1 MAKABISE 1

₁Aleksandere wa Masedone, morwa Filipo, o ne a tšwa kwa lefatsheng la Kitimme a fentse Dariuse, kgosi ya Maperesia le Mamede, yo o neng a mo tlhomaganela mo go buseng Hellase pele. ₂O ne a bolola a ya go tlhasela gantsi, a gapa dikago tsa phemelo di le dintsi, mme a bolaya magosi a mafelo ao. ₃Jalo he, o ne a tsamaya a bo a ya go fitlha kwa bokhutlong jwa lefatshe, a tla a gatlaka ditšhaba tse a fetang ka tsone. Lefatshe la didimala fa pele ga gagwe, mme pelo ya gagwe e e ratang bogolo ya tlala boikgogomoso. ₄A kokoanya batlhabani ba bantsi ba ba nonofileng mme a tsenya dikgaolo, ditšhaba le magosana mo pusong ya gagwe, ba nna batlatsi ba gagwe.

₅Fela nako ya tla e Aleksandere o neng a lwala ka yone, a itse gore o a tlhokafala. ₆O ne a bitsa balekane ba gagwe, batlotlegi ba ba neng ba ntse ba godisiwa fa e sale bonyaneng jwa gagwe, mme a ba kgaoganya lefatshe la puso ya gagwe, a sa ntse a tshela. ₇E rile a tlhokafala a bo a busitse dingwaga di le 12. ₈Mongwe le mongwe wa balekane ba gagwe o ne a simolola go busa mo kgaolong ya gagwe. ₉Ya re morago ga loso lwa gagwe botlhe ba rwala dirwalo tsa bogosi. Bana ba bone le bone, morago ga bone, ba dira jalo dingwaga di le dintsi, ba dira bosula jo bontsi mo lefatsheng.

₁₀Mo bathong ba go ne ga tsalwa ngwana yo o neng a tletse boleo, ebong Antiokuse Epifanese, morwa Kgosi Antiokuse, yo o neng a beilwe paakane kwa Roma. O ne a nna kgosi mo ngwageng ya bo-137 ya puso ya Magerika.

₁₁Ke ka yone nako e go neng ga tlhaga, mo Iseraele, setlhotšhwana sa baitimokanyi ba ba neng ba timetsa batho ba le bantsi. Ba nna ba re, “A re yeng go utlwana le baheitane ba ba gaufi le rona ba, gonne fa e sale jaaka re ikgaoganya nabo re welwa ke bomadimabe jo bontsi.” ₁₂Batho ba itumedisiwa ke tlhagiso e. ₁₃Mme bontsinyana jwa bone jwa tlhagafalela go ya go bua le kgosi. Ene a ba letla go tshegetsa ditirelo tsa seheitane. ₁₄Ke fa ba aga ntlo-lehalahala mo Jerusalema, e e neng e tšhwana le e baheitane ba neng ba na nayo. ₁₅Ba fitlha dilo tse di neng di supa gore ke ba bogwera, ba hularela kgolagano, ba itshwaraganya le seheitane mme ba ineela go dira bosula.

₁₆E rile fela Antiokuse a bona gore thata ya gagwe ya go busa e tlhomame sentle, a ikaelela go ipaya kgosi ya Egepeto, gore a tle a buse magosi a mabedi a. ₁₇Ke fa a tlhasela Egepeto ka natla e kgolo, ka dikara le ditlou le dikepe tse dintsi tsa ntwa. ₁₈A tlhabana le Petolemi, kgosi ya Egepeto.

Mme e rile Petolemi a mmona a tla a phageletse, a menoga, a mo supa ka direthe, a tlogela batho ba le bantsi ba ba kobesegileng le ba ba bolailweng. ₁₉Metse e e thekeleditšweng ya lefatshe la Egepeto ya gapiwa, mme Antiokuse a thopa lefatshe leo.

