1 DITIRAFALO 11

₁Morago ga moo Baiseraele botlhe ba phuthegela kwa go Dafita kwa Heberone ba re: “Kana re lesapo la gago le nama ya gago! ₂O sa le o bolotsa Baiseraele le go ba gorosa, Saule a sa le kgosi. E bile Morena, Modimo wa gago, o go laetse wa re: ‘Wena o tla fudisa morafe wa me wa Iseraele, o nna moetapele wa ona, o o busa.’ ” ₃Ga ba ga tla bagolo botlhe ba Iseraele kwa kgosing kwa Heberone, mme Dafita a dira kgolagano nabo kwa Heberone fa pele ga Morena. Ba be ba tlotsa Dafita go nna kgosi ya Iseraele ka fa lefokong la Morena le o le buileng ka Samuele.

₄Morago ga moo Dafita a ya kwa Jerusalema yo e neng e le Jebusi, a na le Baiseraele botlhe. Teng go ne go agile Bajebusi mo lefatsheng leo. ₅Mme baagi ba Jebusi ba raya Dafita ba re: “Ga o kitla o tsena ka mo!” Mme Dafita a thopa thaba e e femetsweng ya Sione. Ke yona tshimologo ya motse wa ga Dafita. ₆Dafita o ne a buile a re: “Mangmang yo o ka fenyang Bajebusi e le wa ntlha o tla nna tlhogo le kgosana.” Mme Joabe morwa Seruya a palama pele, a nna tlhogo ya mephato. ₇Jaanong Dafita a nna mo thabeng e e femetsweng; ke ka moo e bidiwang motse wa ga Dafita. ₈Dafita a ba a agelela motse mo tikologong go tloga kagong ya phemelo ya Milo go ya go o dikologa otlhe. Joabe ene a tsosa dikarolo tse di senyegileng tsa motse. ₉Mme Dafita a nna a tia, ka Morena wa masomosomo a na nae.

₁₀Ba ke ditlhogo tsa bagale ba ga Dafita ba ba neng ba mo emela thata gore a bone bogosi, ba na le Baiseraele botlhe gore ba mo dire kgosi ka fa lefokong la Morena ka ga Iseraele.

₁₁Palo ya bagale ba ga Dafita ke e: Jasobeame morwa Hagemoni, tlhogo ya ba bararo. Ene o kile a kgadikanya lerumo la gagwe godimo ga ba le 300 ba ba bolailweng ka nako e le nngwe. ₁₂A tlhomagannwa ke Eleasare morwa Doto wa kwa Ahohi; yoo e ne e le mongwe wa bagale ba bararo. ₁₃O ne a na le Dafita kwa Phase-Damime kwa Bafelesita ba phuthegetseng teng go tlhabana. Mme go ne go le tshimo e e lemilweng e e tletseng garase. Jaanong ya re batho ba tshaba Bafelesita, ₁₄ene a ikemisa mo gare ga tshimo eo a e amoga baba, a bolaya Bafelesita, mme Morena a ba naya phenyo e kgolo ka ene.

₁₅Ba le bararo ba ditlhogo di le 30 tsa bagale ba kile ba fologa, ba fitlha kwa go Dafita a le kwa lefikeng mo logageng lwa Adulame, mme bothibelelo jwa Bafelesita bo le kwa lebaleng la Refaime. ₁₆Ka sebaka seo Dafita o ne a le kwa thabeng e e femetsweng, mme balebedi ba puso ya Bafelesita ba le kwa Betleheme. ₁₇Foo Dafita a utlwa lenyora, mme a re: “Ke mang yo o ka nnosang metsi a a tswang go gelelwa kwa mokweleng o o fa kgorong ya Betleheme?” ₁₈Ke fa ba bararo ba, ba sutlhelela bothibelelo jwa Bafelesita, ba gelela metsi mo mokweleng o o fa kgorong ya Betleheme, ba a tsaya ba a isa kwa go Dafita, mme Dafita a gana go a nwa, mme a a tshololela Morena ₁₉a re: “A Modimo wa me o nthibele go ka dira jalo! A nka nwa madi a banna bao ba ba tsentseng maphelo a bone mo kotsing?” Mme a gana go a nwa. Bagale ba bararo ba dirile jalo.

