DIANE 5

₁Ngwanaka, botlhale jwa me o bo ele tlhoko; tlhaloganyo ya me o e sekegele tsebe ₂gore o boloke kelelelo, mme molomo wa gago o boloke kitso. ₃Gonne molomo wa mosadi o sele o rothisa mafura a dinotshe; magalapa a gagwe a borethe bogolo go lookwane. ₄Mme la bofelo o galaka jaaka longana; o bogale jaaka tšhaka e e magale-mabedi. ₅Maoto a gagwe a fologela kwa losong; dikgato tsa gagwe di ntse di atamela felo ga baswi. ₆Ditselana tsa gagwe ke tsa go kgarakgatshega a sa itse gore a se ka a tlhamalela mo tseleng ya bophelo.

₇Mme jaanong, banaka, nkutlweng; se tlogeleng mafoko a molomo wa me! ₈A tsela ya gago e nne kgakala nae; se atamele mojako wa ntlo ya gagwe. ₉E se re gongwe wa naya ba bangwe thata ya bošwa jwa gago, le e seng go naya mosadi yo o setlhogo dinyaga tsa gago, ₁₀e se re gongwe ba bangwe ba kgora ka thata ya gago le ka tse o di bonyeng ka matsapa, tsa ya mo ntlong ya motho o sele. ₁₁E se re gongwe mo bokhutlong jwa gago, fa go fela mmele wa gago le nama ya gago, o a fegelwa, ₁₂o a re: “Joo nna wee! Ke ne ke reng, fa ke ila thuto; fa pelo ya me e nyatsa kgalemelo, ₁₃fa ke sa utlwe mantswe a baruti ba me fa ke sa sekegele ba ba nthutang tsebe! ₁₄Ke batlile go wela gotlhe mo tatlhegong, ke le mo gare ga batho le phuthego!”

₁₅Nnyaya! Nwaa metsi a sediba sa gago, a a tswelang mo motsweding wa gago. ₁₆A o a re, metswedi ya gago e tshologele kwa ntle; dinokana tsa metsi tsa gago di ele mo dipatlelong? ₁₇Nnyaya! A e nne tsa gago o le nosi, e seng tsa ba bangwe nao! ₁₈A motswedi wa gago o tshegofale; o itumelele mosadi wa bošwa jwa gago o le nosi. ₁₉O a ratega jaaka tshephe e namagadi, o montle jaaka mofele o monamagadi. A bontle jwa gagwe bo go lapolose ka metlha, wena o nne o itumele ka lorato lwa gagwe. ₂₀Morwaaka, o ratelang go kgatlhwa ke mosadi o sele? O ka tlamparela jang mosadi yo e seng wa gago? ₂₁Gonne ditsela tsa mongwe le mongwe di bonwa ke matlho a Morena; o ntse a tlhokomela metlhala yotlhe ya gagwe. ₂₂Moikepi o tla tshwarwa ka melato ya gagwe, a golegwa ka megala ya boleo jwa gagwe. ₂₃O tla swa ka go sa rutega, a latlhega ka bosilo jo bogolo jwa gagwe.