DILELO TSA GA JEREMIA 4

₁Malo-nna-wee!

Gouta e fifetse jang,

ga fetoga gouta e ntlentle!

Mafika a a boitshepo a tshololwa

kwa dikhutlong tsa mebila.

₂Bomorwa Sione

ba e leng dinatla,

ba ne ba tlotlega

jaaka gouta e ntlentle. Ijoo!

Ba kailwe dinkgwana

tsa letsopa fela,

tse di dirwang

ke diatla tsa mmopi.

₃Diphokojwe le tsona

di ntshetsa diphokojwana

mabele a tsona go di amusa.

Mme morwadia morafe wa me

o ne a le setlhogo

jaaka bontšhwe mo nageng.

₄Loleme lwa lesea lo ne lwa

kgomarela magalapa a lone

ka lenyora;

bana ba lelela bogobe,

go se na yo o ba nathelang.

₅Baji ba tse di monate

ba ne ba felelela mebileng;

ba ba neng ba robadiwa

maseleng a mahibidu

ba lala kwa thutubudung.

₆Gonne molato wa morwadia

morafe wa ga etsho o ne o feta

boleo jwa Sotoma,

ona motse o o ribegeditsweng

ka ponyo ya leitlho,

o sa amiwe ke diatla.

₇Baikiledi ba ona

ba ne ba phatsima

bogolo go semathana,

ba phala mašwi ka bosweu;

ba ne ba le mmele o mohibidu

bogolo go matlapana a dikorala,

ba bopegile jaaka a botala

jo bowebu.

₈Ponalo ya bone e ntshofetse

bogolo go mosidi,

ga ba itsiwe mebileng;

letlalo la bone

le ngaparetse marapo a bone,

ba omeletse jaaka dikgong.

₉Ba ba bolailweng ka tšhaka

ba tlhogonolo bogolo

go ba ba suleng ka tlala,

ba ba feleletseng,

ba bolawa ka go tlhoka dijo

tsa masimo.

₁₀Basadi ba ba bonolo

ba apaya bana ba bone

ka diatla tsa bone;

ya nna dijo tsa bone

mo tatlhegong

ya morwadia morafe wa ga etsho.

₁₁Morena o dirafaditse

kgalefo ya gagwe,

a gorometsa bogale jwa gagwe

jo bo tukang; a tshuba molelo

mo motseng wa Sione

o o jeleng metheo ya ona.

₁₂Dikgosi tsa lefatshe

le baagi botlhe ba lone

ga ba a ka ba dumela,

fa mopitlaganyi le mmaba

ba ka tsena mo dikgorong

tsa Jerusalema.

₁₃Mme ba tsenye ka ntlha ya dibe

tsa baporofeti ba gagwe

le ka ntlha ya maleo

a baperesiti ba gagwe,

ba ba neng ba tsholola madi

a basiami teng.

₁₄Ba ne ba thekesela

jaaka difofu mebileng,

ba kgotlelegile ka madi;

batho ba bile ba palelwa

ke go ama diaparo tsa bone.

₁₅Ba goelana ba re:

“Fapogang,

yo o itshekologileng ke yo!

Fapogang, fapogang,

se mo ameng!”

Ba bua mo ditšhabeng ba re:

“Fa ba tshaba le go thekesela

ga ba a tshwanela go nna mono.”

₁₆Morena ka esi o ba faladitse,

ga a tlhole a ba tlhokomela.

Baba ga ba a ka ba tlotla

baperesiti,

le e seng go tlhomogela

baporofeti pelo.

₁₇Matlho a rona a ntse a itapisitse

go lebelela thuso

e e leng ya lefelafela;

re ne re tlhola

re le mo diraleng tsa rona,

re letela setšhaba

se se sa tleng go re thusa.

₁₈Ba ne ba lalela dikgato tsa rona,

re sa kgone go tsamaya

mo dipatlelong tsa rona.

Bokhutlo jwa rona

bo ne bo atametse,

malatsi a rona a feleletse,

ee, bokhutlo jwa rona

bo ne bo tlile.

₁₉Ba ba re lateletseng

ba ne ba le bobebe bogolo

go bontsu ba legodimo;

ba re tsoma mo dithabeng,

ba re lalela mo sekakeng.

₂₀Mowa wa bophelo jwa rona,

e bong Motlodiwa wa Morena,

o ne a tshwarwa mo digopong

tsa bone;

yo re buileng ka ga gagwe ra re:

“Re tla phela mo moriting

wa gagwe

re le gare ga ditšhaba.”

₂₁Wena morwadia Etomo

yo o agileng mo lefatsheng la Use,

itumele o thabe.

Le wena o tla tlelwa ke senwelo;

o tla tagwa, o ikapola!

₂₂Kotlo ya gago e lekanye,

wena morwadia Sione;

ga a ka ke a go isa gape

mo botshwarong.

Mme wena morwadia Etomo

o tla go beletsa molato wa gago,

a ba a senola maleo a gago.