1 DIKGOSI 4

₁Kgosi Salomo e ne e le kgosi ya Baiseraele botlhe. ₂Dikgosana tsa gagwe e ne e le tse: Asaria morwa Satoke e le moperesiti; ₃Elihorefe le Ahia bomorwa Sisa e le bakwaledi: Josafate morwa Ahilote e le ntona ya kgosi. ₄Benaya morwa Joyata e le molaodi wa mephato; Satoke le Abjathare e le baperesiti. ₅Asaria morwa Nathane e le tlhogo ya baokamedi; Sabute morwa Nathane moperesiti e le tsala ya kgosi. ₆Ahisare e le molaodi wa ntlo ya kgosi; Atonirame morwa Abeta e le molaodi wa mekuio.

₇E bile Salomo o ne a na le baokamedi ba le soma mabedi, ba ba okametseng Baiseraele botlhe, ba ba babalelang kgosi le lelapa la yona ka dijo. Mongwe le mongwe a na le go babalela kgwedi mo ngwageng. ₈Maina a bone ke a: Morwa Hure o ne a le kwa dithabeng tsa Eferaime; ₉morwa Dekere a le kwa Makase le kwa Saalebime le Betšhemeše le Elone-Bethanane; ₁₀morwa Hesete a le kwa Arubothe, a okametse Sogo le naga yotlhe ya Hefere. ₁₁Morwa Abinatabe o ne a okametse naga yotlhe ya dithota ya Dore; mosadi wa gagwe e ne e le Tafathe morwadia Salomo; ₁₂Baana morwa Ahilote a okametse Thaenage le Megito le Betšheane yotlhe yo o bapileng le Sarethane kwa tlase ga Iserele go tloga kwa Betšheane go fitlha kwa Abele-Megola le go fetela kwa pele ga Jokemeame; ₁₃morwa Gebere a le kwa Ramothe wa Gileate; a okametse metsana ya ga Jaire morwa Manase e e kwa Gileate; a okametse naga ya Aregobe e e kwa Basane, metse e megolo e le 60 e e nang le dipota le mephakarego ya kgotlho; ₁₄Ahinatabe morwa Ito a le kwa Mahanaime; ₁₅Ahimaase a le kwa Nafetale; le ene o ne a tsere morwadia Salomo, e bong Basemathe go nna mosadi wa gagwe; ₁₆Baana morwa Husai a le kwa Asere le kwa Bealothe; ₁₇Josafate morwa Pharua a le kwa Isašare; ₁₈Simei morwa Ela a le kwa Benyamene; ₁₉Gebere morwa Uri a le kwa nageng ya Gileate, nageng ya ga Sihone kgosi ya Baamori le ya ga Oge kgosi ya Basane. E ne e le ene mookamedi a le esi kwa lefatsheng lele.

₂₀Bajuta le Baiseraele ba bo ba le bantsi ba le kana ka mošawa o o fa lewatleng, ba ntse ba a ja ba a nwa, ba a itumela. ₂₁Le gona Salomo o ne a busa magosi aotlhe go simolola kwa nokeng ya Ferathe go ya kwa lefatsheng la Bafelesita le go fitlha kwa molelwaneng wa Egepeto. Ba ne ba kgethela Salomo, ba mo direla ka malatsi aotlhe a bophelo jwa gagwe.

₂₂Dijo tsa ga Salomo tsa letsatsi le le lengwe e ne e le dikgetse di le 105 tsa bupe jo bo setou le dikgetse di le 210 tsa bupe jo bo gaitsweng ₂₃le dikgomo tse di nontshitsweng di le some le dikgomo di le some tsa kwa mafulong le difutshane di le lekgolo, go sa balwe diphofu le ditshephe le ditholo le dipidipidi tse di nontshitsweng.

₂₄Gonne ene o ne a busa lefatshe lotlhe le le mo ntlheng ya bophirimatsatsi ya noka ya Ferathe le dikgosi tsotlhe ntlheng ya bophirima ya noka eo go tloga kwa Thifesa go fitlha kwa Gasa, a na le kagiso mo ntlheng tsotlhe tikologong. ₂₅Bajuta le Baiseraele ba ne ba agile ba le mo thagamong, mongwe le mongwe fa tlase ga moweine wa gagwe le fa tlase ga mofeie wa gagwe go tloga kwa Dane go fitlha kwa Bereseba ka malatsi otlhe a ga Salomo.

₂₆Salomo o ne a na le dipitse tsa dikoloi di le dikete di le 40 le dipitse tse di palangwang di le dikete di le 12. ₂₇Baokamedi bale ba ne ba tlamela kgosi Salomo le botlhe ba ba jelang mo lobating wa bojelo lwa kgosi Salomo, mongwe le mongwe ka kgwedi ya gagwe, ba se ka ba tlhaetsa sepe. ₂₈Le gona ba tlisa garase le letlhaka la korong la dipitse tse di gogang le la dipitse tse di palangwang kwa felong kwa di batlegang teng, mongwe le mongwe ka fa thulaganyong ya gagwe.

₂₉Modimo o ne o neile Salomo botlhale le tlhaloganyo e kgolo thata le temogo ya dilo tse di kana ka mošawa o o fa losing lwa lewatle. ₃₀Botlhale jwa ga Salomo bo ne bo gaisa botlhale jwa batho botlhe ba kwa botlhabatsatsi le botlhale jotlhe jwa Egepeto. ₃₁O ne a le botlhale bogolo go batho botlhe, a phala Ethane wa Esera le Hemane le Kalakolo le Dareta bomorwa Magole; leina la gagwe le ne le tumile kwa ditšhabeng tsotlhe mo tikologong. ₃₂O ne a ntsha diane di le dikete tse tharo le difela di le sekete le botlhano. ₃₃Mo go tsona a bolela ka ga ditlhare, a simolola ka mosetere o o kwa Lebanone, a khutla ka mosiama o o tlhogang fa loboteng; le gona a bolela ka ga diphologolo le ka ga dinonyane le ka ga digagabi le ka ga ditlhapi. ₃₄Batho ba ne ba tswa kwa merafeng yotlhe go utlwa botlhale jwa ga Salomo, le kwa dikgosing tsotlhe tsa lefatshe tse di neng di utlwetse botlhale jwa gagwe.