1 DITIRAFALO 9

₁Baiseraele botlhe ba ne ba kwalwa mo lokwalong lwa ditshika tsa bone. Kana ba kwadilwe mo lokwalong lwa dikgosi tsa Iseraele. Mme Bajuta ba tloga ba isiwa botshwarong kwa Babele ka ntlha ya boikanyologo jwa bone. ₂Baagi ba pele ba ba neng ba le mo kabelong ya bone mo metseng ya bone e ne e le Baiseraele le baperesiti le Balefi le badiredi ba Tempele. ₃Mme mo Jerusalema go ne go agile bangwe ba Bajuta le ba Babenyamene le ba Baeferaime le ba Bamanase.

₄Ba Bajuta e ne e le Uthai morwa Amihute morwa Omeri morwa Imeri morwa Bani wa boora Pherese morwa Juta. ₅Boora Sela morwa Juta e ne e le Asaya motsalwapele le bomorwawe. ₆Ba ga gabo Sera morwa Juta e ne e le boJehuele le bomorwa-rraabo. Mmogo ba le 690.

₇Ba Babenyamene e ne e le Salo morwa Mesulame morwa Hotafia morwa Hasenua, ₈le Ibenia morwa Jerohame le Ela morwa Usi morwa Migeri le Mesulame morwa Sefatya morwa Rehuele morwa Ibenia ₉le ba ga bone ka fa tlhomaganong ya bone, mmogo ba le 956. Banna botlhe bao e ne e le ditlhogo tsa dikgoro mo ditshikeng tsa bone.

₁₀Ba baperesiti e ne e le Jetaya le Joyaribe la Jagine ₁₁le Asaria morwa Hilekia morwa Mesulame morwa Satoke morwa Merayothe morwa Ahitube moperesiti yo mogolo wa Ntlo ya Modimo; ₁₂le Ataya morwa Jerohame morwa Phašure morwa Malekhia le Maesai morwa Adiele morwa Jasera morwa Mesulame morwa Mesilemithe morwa Imere ₁₃le ba ga bone, ditlhogo tsa dikgoro tsa bone, mmogo ba le 1 760 banna ba ba tlhalefetseng tirelo mo Ntlong ya Modimo.

₁₄Ba Balefi e ne e le Semaya morwa Hašube morwa Aserikame morwa Hasabja wa boora Merari ₁₅le Bakabakare le Herese le Galale le Mathanya morwa Miga morwa Sigeri morwa Asafe ₁₆le Obatya morwa Semaya morwa Galale morwa Jeduthune morwa Beregia morwa Asa morwa Elekana yo o neng a agile mo metsaneng ya Banetofa.

₁₇Badisa ba dikgoro e ne e le Sadume le Akhube le Talemone le Ahimane le ba ga bone. Sadume ke tlhogo ya bone, ₁₈mme o disa kwa kgorong ya botlhabatsatsi ya kgosi go fitlha kajeno. Ke bone badisa ba dikgoro tsa mathibelelo a Balefi.

₁₉Mme Sadume morwa Kore morwa Ebjasafe morwa Kora le ba ga gabo ba lelapa la ga rraagwe ba ga gabo Kora ba ne ba dirilwe baokamedi ba tirelo eo, e le badisa ba mejako ya tente, ka borraabo ba ne ba okametse bothibelelo jwa Morena, e le badisa ba kgoro. ₂₀Mo metlheng ya pele Phinehase morwa Eleasare e ne e le moeteledipele yo o ba okametseng. – A Morena a nne nae!

₂₁Sagaria morwa Meselemia e ne e le modisa wa mojako wa Tente ya Boipontsho.

₂₂Bone botlhe ba ba neng ba tlhaotswe go nna badisa ba mejako ba ne ba le 212; ba kwalwa mo lokwalong lwa ditshika tsa bone mo metsaneng ya ga bone. Dafita le Samuele wa Mmoni ba ne ba ba tlhomamisa mo tshwanelong ya tiso ya bone. ₂₃Bone le bomorwaa-bone ba ne ba okametse dikgoro tsa ntlo ya Morena, e bong tsa ntlo ya tente go di disa. ₂₄Badisa ba dikgoro ba ne ba tshwanetse go nna mo ntlheng tse nne kwa botlhabatsatsi le kwa bophirimatsatsi le kwa bokone le kwa borwa. ₂₅Ba ga bone ba ba neng ba nna mo metsaneng ya bone ba ne ba tshwanetse go tla go disa nabo malatsi a supa ka dipaka tsa teng. ₂₆Mme badisa ba bane ba bagolo ba dikgoro bone ba ne ba tshwanetse go disa ka metlha. Balefi ba bangwe ba ne ba okametse matlwana a Ntlo ya Modimo le mahumo a yona. ₂₇Ba ne ba lala mo tikologong ya Ntlo ya Modimo, ka ba ne ba na le go disa; le gona ba tshotse selotlele go e bula mo mosong mongwe le mongwe.

₂₈Bangwe ba bone e ne e le batlhokomedi ba didiri tsa tirelo. Kana ba ne ba tshwanetse go di boloka di badilwe le go di ntsha gape di badilwe. ₂₉Ba bangwe ba bone ba ne ba dirilwe baokamedi ba dijana, ba dijana tsa mefutafuta tse di boitshepo le ba bupe jo bo boleta le weine le lookwane le musi wa maswalo le makga. ₃₀Bangwe ba bomorwa baperesiti ba ne ba tlhakanya setlolo ka makga a mefutafuta.

₃₁Mme Mathitya mongwe wa Balefi morwa wa ntlha wa ga Sadume wa ga gabo Kora e ne e le mookamedi wa baapei. ₃₂Bangwe ba ga gabo Kahathe ba ne ba okametse dinkgwe tsa tshupo; ba na le go di baakanya ka Sabata mongwe le mongwe.

₃₃Go ne go le baopedi ditlhogo tsa dikgoro tsa Balefi, ba nna mo matlwaneng a Tempele, ba golotswe mo tirong tse dingwe, ka ba tshwaregile ka tiro ya bone bosigo le motshegare.

₃₄Ke bone ditlhogo tsa dikgoro tsa Balefi ka fa tlhomaganong ya bone; ba ne ba agile kwa Jerusalema.

₃₅Mme kwa Gibeone go ne go agile Jehuele rraagwe Gibeone – leina la mosadi wa gagwe e le Maaga – ₃₆le morwawe wa ntlha Abetone le bomonnawe Sure le Khiše le Baale le Nere le Natabe ₃₇le Ketore le Ayo le Sagaria le Mikelothe. ₃₈Mme Mikelothe a tsala Simeame; bao le bone ba ne ba agile le ba ga bone kwa Jerusalema, ba lebaganye le ba ga bone ba ba kwa Gibeone.

₃₉Mme Nere a tsala Abenere, Khiše a tsala Saule, Saule a tsala Jonathane le Malekhišua le Abinatabe le Esebaale. ₄₀Morwa Jonathane e ne e le Meribaale, mme Meribaale a tsala Miga. ₄₁Bomorwa Miga e ne e le Phithone le Melege le Tharea le Ahase. ₄₂Ahase a tsala Jaera. Jaera a tsala Alemethe le Asemawethe le Simeri; Simeri a tsala Mosa. ₄₃Mosa a tsala Binea; morwawe e le Refaya, morwawe e le Eleasa, morwawe e le Asele.

₄₄Asele o ne a na le bomorwa ba le barataro. Maina a bone ke a: Aserikame le Bogeru le Isemaele le Searia le Obatya le Hanane. Ke bone bomorwa Asele.