₂₀Abisai monnaa Joabe e ne e le tlhogo ya ba bararo; o kile a kgadikanya lerumo la gagwe godimo ga ba le 300 ba o neng a ba bolaya, mme o ne a tumile mo go ba bararo. ₂₁Mo go ba bararo o ne a tlotlega bogolo go ba babedi, a nna molaodi wa bone, mme a se ka a lekana le ba bararo ba pele.

₂₂Benaya morwa Joyata morwa monna wa senatla wa ditiro tse dikgolo wa kwa Kapsheele ene a bolaya bagale ba babedi ba Moabe; a ba a fologa a bolaela tau mo mokweleng ka letsatsi la semathana. ₂₃E bile ke ene yo o kileng a bolaya Moegepeto, monna wa boleele jwa mabogo a le matlhano; Moegepeto a tshotse lerumo le lore lwa lone lo leng kana ka mosipuri wa balogi, mme Benaya a ya kwa go ene ka thobane fela, a phamola lerumo mo seatleng sa Moegepeto, a mmolaya ka lone lerumo leo la gagwe. ₂₄Ke tsona tse di dirilweng ke Benaya morwa Joyata; o ne a tumile mo bagaleng ba bararo. ₂₅Kana o ne a tlotlega bogolo go ba ba 30, mme a se ka a lekana le ba bararo bale. Mme Dafita a mo dira molaodi wa bafemedi ba gagwe.

₂₆Bagale ba bangwe ba pelokgale e ne e le Asahele monnaa Joabe le Elehanane morwa Doto wa kwa Betleheme; ₂₇le Samothe wa kwa Harote le Helese wa kwa Phelone ₂₈le Ira morwa Ikese wa kwa Thekoa le Abiesere wa kwa Anathothe ₂₉le Sibegai wa kwa Huša le Ilai wa kwa Ahohi ₃₀le Maharai wa kwa Netofa le Helete morwa Baana wa kwa Netofa ₃₁le Ithai morwa Ribai wa kwa Gibea wa Babenyamene le Benaya wa kwa Phirathone ₃₂le Hurai wa kwa Nagale-Gaaše le Abiele wa kwa Areba ₃₃le Asemawethe wa kwa Baharume le Eliaba wa kwa Saalebone ₃₄le bomorwa Haseme wa kwa Gisone le Jonathane morwa Sage wa kwa Harari ₃₅le Ahiame morwa Sagare wa kwa Harari le Elifale morwa Ure ₃₆le Hefere wa kwa Megera le Ahia wa kwa Phelone ₃₇le Hesero wa kwa Karemele le Naarai morwa Esebai ₃₈le Joele morwa rraagwe Nathane le Mibegare morwa Hageri ₃₉le Seleke wa Moamone le Naharai wa kwa Beerothe, morwala-dibolai wa ga Joabe morwa Seruya, ₄₀le Ira wa Moithere le Garebe wa Moithere ₄₁le Uria wa Mohethe le Sabate morwa Ahelai ₄₂le Adina morwa Sisa wa Morubene, tlhogo ya Barubene, a na le ba le 30; ₄₃le Hanane morwa Maaga le Josafate wa kwa Methene ₄₄le Usia wa kwa Asethera le Sama le Jehiele, bomorwa Hothame wa kwa Aroere; ₄₅le Jediaele morwa Simeri le Joha morwa-rraagwe, ba kwa Thisa; ₄₆le Eliele wa kwa Mahawime le Jeribai le Josabja bomorwa Elenaame le Ithema wa kwa Moabe ₄₇le Eliele le Obete le Jaasiele wa kwa Mesobaya.