DIANE 11

₁Selekanyetso sa go tsietsa ke maila mo Moreneng; mme seelo se se lekanyeng se a mo kgatlha.

₂Boikgantsho bo bapile le ditlhong, mme botlhale bo mo go ba ba ikokobetsang.

₃Poifo-Modimo ya batho ba nnete e ba etelela pele, mme bolotsana jwa ba ba se nang boikanyo bo tla ba isa tatlhegong.

₄Di-tsa-motho ga di thuse ka letsatsi la bogale, mme tshiamo e golola mo losong.

₅Tshiamo ya mmoifi-Modimo e tla baakanya tsela ya gagwe, mme moikepi o tla wa ka boikepo jwa gagwe.

₆Tshiamo ya batho ba nnete e tla ba pholosa, mme ba ba se nang boikanyo ba tla tshwarwa ka keletso ya bone.

₇E a re fa moikepi a swa, tsholofelo ya gagwe e nyelele; tse masilo a di lebeletseng di senyege.

₈Fa mosiami a ntshiwa mo tlalelong, moikepi o tsena mo boemong jwa gagwe.

₉Yo o pelompe o senya mongwe-ka-ene ka molomo, mme basiami ba pholosiwa ka kitso.

₁₀E a re fa basiami ba phela sentle, motse o duduetse; e re baikepi ba nyelela, go nne tuduetso.

₁₁Motse o gola ka tshegofatso ya batho ba nnete, mme o rutlwa ka melomo ya baikepi.

₁₂Yo o se nang tlhaloganyo o nyatsa mongwe-ka-ene, mme monna wa kelelelo o a didimala.

₁₃Yo o senyang ba bangwe leina o bolela tsa sephiri, mme yo o mowa o ikanyegang o a di loba.

₁₄Mo go se nang bogogi jo bo siameng morafe o a latlhega, mme o thusega, fa go le bagakolodi ba bantsi.

₁₅Fa motho a ipofa go emela molato wa yo mongwe, o tla direlwa bosula thata; mme yo o ilang kemelo o tla iketla.

₁₆Mosadi yo o pelontle o tla bona tlotlego, mme mosadi yo o ilang nnete o bona sedulo sa nyatsego.

₁₇Yo o lorato o itirela molemo ka esi; yo o setlhogo o itshenyetsa ka esi.

₁₈Moikepi o itirela khumo ya tsietso, mme yo o jwalang tsa tshiamo o bona tuelo ya nnete.

₁₉Tshiamo ya nnete e isa mo bophelong, mme yo o sianelang boikepo o sianela losong.

₂₀Ba ba pelo di kgopo ba tena Morena, mme ba tsamao e e itekanetseng ba a mo kgatlha.

₂₁Ruri, yo o bosula ga a nke a tlhoka petso, mme losika lwa basiami lo tla falola.

₂₂Mosadi yo montle yo o se nang maitseo o tshwana le lenyena la gouta mo nkong ya kolobe.

₂₃Tse basiami ba di eletsang ke tse di molemo fela; tse baikepi ba di lebeletseng ke kotlo e e bogale.

₂₄Go na le ba ba abelang ba bangwe thata, mme ba okelediwa leruo; go ba ba bolokang tsa bone go feta tshwanelo, mme ba ya lehumeng.

₂₅Yo o ratang go tshegofatsa ba bangwe o tla lapolosiwa ka esi; yo o nosang ba bangwe le ene o tla nosiwa.

₂₆Yo o ganang ka mabele o hutsiwa ke batho; mme lesego le tla okama yo o a rekisang.

₂₇Yo o tlhoafalelang tse di molemo o ipatlela natefo, mme yo o batlang bosula o tla ipolaya ka jona.

₂₈Yo o ikanyang khumo ya gagwe o tla tlhotlhorega, mme basiami ba tla tlhoga jaaka matlhare.

₂₉Yo o dubakanyang ntlo ya gagwe o tla rua phefo; lesilo e tla nna motlhanka wa yo o pelo e botlhale.

₃₀Leungo la mosiami ke setlhare sa bophelo yo o kgonang mewa ya batho o botlhale.

₃₁Bonang, mosiami o tla bona tuelo mo lefatsheng; moikepi le moleofi le bone ba tla bona ya bone e e botlhoko.