LEFITIKO 21

₁Morena a ba a raya Moše a re: “Bua le baperesiti, bomorwa Arone, o ba ree o re: ‘A moperesiti a se ka a iitshekolola ka moswi mo morafeng wa ga gabo, ₂fa e se ka mongwe-ka-ene yo o gaufi nae ka madi, e bong ka mmaagwe le ka rraagwe le ka morwawe le ka morwadie le ka morwa-rraagwe ₃le ka kgaitsadie wa lekgarebe yo o gaufi nae yo o iseng a nyalwe ke monna; ka bone o ka iitshekolola. ₄A se ka a iitshekolola ka kgaitsadie yo o nyetsweng mo morafeng wa ga gabo, ka a tla bo a iitshepolola.

₅“ ‘Baperesiti ba se ka ba ipeola mafatla mo tlhogong tsa bone, ba se ka ba ipoma ditedu le e seng go iphatsa mebele. ₆A e nne ba ba itshepetseng Modimo wa bone, mme ba se ka ba itshepolola leina la Modimo wa bone; gonne ke bone ba ba tsisang tsa melelo ya Morena, e bong dijo tsa Modimo wa bone; ke ka moo ba tshwanetseng go nna ba ba boitshepo. ₇A ba se ka ba tsaya mosadi wa seaka gongwe yo o senyegileng; le gona ba se ka ba tsaya mosadi yo o tlhadilweng ke monna; gonne moperesiti o itshepetse Modimo wa gagwe. ₈Ka moo a a kaiwe yo o boitshepo; gonne ke ene yo o fisang dijo tsa Modimo wa gago mo aletareng. A e nne yo o boitshepo mo go lona. Gonne nna Morena ke yo o boitshepo yo ke lo itshepisang. ₉Fa morwadia moperesiti a ka iitshepolola ka go akafala, o a bo a itshepolola rraagwe; a a fisiwe ka molelo.

₁₀“ ‘Mme moperesiti yo mogolo mo baperesiting ka ene yo o tshetsweng lookwane lwa tlotso mo tlhogong, a bile a tlhomamisitswe gore a apare diaparo tsa boperesiti, a se ka a lesa moriri wa gagwe go lepelela ka botlhaswa, a se ka a ikgagola diaparo. ₁₁A se ka a atamela moswi ope; a se ka a iitshekolola ka rraagwe le e seng ka mmaagwe. ₁₂A se ka a tswa mo Felong-fa-go-Boitshepo, a se ka a itshepolola Felo-fa-go-Boitshepo ga Modimo wa gagwe; gonne itshepelo ya lookwane lwa tlotso ya Modimo wa gagwe e mo go ene. Ke nna Morena. ₁₃A a tsee mosadi yo e leng lekgarebe la tlotlego, ₁₄mme a se ka a tsaya motlholagadi gongwe yo o tlhadilweng gongwe yo o senyegileng gongwe seaka. A a tsee lekgarebe la morafe wa ga gabo go nna mosadi wa gagwe ₁₅gore a se ka a itshepolola bana ba gagwe mo morafeng wa ga gabo; gonne ke nna Morena yo ke mo itshepisang.’ ”

₁₆Morena a ba a bua le Moše a re: ₁₇“Raya Arone o re: ‘Mongwe le mongwe wa losika lwa gago kajeno le metlheng e e tlang yo o nang le bogole a se ka a atamela go tlisa dijo tsa Modimo wa gagwe. ₁₈Gonne monna mongwe le mongwe yo o nang le bogole ga a tshwanela go atamela, le fa e le sefofu gongwe yo o tlhotsang gongwe yo o nko e phaphathi gongwe yo o nang le tokololo e e gololegileng ₁₉gongwe yo o kileng a robega lekoto, le fa e le letsogo ₂₀gongwe yo o duleng mokwatla gongwe yo o hubileng gongwe yo o leitlho-le-sebala gongwe yo o duleng motshweetshwee gongwe ditlhoko gongwe yo o senyegileng bonna. ₂₁Monna mongwe le mongwe wa losika lwa ga Arone moperesiti yo o nang le bogole, a se ka a atamela go tlisa tsa melelo ya Morena; o na le bogole, ga a tshwanela go atamela go tlisa dijo tsa Modimo wa gagwe. ₂₂Go ja o ka ja dijo tsa Modimo wa gagwe, le fa e le tse di boitshepotshepo gongwe tse di boitshepo. ₂₃Fela a se ka a tsena fa lesireng le e seng go atamela kwa aletareng; gonne o na le bogole; e se re gongwe a itshepolola tse di boitshepo tsa me; gonne ke nna Morena yo ke di itshepisang.’ ” ₂₄Moše a begela Arone le bomorwawe le Baiseraele botlhe.