DIPESALEME 97

₁Morena ke kgosi;

a lefatshe le duduetse;

a ditlhakatlhake tse dintsi

di itumele.

₂Maru le lefifi di mo dikanyeditse;

tshiamo le molao ke mothao

wa sedulo sa gagwe sa bogosi.

₃Molelo o mo eteletse pele;

o nyeletsa baba ba gagwe

tikologong.

₄Dikgadima tsa gagwe

di bonesa lefatshe;

lefatshe le a di bona,

e bile le a roroma.

₅Dithaba di gakologa

fa pele ga Morena

jaaka mmotu wa dinotshe,

fa pele ga Morena

wa lefatshe lotlhe.

₆Magodimo a bolela tshiamo

ya gagwe

le batho botlhe

ba bona kgalalelo ya gagwe.

₇A ba tlhajwe ke ditlhong botlhe

ba ba direlang ditshwantsho,

ba ba ipokang ka medimo

e e seng yona.

Medimo yotlhe e a mo obamela.

₈Sione o a utlwa, o a itumela;

bomorwadia Juta ba ipelela

dikatlholo tsa gago, Morena.

₉Gonne wena Morena

o Mogodimodimo

yo o okameng lefatshe lotlhe;

o mogolo bogolo go medimo

yotlhe.

₁₀Ba lo ratang Morena,

tlhoang bosula;

o boloka mewa ya badumedi

ba gagwe,

o ba pholosa

mo diatleng tsa baikepi.

₁₁Lesedi le tlhabetse mosiami,

le boitumelo bo bonaletse

ba ba dipelo di thokgameng.

₁₂Lona basiami,

itumeleleng Morena,

lo bake leina la gagwe

le le boitshepo.