NUMERI 11

₁Mme morafe o ne o ngongoregela tlalelo mo ditsebeng tsa Morena. Ya re Morena a utlwa, a ba tukela bogale, mme molelo wa Morena wa tuka mo go bone, wa fisa bothibelelo mo dithoko. ₂Ke fa batho ba lelela go Moše. Moše a rapela Morena. Molelo wa tima. ₃Ba taya felo foo leina la Thabera; gonne molelo wa Morena o ne o tukile teng mo go bone.

₄Mme batho ba e leng masele ba ba neng ba le mo go bone, ba ineela mo dikeletsong. Le Baiseraele ba lela gape ba re: “Ke mang yo o tla re jesang nama? ₅Re gopola ditlhapi tse re neng re di ja fela kwa Egepeto, le diphare le magapu le dipepere le dikwii le dikonofole. ₆Mme jaanong mewa ya rona e ngoseletse. Ga go na sepe. Matlho a rona a lebile Mmana fela.”

₇Jaanong Mmana o ne o tshwana le kungwa ya moretlhwa, ponalo ya ona e tshwana le boroku. ₈Batho ba ne ba tsamayatsamaya ba o sela, ba o sila ka lelwala, gongwe ba o setla mo dikikeng, ba o apaya mo dipitseng, ba be ba dira dinkgwe ka ona; moutlwalo wa ona o ne o tshwana le wa dikuku tsa lookwane. ₉E ne ya re monyo o wela mo bothibelelong bosigo, Mmana o wele mo go jona.

₁₀Jaanong ya re Moše a utlwa batho ba lela ka fa ditshikeng tsa bone, mongwe le mongwe kwa mojakong wa tente ya gagwe, Morena a tuka bogale thata, mme ga sulafalela Moše. ₁₁Ke fa Moše a raya Morena a re: “O tlhokofaletsang motlhanka wa gago? Ke eng fa ke sa bone bopelotlhomogi mo matlhong a gago, mo o nthwesitseng morwalo ka morafe otlhe o? ₁₂A ke nna ke imileng morafe otlhe o? Kampo a ke nna ke o tsetseng, fa o nthaya o re, ke ba belege, ke be ke ba amuse jaaka mmelegi a belege lesea, ke ba ise kwa nageng e o e ikanetseng borraabo. ₁₃Ke tla tsaya nama kae e nka e nayang morafe otlhe o? Gonne ba lelela go nna ba re: ‘Re fe nama gore re je.’ ₁₄Ga ke kgone go belega morafe otlhe o ke le nosi, gonne o a mpalela. ₁₅Fa o rata go dira jalo ka nna, mpolae bogolo, fa ke bonye bopelotlhomogi mo matlhong a gago gore ke se tlhole ke bona pogisego ya me.”

₁₆Ke fa Morena a raya Moše a re: “Mphuthele banna ba le 70 mo batsofeng ba Iseraele, ba o ba itseng, fa e le bagolo ba morafe le baokamedi ba ona, o ba biletse kwa Tenteng ya Boipontsho, ba eme gona nao. ₁₇Ke tla fologa, ke bua nao teng, ke tsaya mowa o o tshwanang le o o mo go wena, ke o baya mo go bone gore ba go rwadise morwalo wa morafe o, mme o se o rwale o le wesi fela. ₁₈Mme morafe ò o ree o re: ‘Iitshepisetseng kamoso, foo lo tla ja nama; gonne lo ledile mo ditsebeng tsa Morena lwa re: Ke mang yo o tla re jesang nama? Gonne re ne re phela monate kwa Egepeto. Ka moo Morena o tla lo naya nama gore lo je. ₁₉Ga lo ne lo ja letsatsi le le lengwe fela le e seng malatsi a le mabedi le e seng a le matlhano le e seng a le some le some le e seng a le 20, ₂₀mme lo tla ja kgwedi yotlhe go tsamaya e be e lo tlapele, e lo tene. Ka gonne lo latlhile Morena yo o mo gare ga lona, lwa lela fa pele ga gagwe lwa re: Re ne re hudugelang kwa Egepeto?’ ”

₂₁Moše a fetola a re: “Ke batho ba le 600 000 ba dinao ba ke nang nabo, mme wena o a re, o tla ba naya nama gore ba je kgwedi yotlhe! ₂₂A ba tla tlhabelwa difutshane le dikgomo gore go ba lekane? Kampo ba tla tshwarelwa ditlhapi tsotlhe tsa lewatle gore di ba lekane?”

₂₃Mme Morena a raya Moše a re: “A letsogo la Morena le a tlhaela? Jaanong o tla bona, fa lefoko la me le go dirafalela gongwe nnyaya.”

₂₄Ke fa Moše a tswela kwa ntle a bolelela morafe mafoko a Morena, a phutha banna ba le 70 mo batsofeng ba morafe, a ba emisa mo tikologong ya Tente. ₂₅Ya baa gona Morena a fologang a le mo lerung a bua nae, a ba a tsaya mowa o o tshwanang le o o mo go ene, a o baya mo banna-bagolong ba le 70. Jaanong ya re ba sena go tsenwa ke Mowa, ba bua jaaka baporofeti, mme ba se ka ba dira gape.

₂₆Mme banna bagolo ba le babedi ba ne ba setse kwa bothibelelong, leina la mongwe e ne e le Eletate, la yo mongwe e le Metate. Le bone ba tsenwa ke Mowa. Gonne ba ne ba kwadilwe mmogo, mme ba se ka ba tswela kwa Tenteng. Ba ne ba bua jaaka baporofeti mo bothibelelong. ₂₇Ke fa mosimane a taboga a begela Moše a re: “Eletate le Metate ba bua jaaka baporofeti mo bothibelelong.” ₂₈Jaanong Jošua morwa Nune, modiredi wa ga Moše go tloga bokaung jwa gagwe, a simolola go bua a re: “Mong wa me, Moše, ba thibele!”

₂₉Mme Moše a mo raya a re: “A o ntwela ka lefufa? E kete morafe otlhe wa Morena e ka bo e le baporofeti, Morena a bo a tsentse Mowa wa gagwe mo go bone!” ₃₀Moše a ba a boela kwa bothibelelong, a na le bagolo ba Iseraele.

₃₁Jaanong ga tswa phefo kwa Moreneng, ya tlisa maphurrwana a tswa ntlheng ya lewatle, ya a gasetsa mo bothibelelong, a tlala ntlheng tsotlhe tsa bothibelelo mo go kana ka leeto la letsatsi mo ntlheng eno le mo go kana ka leeto la letsatsi ntlheng ele, a fofa mabogo a le mabedi godimo ga lefatshe. ₃₂Jaanong batho ba nanoga ba phutha maphurrwana letsatsi lotlhe leo le bosigo jotlhe le letsatsi lotlhe la kamoso. Yo go neng go twe: Ga a a phutha sepe, o ne a phuthile dihomere di le 10. Mme ba a ikanegela mo tikologong ya bothibelelo. ₃₃Mme e rile nama e sa ntse e le mo ganong e ise e tlhafunwe, Morena a tukela morafe bogale; Morena a ba a bolaya bontsi mo morafeng ka petso e kgolo. ₃₄Felo foo ga tewa leina la Diphupu-tsa-bohula. Gonne teng go fitlhilwe batho ba ba neng ba ineetse mo bohuleng.

₃₅Morafe wa ba wa bolola kwa Diphupung-tsa-bohula, wa ya kwa Haserothe, wa nna teng.