba mo thologela ka tlotlo e kgolo. ₈₇Ke fa a boela kwa Jerusalema a na le balatedi ba gagwe ba rwele dithopo.

₈₈Ya re Kgosi Aleksandere a utlwa ka ga dilo tse a tlotla Jonathane seša. ₈₉A mo romelela kgokelo ya mokgabo ya gouta, e e neng e tshwana le e e neng e a tle e fiwe Bontsalaa Kgosi. A bo a mo fa lefatshe la Ekerone le mafatshe a lone gore e nne loruo lwa gagwe.