JOŠUA 16

₁Molelwane wa naga e Bajosefa ba e abetsweng ka tengwa o ne o simologa fa Joretane kwa Jerigo ntlheng ya botlhabatsatsi ya metsi a Jerigo, mme go tswa teng o ya kwa sekakeng, o be o tlhatlogela kwa dithabeng tsa Bethele. ₂Jaanong go tswa kwa Bethele o ne o ya kwa Luse, o fetela pele kwa nageng ya Baaregi kwa Atarothe. ₃O be o fologela kwa bophirimatsatsi kwa nageng ya Bajafelete go ya go fitlha kwa nageng ya Bethorone yo o kwa tlase le go ya kwa Gesere. O be o felela fa lewatleng.

₄Ke fa bomorwa Josefa, e bong Manase le Eferaime, ba neng ba bona kabelo ya naga teng.

₅Naga ya Baeferaime ka fa ditshikeng tsa bone e ne e ntse jaana: Molelwane wa kabelo ya bone o ne o ya kwa botlhabatsatsi kwa Aterothe-Atare go ya go fitlha kwa Bethorone yo o kwa godimo. ₆Molelwane o be o fetela pele kwa lewatleng, o pota Migemethathe mo ntlheng ya borwa. Molelwane o be o thelela, o ya kwa botlhabatsatsi kwa Thaanatšhilo, o mo pota ka fa ntlheng ya botlhabatsatsi, o ya kwa Janoa. ₇Go tswa kwa Janoa o fologela kwa Atarothe le kwa Naara, o ama Jerigo, o felela fa Joretane. ₈Go tswa kwa Thaphua molelwane o ne o ya kwa bophirimatsatsi kwa nokaneng ya Kana, o felela fa lewatleng. Ke yona kabelo ya lotso lwa Baeferaime ka fa ditshikeng tsa bone ₉mmogo le metse e e segetsweng Baeferaime mo gare ga naga ya Bamanase, metse yotlhe le metsana ya yona. ₁₀Mme ba se ka ba leleka Bakanana ba ba agileng kwa Gesere. Bakanana ba nna jalo mo gare ga Baeferaime go fitlha letsatsing leno. Fela ba nna batlhanka, ba ba direla.