NUMERI 29

₁“ ‘Le ka letsatsi la ntlha la kgwedi ya bosupa lo nne le kgobokano e e boitshepo; lo se ka lwa dira tiro epe ya lona ka lone; a e nne letsatsi la tumo ya diphala mo go lona. ₂Lo direle Morena setlhabelo sa phiso sa monko o o monate sa poana e le nngwe le phelehu e le nngwe le dikwana di supa tsa ngwaga o le mongwe tse di se nang bogole, ₃mmogo le tshupelo ya dijo ya tsona ya bupe jo bo boleta jo bo dubilweng ka lookwane, e bong dikarolo di le tharo tsa lesome tsa efa mmogo le poana le dikarolo di le pedi tsa lesome mmogo le phelehu, ₄le karolo ya lesome le kwana nngwe le nngwe ya dikwana di supa ₅le setlhabelo sa boleo sa phoko e le nngwe gore lo direlwe thuanyo, ₆kwa ntle ga setlhabelo sa phiso sa kgwedi le tshupelo ya dijo ya teng le kwa ntle ga setlhabelo sa phiso sa ka gale le tshupelo ya dijo ya teng le ditshupelo tsa noo tsa tsona jaaka di tshwanetse, go nna tshupelo ya molelo ya monko o o monate mo Moreneng.

₇“ ‘Le ka letsatsi la lesome la kgwedi ya bosupa eo lo nne le kgobokano kwa Felong-ga-Boitshepo, lo itshôlê; lo se ka lwa dira tiro epe ya lona ka lone. ₈Mme lo isetse Morena setlhabelo sa phiso sa monko o o monate sa poana e le nngwe le phelehu e le nngwe le dikwana di supa tsa ngwaga o le mongwe; a e nne tsa lona tse di se nang bogole; ₉mmogo le tshupelo ya dijo ya tsona ya bupe jo bo boleta jo bo dubilweng ka lookwane, e bong dikarolo di le tharo tsa lesome tsa efa mmogo le poana le dikarolo di le pedi tsa lesome le phelehu ₁₀le karolo ya lesome le kwana nngwe le nngwe ya dikwana di supa ₁₁le phoko e le nngwe ya setlhabelo sa boleo kwa ntle ga setlhabelo sa boleo sa letsatsi leo la thuanyo le sa phiso sa ka gale le tshupelo ya dijo ya sona le ditshupelo tsa noo tsa tsona.

₁₂“ ‘Le ka letsatsi la 15 la kgwedi eo ya bosupa lo nne le kgobokano e e boitshepo; lo se ka lwa dira tiro epe ya lona ka lone, mme lo direle Morena Moletlo malatsi a supa. ₁₃Lo isetseng Morena setlhabelo sa phiso, setlhabelo sa molelo sa monko o o monate, e bong dipoana di le 13 le diphelehu di le pedi le dikwana di le 14 tsa ngwaga o le mongwe; a e nne tse di se nang bogole; ₁₄mmogo le tshupelo ya dijo ya tsona ya bupe jo bo boleta jo bo dubilweng ka lookwane, e bong dikarolo di le tharo tsa lesome tsa efa mmogo le poana nngwe le nngwe ya dipoana di le 13 le dikarolo di le pedi tsa lesome le phelehu nngwe le nngwe ya diphelehu tse pedi; ₁₅le karolo ya lesome le kwana nngwe le nngwe ya dikwana di le 14 ₁₆le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₁₇“ ‘Ka letsatsi la bobedi lo tlhabeleng dipoana di le 12 le diphelehu di le pedi le dikwana di le 14 tsa ngwaga o le mongwe tse di se nang bogole ₁₈mmogo le ditshupelo tsa dijo le tsa noo tsa tsona, tsa dipoana le diphelehu le dikwana ka fa palong ya tsona jaaka di tshwanetse, ₁₉le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya sona le ditshupelo tsa noo tsa tsona.

₂₀“ ‘Ka letsatsi la boraro le tlhabeleng dipoana di le 11 le diphelehu di le pedi le dikwana di le 14 tsa ngwaga o le mongwe tse di se nang bogole ₂₁mmogo le ditshupelo tsa dijo le tsa noo tsa tsona, tsa dipoana le diphelehu le dikwana ka fa palong ya tsona jaaka di tshwanetse ₂₂le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₂₃“ ‘Ka letsatsi la bone lo tlhabeleng dipoana di le some le diphelehu di le pedi le dikwana di le 14 tsa ngwaga o le mongwe tse di se nang bogole, ₂₄mmogo le ditshupelo tsa dijo le tsa noo tsa tsona tsa dipoana le diphelehu le dikwana ka fa palong ya tsona jaaka di tshwanetse ₂₅le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₂₆“ ‘Ka letsatsi la botlhano lo tlhabeleng dipoana di le robongwe le diphelehu di le pedi le dikwana di le 14 tsa ngwaga o le mongwe tse di se nang bogole ₂₇mmogo le ditshupelo tsa dijo le tsa noo tsa tsona, tsa dipoana le diphelehu le dikwana ka fa palong ya tsona jaaka di tshwanetse ₂₈le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₂₉“ ‘Ka letsatsi la borataro lo tlhabeleng dipoana di le robedi le diphelehu di le pedi le dikwana di le 14 tsa ngwaga o le mongwe tse di se nang bogole ₃₀mmogo le ditshupelo tsa dijo le tsa noo tsa tsona tsa dipoana le diphelehu le dikwana ka fa palong ya tsona jaaka di tshwanetse ₃₁le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₃₂“ ‘Ka letsatsi la bosupa lo tlhabeleng dipoana di supa le diphelehu di le pedi le dikwana di le 14 tsa ngwaga o le mongwe tse di se nang bogole ₃₃mmogo le ditshupelo tsa dijo le tsa noo tsa tsona tsa dipoana le diphelehu le dikwana ka fa palong ya tsona jaaka di tshwanetse ₃₄le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₃₅“ ‘Ka letsatsi la robedi lo nne le kgobokano ya Moletlo; lo se ka lwa dira tiro epe ya lona ka lone. ₃₆Lo isetseng Morena setlhabelo sa phiso, e bong setlhabelo sa molelo sa monko o o monate sa poana e le nngwe le phelehu e le nngwe le dikwana di supa tsa ngwaga o le mongwe tse di se nang bogole; ₃₇mmogo le ditshupelo tsa dijo le tsa noo tsa tsona, tsa poana le phelehu le dikwana ka fa palong ya tsona jaaka di tshwanetse; ₃₈le phoko e le nngwe ya setlhabelo sa boleo kwa ntle ga setlhabelo sa phiso sa ka gale le tshupelo ya dijo ya teng le tshupelo ya noo ya teng.

₃₉“ ‘Ke tseo lo tshwanetseng go di direla Morena ka malatsi a Meletlo ya lona kwa ntle ga tsa maikano a lona le tsa bogalona, le fa e le ditlhabelo tsa phiso gongwe ditshupelo tsa dijo gongwe tsa noo gongwe ditlhabelo tsa tebogo.’ ”

₄₀Moše a di bolelela Baiseraele fela jaaka Morena a mo laetse.