₂₀Ya re Antiokuse a sena go fenya Egepeto jaana, a menoga, mo ngwageng ya bo-143 a tlhasela Iseraele le Jerusalema ka natla e kgolo. ₂₁Ka makgakga a magolo a tsena mo Felong ga Boitshepo, a tlosa aletara ya gouta le setlhomo sa lobone lo lo bonesang moo, le ditsompelo tsotlhe tsa lone. ₂₂A tsaya le tafole ya marotho a neelo, dijana tsa bojalwa jwa mofine jo bo tshololelwang go nna neelo, dinwelo, diarubetsi tsa gouta, sesiro, dirwalo, mokgabiso wa gouta o o neng o le fa pele ga Tempele, e a neng a e thukuthile sengwe le sengwe. ₂₃A tsaya selefera le gouta le dijana tsa botlhokwa. A phamola matlotlo a a neng a fitlhilwe gone moo. ₂₄Ya re a sena go tsaya dilo tse tsotlhe a boela kwa lefatsheng la gagwe, a tlogela felo fa e le bobolaelo tota, a bile a ntse a bua ka boikgogomoso jo bogolo. ₂₅Iseraele yotlhe ya hutsafala thata.

₂₆Babusi le bagolwane ba dumela, makawana le basetsana ba nyema moko, basadi ba bantle ba nna mašwe.

₂₇Monyadi mongwe le mongwe a opela pina ya khutsafalo, monyadiwa a nna mo bolaong jwa gagwe jwa nyalo a hutsafetse.

₂₈Le lefatshe tota la roromela baagi ba lone, mme Ntlo yotlhe ya ga Jakoba ya apara ditlhong.

₂₉Malatsi a ne a feta, mme ya re morago ga dingwaga tse pedi kgosi ya romela molaodi wa bathapiwa ba Misia gotlhe mo metseng ya Juta. Ene a tla Jerusalema ka natla e kgolo. ₃₀Ya re a bua le batho ka mafoko a e neng ekete a kagiso, a dira gore ba mo ikanye. Fela ka tshoganyetso a wela batho ba motse o godimo, a ba utlwisa botlhoko thata. A bo a bolaaka batho ba Iseraele ba le bantsi. ₃₁A thopa motse, a bo a o tshuba, a tshwara matlo, a a rutlolola, a gosomanya dipota tse di o dikaganyeditseng. ₃₂A gapa basadi le bana, le dikgomo a di gatelela ka dikgoka.

₃₃Ke fa ba thatafatsa motse wa ga Dafita ka lebota le le popota le goletse kwa godimo, le ka dikago tse di godileng tse dithata, mme ba o dira motsana wa bone wa phemelo. ₃₄Mo go one ba baya lekoko la banna ba baleofi, baitimokanyi, ba ba neng ba ithatafatsa mo teng ga one. ₃₅Ba koega dibolao le mefago teng. Ba kgobokanyetsa dithopo tse ba neng ba di tsere mo Jerusalema teng. Mme ba tloga ba nna letšhwenyo thata.

₃₆Felo fa ga nna bolalelo kgatlhanong le Felo ga Boitshepo, ga aga e le mmaba wa Iseraele.

₃₇Ba bolaya batho ba ba se nang molato gongwe le gongwe mo Felong ga Boitshepo, mme ba lešwefatsafelofoo, ga Boitshepo.

₃₈Baagi ba Jerusalema ba sia, ba ba ba tshaba; motse oo wa nna bonno jwa batšwa-kwa, o tlhanogetse le batsalelwa ba one tota, bana ba one ba o hularela.

₃₉Felo ga one ga Boitshepo ga tlhoka batho jaaka sekaka. Meletlo ya one ya fetolwa nako ya go lela. Malatsi a one a boikhutso ya nna lesotlo, tlotlo ya one ya nna kgalo.

₄₀Tlontlololo ya one jaanong ya lekana le tlotlo ya one ya bogologolo. Bogolo jwa one jwa fetolwa khutsafalo.

