DIPESALEME 89

₂Ke tla opela bopelotlhomogi

jwa Morena ka bosakhutleng;

ke tla itsise losika longwe le longwe

boikanyo jwa gago

ka molomo wa me.

₃Gonne o rile:

“Bopelontle bo tla tlhomama

ka bosakhutleng;

boikanyo jwa me

ke bo thaile kwa legodimong.

₄Ke dirile kgolagano

le moitlhaolelwi wa me,

ke ikanetse Dafita,

motlhanka wa me, ka re:

₅‘Ke tla tlhomamisa losika lwa gago

go ya kwa go sa khutleng,

ke agela ditshika tsotlhe

sedulo sa gago sa bogosi.’ ” Sela.

₆Magodimo a tla boka

kgakgamatso ya gago,

Morena, le boikanyo jwa gago

bo bakwa

mo phuthegong ya baitshepi.

₇Gonne ke mang yo o lekanang

le Morena kwa marung,

yo o tshwanang le Morena

mo go bomorwa Modimo?

₈Modimo o boifega

mo kopanong ya baitshepi;

o mogolo, o bile o boitshega

go feta botlhe

ba ba o dikanyeditseng.

₉Morena,

Modimo wa masomosomo,

ke mang yo o tshwanang nao?

Morena, o thata,

boikanyo jwa gago

bo mo tikologong ya gago.

₁₀Wena o laola

boikgogomoso jwa lewatle;

e re fa makhubu a lone

a tsholetsega,

wena o a didimatse.

₁₁O tšhwetlakantse Rahabe

jaaka yo o tlhabilweng;

o phatlaladitse baba ba gago

ka letsogo le le thata la gago.

₁₂Magodimo ke a gago

le lefatshe ke la gago;

lefatshe le tse di tletseng mo go lone

wena o di thaile tsotlhe.

₁₃Bokone le borwa o di tlhodile;

Thabore le Heremone

di dudueletsa leina la gago.

₁₄O na le letsogo la bonatla,

seatla sa gago se thata,

letsogo le le jang la gago

le tsholetsegile.

₁₅Tshiamo le molao ke motheo

wa sedulo sa gago sa bogosi;

bopelonomi le boammaaruri

di etelela sefatlhego sa gago pele.

₁₆Go sego morafe

o o itseng go duduetsa,

o o tsamayang mo leseding

la sefatlhego sa gago, Morena.

₁₇Ba ipelela leina la gago ka metlha,

ba godisiwa ka tshiamo ya gago.

₁₈Gonne wena

o mokgabo wa thata ya bona,

o tsholetsa lonaka lwa rona

ka bopelonomi jwa gago.

₁₉Gonne thebe ya rona

ke ya Morena,

kgosi ya rona

ke ya Moitshepi wa Iseraele.

₂₀Ka motlha oo, o ne wa bua

le baitshepi ba gago ka pono wa re:

“Ke neetse mogale thuso,

ke godisitse yo o tlhaotsweng

mo morafeng.

₂₁Ke bonye Dafita,

motlhanka wa me,

ka mo tlotsa lookwane lwa me

lo lo boitshepo,

₂₂yo seatla sa me

se tla nnang le ena ka gale,

yo letsogo la me le tla mo tiisang.

₂₃Mmaba ga a ka ke a mo tlhasela,

le e seng rra-bosula go mo patika.

₂₄Ke tla remaganya baganetsi

ba gagwe fa pele ga gagwe,

ke bolaya ba ba mo tlhoileng.

₂₅Mme boikanyo jwa me

le bopelonomi jwa me

di tla nna nae,

lonaka lwa gagwe

lo tla tsholetsegela godimo

ka leina la me.

₂₆Ke baya seatla sa gagwe

mo lewatleng,

le letsogo la gagwe le le jang

mo dinokeng.

₂₇O tla nthaya a re:

‘Wena o rre, o Modimo wa me,

o lefika la thuso ya me.’

₂₈Le gona ke tla mo dira

motsalwapele le yo mogolo

mo dikgosing tsa lefatshe.

₂₉Ke tla mmolokela bopelotlhomogi

jwa me ka bosakhutleng,

mme kgolagano ya me

e tla mo tlhomamela.

₃₀Ke tla dira gore losika lwa gagwe

e nne lo lo sa khutleng,

le sebaka sa sedulo sa gagwe

sa bogosi

se lekane le malatsi a legodimo.

₃₁Mme e tla re fa bomorwawe

ba tlogela molao wa me,

ba sa tsamae

mo go tse di ntshiametseng,

₃₂fa ba itshepolola ditaelo tsa me,

ba sa tlhokomele ditao tsa me,

₃₃ke ba beletse ditlolo tsa bona

ka thupa

le melato ya bona ka dipetso.

₃₄Le fa go ntse jalo

bopelotlhomogi jwa me

ga nkitla ke bo tlosa mo go ene,

le e seng go mo senyetsa

boikanyo jwa me.

₃₅Ga nke ke itshepolola

kgolagano ya me,

le e seng go fetola

se se duleng mo molomong wa me.

₃₆Ke ikanne gangwe fela

ka boitshepo jwa me

– ga ke ne ke aketsa Dafita! –

₃₇Ka re: ‘Losika lwa gagwe

lo tla nnela ruri,

le sedulo sa gagwe sa bogosi

jaaka letsatsi fa pele ga me.

₃₈O tla tlhomama ka bosakhutleng

jaaka ngwedi.

Kana mosupi yo o mo legodimong

o boikanyo.’ ” Sela.

₃₉Mme wena o latlhile

motlodiwa wa gago,

wa mo nyatsa, wa mo galefela.

₄₀O sentse kgolagano

e o e dirileng le motlhanka wa gago,

wa itshepolola serwalo sa gagwe

sa bogosi

ka go se latlhela fa fatshe.

₄₁O thubile dipota tsotlhe tsa gagwe,

dikago tsa phemelo tsa gagwe

wa di ntsha marope.

₄₂Botlhe ba ba neng ba feta ka tsela

ba ne ba mo thukhutha dilo,

a sotlega mo go ba ba agileng nae.

₄₃O godisitse mabogo a a jang

a baganetsi ba gagwe,

wa itumedisa baba botlhe

ba gagwe.

₄₄O titinne bogale

jwa tšhaka ya gagwe,

wa se ka wa mo natlafatsa

mo tlhabanong.

₄₅O fifaditse kgalalelo ya gagwe,

wa digela sedulo sa gagwe

sa bogosi fa fatshe.

₄₆O khutshwafaditse malatsi

a bokau jwa gagwe,

wa mo jesa ditlhong. Sela.

₄₇Morena,

o tla iphitlha goleele go le kae?

A bogale jwa gago

bo tla tuka jaaka molelo?

₄₈Gopola tlhe gore bophelo ke eng?

A batho botlhe o ba bopetse

lefela?

₄₉Motho ke mang yo o ka phelang,

a sa bone loso,

mme a golola mowa wa gagwe

mo thateng ya felo ga baswi? Sela.

₅₀Morena, mapelotlhomogi a gago

a pele a kae,

a o ikanetseng Dafita

ka fa boikanyong jwa gago?

₅₁Morena, gopola tshotlego

ya badiredi ba gago

e ke e rweleng ka sehuba sa me

e tswa merafeng yotlhe e megolo,

₅₂e baba ba gago, Morena,

ba sotlileng ka yona,

e ba sotlileng dikgato

tsa motlodiwa wa gago ka yona.

₅₃A Morena a bakwe

ka bosakhutleng.

Amen, ee, a go nne jalo!