DIPESALEME 46

₂Modimo ke botshabelo jwa rona

le thata ya rona;

o itshupile gantsi

e le thuso mo ditlalelong.

₃Ke gona ka moo re sa boifeng,

le fa lefatshe le ka roroma,

le fa dithaba di ka kgokgoetsegela

mo botennye jwa lewatle;

₄le fa metsi a lone a ka gwasa,

a phoka lefulo,

le fa dithaba di ka roroma

ka go gogomoga ga lone. Sela.

₅Dikelelo tsa noka

di itumedisa motse wa Modimo,

e bong Felo-ga-Boitshepo

a maago a Mogodimodimo.

₆Modimo o mo teng ga ona,

ga o kitla o tshikinyega;

Modimo o a o thusa,

fa bosigo bo sa.

₇Merafe e ne e tsosa moferefere,

magosi a reketla;

wa dumisa maru a ona,

mme lefatshe la roroma.

₈Morena wa masomosomo

o na le rona,

Modimo wa ga Jakobe

ke botshabelo jwa rona. Sela.

₉Tlayang lo lebe ditiro tsa Morena

yo o dirang setlhogo mo lefatsheng;

₁₀yo o khutlisang dintwa

go ya kwa bokhutlong jwa lefatshe;

yo o robang bora,

a robaganye lerumo,

a fise dikoloi tsa ntwa ka molelo!

₁₁“Khutlang lo itse,

fa ke le Modimo;

ke mogolo mo merafeng,

ke mogolo mo lefatsheng.”

₁₂Morena wa masomosomo

o na le rona,

Modimo wa ga Jakobe

ke botshabelo jwa rona. Sela.