₄₁Ke fa kgosi e itsise batho ba puso ya yone gotlhe gore botlhe ba tšhwanetse go nna batho ba le bangwe fela, mongwe le mongwe a tlogele mekgwa ya ga gabo. ₄₂Baheitane botlhe ba dumalana le taelo e ya kgosi. ₄₃Baiseraele ba bantsi ba itlhophela go amogela thuto-modimo ya gagwe. Ba isetsa medimo ya disetwa ditshupelo, mme ba tlontlolola sabata.

₄₄Kgosi gape ya roma morongwa ka ditaelo kwa Jerusalema le kwa metseng ya Juta, a laela gore batho ba metse e, ba tseye mekgwa e e neng e fapaanye le ya lefatshe leo. ₄₅A itsa ditshupelo tse di fisiwang tsotlhe, ditshupelo le dineelo tsa tshololo ya bojalwa mo tempeleng, a tlontlolola disabata le meletlo. ₄₆A lešwefatsa Felo ga Boitshepo le badiredi ba ba boitshepo. ₄₇A aga dialetara, malwapa le marapelelo a medimo ya disetwa, a ntsha ditshupelo ka dikolobe le dibatana tse di sa itshekang. ₄₈A tlogela bana ba bone ba basimane ba sa gwerisiwa, ba ineela mefuta yotlhe ya itshekologo le bosula ka theko, ₄₉Gore ba tle ba itebatse Molao mme ba latlhe ditaelo tsa one tsotlhe. ₅₀Mongwe le mongwe yo o neng a sa ikobele taelo ya kgosi o ne a tšhwanetse go bolawa.

₅₁Kgosi ya kwalela batho botlhe ba puso ya yone ka one mafoko a a ntseng jaana, mme ya tlhophela batho botlhe batlhatlhobi. Ya laela metse yotlhe ya Juta go ntsha tshupelo ka go tlhomagana. ₅₂Batho ba le bantsi, ke gore botlhe ba ba neng ba tlhanogetse Molao, ba ne ba itshwaraganya nabo, mme ba dira bosula mo lefatsheng,

₅₃ba pateletsa batho ba Iseraele go iphitlha mo mafelong otlhe a botshabelo a ba neng ba na nao.

₅₄Ka kgwedi ya bo-9 ya ngwaga ya bo-145 e tlhola malatsi a le 15 kgosi e ne ya tlhoma makgapha a a šwafatsang fa godimo ga aletare, mme dialetara tsa agiwa mo metseng e e dikologileng Juta. ₅₅Maswalo a ntshediwa fa dikgorong tsa matlo le mo mebileng. ₅₆Dikwalo dingwe le dingwe tsa Molao tse di neng di bonwa di ne di gagolwa di bo di fisiwa. ₅₇E ne e tle e re fa mongwe a ka bonwa a na le lekwalo la kgolagano kgotsa a tshegeditse Molao, taolo ya kgosi e mo atlholele loso. ₅₈Kgwedi nngwe le nngwe ba ne ba tlhasela botlhe ba ba neng ba ba subolola mo metseng ya Iseraele ka jaana ba ne ba na le nonofo ya go dira jalo.

₅₉Fa kgwedi e tlhola malatsi a le 25 tshupelo e ne e ntshediwa mo godimo ga aletara e e neng e tlhomilwe fa godimo ga aletara ya tshupelo e e fisiwang yotlhe. ₆₀Basadi botlhe ba ba neng ba dira gore bana ba bone ba gwerisiwe ba ne ba bolawa jaaka go laetšwe. ₆₁Masea a bone a ne a akgiwa mo melaleng ya bone, mme ba lolwapa lwa bone le botlhe ba ba neng ba gwerisitse bana ba ne ba bolawa nabo. ₆₂Fela le fa go ntse jalo go ne go ntse go na le ba le bantsi mo Iseraele ba ba neng ba itsetsepela, mme ba nna pelokgale go gana dijo tse di seng phepa. ₆₃Ba ne ba mpa ba itlhophela loso go na le go ikgotlela ka dijo tse di ntseng jaana kgotsa ka go tlhapatsa kgolagano e e boitshepo. Mme ba ne ba bolawa. ₆₄E ne e le kgalefo e e boitshegang e e neng e etetse Iseraele.