DIPESALEME 146

₁Haleluya! Baka Morena,

wena mowa wa me!

₂Ke tla nna ke galaletsa Morena

ke ntse ke phela;

ke tla nna ke opelela Modimo

wa me ke sa ntse ke le yo.

₃Lo se ka lwa ikanya barena,

le e seng ngwana wa motho

yo go se nang thuso epe

mo go ena.

₄Fa mowa wa gagwe o tswa,

o boela gape

kwa mmung wa gagwe;

maikaelelo a gagwe

a fele ka lone letsatsi leo.

₅Go sego ena yo Modimo

wa ga Jakobe e leng thuso ya gagwe,

yo tsholofelo ya gagwe

e leng mo go Morena,

Modimo wa gagwe,

₆yo o dirileng legodimo le lefatshe

le lewatle le tsotlhe

tse di mo go tsona;

yo o bolokang boammaaruri

ka bosakhutleng;

₇yo o direlang bapatikwi tshiamo,

ba ba tlala a ba fe dijo.

Morena o golola bagolegwi.

₈Morena o foufolola difofu;

Morena o tsosa ba ba obegileng;

Morena o rata basiami.

₉Morena o boloka baeng,

o gomotsa dikhutsana

le batlholagadi;

mme tsela ya baikepi yona

a e kgopamise.

₁₀Morena ke kgosi ka bosakhutleng;

e bong Modimo wa gago,

Sione, go ya tshikatshikeng.

Haleluya!